Kamtsjatka-krai

in Wikipedia, die vrye ensiklopedie
Kamtsjatka-krai
Камчатский край
Die ligging van Kamtsjatka-krai in Rusland.
Die ligging van Kamtsjatka-krai in Rusland.
Politieke status
Land Russiese Federasie
Federale distrik Verre-Oosterse
Ekonomiese streek Verre-Oosterse
Stigting 1 Julie 2007
Regering
Hoofstad Petropawlofsk-Kamtsjatski
Leier Wladimir Iljoechin (waarnemend)
Amp Goewerneur
Wetgewer Wetgewende Raad
Bevolking
Sensus 2010
Totaal 322 079
Volgorde 76ste
Digtheid 0,68/km2
Stedelik 77,35%
Plattelands 22,65%
Statistiek
Oppervlakte 472 300 km2
Volgorde 10de
Tydsone UTC+12:00
Registrasienommer 91
Amptelike tale Russies
Webtuiste http://www.kamchatka.gov.ru/
Wapen en vlag

Portaal  Portaalicoon   Rusland

Kamtsjatka-krai (Russies: Камчатский край, Kamtsjatski krai) is ’n deelgebied van Rusland wat op 1 Julie 2007 ná ’n referendum gevorm is deur die samesmelting van Kamtsjatka-oblast en Korjak- Outonome Okroeg. Dit lê in die Verre-Oosterse Federale Distrik en die hoofstad is Petropawlofsk-Kamtsjatski. Dié stad is die tuiste van meer as die helfte van die krai se bevolking van 322 079 (2010).[1]

Die naam Kamtsjatka word ook gebruik vir die skiereiland waarop die krai geleë is.

Geografie[wysig | wysig bron]

Kamtsjatka-krai beslaan die Kamtsjatka-skiereiland, die aangrensende deel van die vasteland, die Karaginski-eiland en die Kommandeureilande. Dit word in die ooste begrens deur die Beringsee van die Stille Oseaan (’n kuslyn van meer as 2 000 km) en in die weste deur die See van Ochotsk (ook ’n kuslyn van sowat 2 000 km).

Bergreekse sluit in die Sredinni (sowat 900 km lank), Oosreeks (sowat 600 km lank), Wetweiski, Penzjinski, Pahatsjinski en Oljoetorski.

Skiereilande sluit in (kloksgewys van noordwes): Gawena, Ilpinski, Ozernoi, Kamtsjatska, Sjipoenski en Jelistratowa.

Eilande is (kloksgewys van noordwes): Werchotoerof, Karaginski, Kommandeureilande, Ptitsji, Konoes, Zoebtsjati, Rowni, Dobrzjanskowo, Ftoroi, Kraini en Treti. Al is die Koerile so na aan die krai, is hulle nie deel daarvan nie; hulle val onder Sachalin-oblast.

Kamtsjatka val in ’n sone van vulkane – daar is sowat 300 groot en mediumgroot vulkane, waarvan 29 aktief is. Kloetsjefskaja is die grootste vulkaan in Eurasië; dit is 4 750 m hoog.

Al lê Kamtsjatka op dieselfde breedtegraad as Skotland, is die klimaat hoofsaaklik subarkties – dit is meer kontinentaal in die binneland en meer maritiem aan die kus, met moesonwinde.

Natuur[wysig | wysig bron]

Kronotskoje-meer.
Kambalni-stratovulkaan.
Korjakski-vulkaan.
Die Korjakski-vulkaan toring bo Petropawlofsk-Kamtsjatski uit.

Die grootste deel van die skiereiland is bedek met goudberke, terwyl witelse en Siberiese dwergdennebome algemeen op groter hoogtes aangetref word. In sentrale gebiede, veral in die Kamtsjatkariviervallei, kom woude van lorke en sparre algemeen voor. Op vloedvlaktes groei woude van geurige populiere, else, Chosenia en Sachalin-wilgers. Daaronder word plante soos meidoring, kersiebome, Kamtsjatka-vlierbessies, Kamtsjatka-kanferfoelie, vleirosies en baie ander spesies aangetref.

Meer as 14,5% van die Kamtsjatka-streek word beskerm. Daar is onder meer ses bewaringsgebiede van federale belang, vier natuurparke van streeksbelang, 22 reservate en 116 natuurmonumente.

Die Kronotski-natuurreservaat is ’n natuurgebied aan die kus van die Kamtsjatka-skiereiland wat gereserveer word vir die studie van natuurwetenskap in die afgeleë Russiese Verre Ooste.[2] Dit is in 1934 geskep en beslaan tans ’n oppervlakte van 10 990 km2.[2] Dit bevat ook Rusland se enigste geiserbekken, asook verskeie bergreekse met talle vulkane wat óf aktief óf uitgedoof is. Vanweë die streek se dikwels strawwe klimaat en sy mengsel van vulkane en geisers, word dit dikwels beskryf as "die land van vuur en ys".[3]

Die reservaat is hoofsaaklik toeganklik vir wetenskaplikes, maar toeriste kan ook op helikoptervlugte gaan.[3] Unesco het die Kronotski-natuurresevaat tot ’n wêrelderfenisgebied verklaar.[4]

Demografie[wysig | wysig bron]

Oosters-Ortodoks
  
31.2%
Ortodoks (ander)
  
0.8%
Protestants
  
0.6%
Ander Christene
  
5.2%
Islam
  
1.2%
Inheemse gelowe
  
2.4%
Spiritueel, maar nie       godsdienstig
  
22.8%
Ateïsties
  
21.0%
Ander of geen
  
14.8%
Godsdiens in Kamtsjatka-krai

Etniese samestelling[wysig | wysig bron]

Volgens die 2010-sensus[1] is 85,9% van die bevolking Russe, 3,9% Oekraïners en 2,3% Korjakke. Ander etniese groepe (almal minder as 1%) is: Tatare, Itelmens, Belarusse, Ewens, Kamtsjadals, Tsjoektsji's en Koreane.

Altesaam 28 084 mense kon nie hulle etnisiteit verskaf nie; daar word aangeneem hulle verspreiding is dieselfde as dié wat wel hulle etnisiteit aangedui het.[5]

Ekonomie[wysig | wysig bron]

Grondstowwe sluit in steenkool, goud en aardgas. Die meeste mense woon in die hoofstad en werk hoofsaaklik in die vissery-, houtkap- en toerismebedryf asook vir die weermag. Daar is nog ’n groot militêre aanwesigheid op die skiereiland.

Verwysings[wysig | wysig bron]

  1. 1,0 1,1 Оценка численности населения на 1 января 2014 года и в среднем за 2013 год Geargiveer 19 Oktober 2015 op Wayback Machine (ru)
  2. 2,0 2,1 Encyclopædia Britannica (2009) Kronotsky Nature Reserve Geargiveer 25 Junie 2011 op Wayback Machine Encyclopædia Britannica, besoek op 12 Maart 2009
  3. 3,0 3,1 Quammen, David (2009) Fragile Russian Wilderness: The Kronotsky Nature Reserve Is Best Appreciated From Afar Geargiveer 16 Maart 2009 op Wayback Machine, National Geographic, p.62, Januarie 2009, Vol. 215, No.1
  4. Wild Russia: Centre For Nature Conservation website Geargiveer 7 Maart 2009 op Wayback Machine, besoek op 2009-03-11
  5. "Archived copy". Geargiveer vanaf die oorspronklike op Januarie 18, 2012. Besoek op Januarie 15, 2012.{{cite web}}: CS1 maint: archived copy as title (link)

Skakels[wysig | wysig bron]