Ekonomiese streek Oeral

Die ekonomiese streek Oeral in Rusland.

Die ekonomiese streek Oeral (Russies: Ура́льский экономи́ческий райо́н, Oeralski ekonomitsjeski rajon) is een van 12 ekonomiese streke van Rusland. Dit omvat die middel en suide van die Oeralgebergte, asook dele van die Russiese en die Wes-Siberiese Laagland.

Die streek is 824 000 km² groot en dus effens groter as Turkye. Die bevolking is 20,2 miljoen volgens die 2012-sensus. Sowat 74 persent van die mense woon in die stede. Die gemiddelde bevolkingsdigtheid is 24,6/km².

Dit is naas die Sentrale ekonomiese streek die grootste ekonomiese streek in die land. In die Sowjetunie was dit ’n belangrike sentrum vir die vervaardiging van yster en staal. In Basjkortostan is die grootste sentrum vir olievervaardiging. In die 17de eeu het ’n groot mynbousektor ontstaan in die Suid-, Sentrale en Noord-Oerals.

Masjienbou is ook belangrik. Verder is daar ’n chemiese, petro-chemiese, olie-, gas- en houtverwerkingsnywerheid. Die grootste nywerheidstede is Magnitogorsk, Jekaterinburg, Tsjeljabinsk, Nizjni Tagil en Perm. Talle spoorweë loop deur die gebied en daar is ook riviervervoer op onder meer die Kama-, Belaja- en Oeral-rivier.

Landbou bestaan hoofsaaklik uit graan-, vleis- en melkproduksie.

Deelgebiede

Die volgende deelgebiede val in die streek:

1. Basjkortostan
2. Koergan-oblast
3. Oedmoertië
4. Orenburg-oblast
5. Perm-krai
6. Swerdlofsk-oblast
7. Tsjeljabinsk-oblast

Verwysings

Hierdie artikel is vertaal uit die Nederlandse Wikipedia