Arras

in Wikipedia, die vrye ensiklopedie
Spring na: navigasie, soek

Arras • Atrecht
04-06-13 Arras 01.JPG

Kaart Wapen
Arras-Position.png
Blason ville fr Arras (Pas-de-Calais).svg
Vlag
Flag of None.svg
 Land Vlag van Frankryk Frankryk
 Région (gewes) Flag of Flemish Region (De Vlaamse Leeuw).svg Nord-Pas-de-Calais
 Département Pas de Calais Arms.svg Pas-de-Calais
 Koördinate 50°17′N 2°47′O
 Stigting
 Oppervlakte:  
 - Totaal 11,63 vk km
 Hoogte bo seevlak 52-99 m
 Bevolking:  
 - Totaal (2009) 42 049
 - Bevolkingsdigtheid 3 616/vk km
 - Metropolitaanse gebied 124 206
 Tydsone UTC +1
 - Somertyd UTC +2
 Burgemeester Frédéric Leturque (MoDem)
 Amptelike webwerf arras.fr

Arras (Nederlands: Atrecht) is die prefektuur (administratiewe hoofstad) van die Noord-Franse département Pas-de-Calais met 'n oppervlak van 11,63 vierkante kilometer en 42 000 inwoners (2009).

Geskiedenis[wysig]

Die Raadsaal van Arras met die kloktoring

Arras was oorspronklik 'n Keltiese nedersetting, wat later deur die Romeine tot die garnisoenstad Atrebatum uitgebou is. In die laat-antieke tydperk was Atrebatum 'n belangrike sentrum van die wolbedryf en sedert die 4de eeu ook die setel van 'n biskop.

Ná die Frankiese verowering van Gallië het Arras se belangrikheid afgeneem. In die 10de eeu is die stad by die graafskap Vlaandere ingelyf. Arras was die eerste stad in Vlaandere wat 'n vrybrief en ook die reg gekry het om self sy regters te kies.

Arras het eeue lank in die Frans-Nederlandse grensgebied gelê, en die stad het verskeie kere onder Franse en Nederlandse heerskappy gekom. Uiteindelik het die Franse argitek Sébastien Le Prestre de Vauban versterkings gebou, wat die Franse gehelp het om Arras definitief by Frankryk in te lyf.

Danksy bemiddelaars, wat Pous Eugenius IV en die Konsilie van Basel verteenwoordig het, is in 1435 die Vrede van Arras tussen Frankryk en Boergondië, 'n voormalige bondgenoot van Engeland in die Honderdjarige Oorlog, gesluit.

In ekonomiese opsig het Arras vir 'n lang tyd op die handel met Vlaandere gesteun. Later het die stad 'n landbousentrum vir suikerbeet geword, wat ook plaaslik verwerk is.

Arras het ook 'n belangrike sentrum van die Suid-Nederlandse wandtapytbedryf geword. Die produkte van die plaaslike fabrieke staan nog steeds as Arrazzi bekend.

Tydens die Eerste Wêreldoorlog het Arras digby die frontlyn gelê. In die Slag van Arras, wat deur die Duitsers ook die Loretto-slag genoem is, was Franse en Duitse troepe naby Souchez in hewige gevegte gewikkel. Noord van Arras, in die heuwellandskap naby Vimy, het ook Kanadese troepe in loopgrawe Duitse aanvalle afgeweer. Arras is gedurende die oorlog ernstig beskadig en later herbou.

Tydens die Tweede Wêreldoorlog is Arras deur Duitse troepe beset. 240 Franse, wat as lede van die weerstandsbeweging Résistance beskou is, is in die sitadel van Arras tereggestel.

Besienswaardighede[wysig]

Arras beskik oor twee groot pleine in sy middestad, die Grande Place en die Place des Héros, wat deur gerestoureerde historiese geboue omring word. Die ou stadskern met die Raadsaal in die Gotiese boustyl en die Laat-Gotiese katedraal van Arras is die belangrikste geboue, wat veral toeriste uit Nederland, Duitsland en die Verenigde Koninkryk lok.

Arras beskik ook oor 'n indrukwekkende kloktoring met klokkespel en 'n Museum vir Skone Kunste, wat deur die pragtige Benediktynse abdy van Saint-Vaast gehuisves word. Die museum vertoon 'n versameling van skilderye uit die 17de, 18de en 19de eeu, dekoratiewe kuns en 'n model van Arras.