Anglo-Zoeloe-oorlog

in Wikipedia, die vrye ensiklopedie
Spring na: navigasie, soek

Die Anglo-Zoeloe-oorlog is in 1879 tussen die Britse Ryk en die Zoeloe-koninkryk gevoer. Met Lord Carnarvon se suksesvolle instelling van 'n federasie in Kanada, is die idee gehuldig dat soortgelyke politieke pogings, gekoppel aan militêre veldtogte, moontlik suksesvol kan wees met die Afrika-ryke, stamgebiede en die Boererepublieke in Suid-Afrika. In 1874 is Henry Bartle Frere as hoëkommissaris vir die Britse Ryk gestuur om so 'n plan in Suid-Afrika te implementeer. Van die struikelblokke vir sy planne was die twee onafhanklike state van die Boererepublieke en die Zoeloe-koninkryk en sy leër  .[1]

Frere, wat op sy eie inisiatief, en sonder die goedkeuring van die Britse regering opgetree het,[2] en 'n  oorlog met die Zoeloes wou ontlok, gee op 11 Desember 1878 'n ultimatum aan die Zoeloekoning, Cetshwayo wat die koning nie kon nakom nie.[3] Bartle Frere stuur toe vir Frederick Augustus Thesiger, 2de Baron van Chelmsford na Zoeloeland.[4] Die oorlog is gekenmerk deur verskeie bloedige slagtings, insluitende 'n verrassende oorwinnig vir die Zoeloekrygers by Slag van Isandlwana, asook as 'n baie belangrike tydperk in die tydlyn van imperialisme in die gebied. 

Agtergrond[wysig | wysig bron]

Britse Ryk[wysig | wysig bron]

Teen die 1870's het die Britse Ryk kolonies in suider-Afrika gehad wat gegrens het aan die Boere-nedersettings, inheemse Afrika-koninkryke, soos die Zoeloes, en ander inheemse stamgebiede. Verskeie interaksies met van hierdie gebiede was deel van 'n beleid van ekspansionisme. Die Kaapkolonie is gestig met die Anglo-Nederlandse Verdrag van 1814 wat die Nederlandse kolonie van Kaapstad aan Brittanje oorgedra het. Die Britte se gebiede is in die 1800's aansienlik uitgebrei. Natal (kolonie) is op 4 Mei 1843 geproklameer as 'n Britse kolonie met die Britse regering se anneksasie van die Boere se Natalia Republiek. Die toestande is tot op 'n punt gedryf toe drie seuns en 'n broer van die Zoeloe-hoofman Sirayo invalle in Natal geloods het en twee vroue onder Britse beskerming ontvoer het.  

Die ontdekking van diamante in 1867 naby die Vaalrivier, sowat 890 kilometers noordoos van Kaapstad, was die einde van die Boere se isolasie in die binneland, en het die Suid-Afrikaanse geskiedenisse landskap verander. Die ontdekking het 'n wêreldwye diamantstormloop onteketen wat Kimberley in 'n kwessie van vyf jaar omskep het in 'n dorp van 50 000 inwoners. Die diamante het die Britse imperialiste se aandag baie vinnig getrek. In die 1870's annekseer Brittanje Griekwaland-Wes vir die gronde waar Kimberley se diamantvelde lê.

Lord Carnarvon Britse sekretaris van buitelandse sake belas met die kolonies het geglo dat die federasie wat hy in 1876 in Kanada tot stand gebring het, ook in Suid-Afrika kan werk. Sy plan sou bestaan uit 'n wit minderheidsregering wat oor 'n onderdrukte swart meerderheid sou heers. Dit het 'n groot arbeidsmag van goedkoop handearbeid vir die Britse suikerplantasies en myne gewaarborg.[5] In 'n poging om die Britse invloed verder uit te brei nader Carnarvon in 1875 die Boerestate van Oranje-Vrystaat en de Zuid-Afrikaansche Republiek (Transvaal) en probeer om 'n federasie van die Britse en Boere se grondgebied te stig, maar die Boereleiers het vir hom die deur gewys.

In 1877 word Sir Henry Bartle Frere deur Carnarvon as die hoëkommissaris van Suider-Afrika aangestel. Carnarvon het hom met die doel aangestel om sy konfederasie-planne in werking te stel. In ruil hiervoor sou Frere die eerste Britse goewerneur van so 'n federasie van 'n Suider-Afrika dominium aangestel word. Frere se grootste struikelblokke was die twee Boererepublieke en die Zoeloe Ryk. Frere het nie op hom laat wag nie en beraam toe sy slinkse plan teen die Zoeloes deur 'n paar voorvalle buite verband op te blaas.[6]

In 1877 annekseer Sir Theophilus Shepstone, die Britse sekretaris van naturellesake in Natal, die Zuid-Afrikaansche Republiek, ingevolge 'n spesiale lasbrief. Die Transvaalse Boere het beswaar gemaak, maar terwyl die Zoeloe-bedreiging bestaan het, was hulle tussen twee bedreigings vasgevang. Hulle was bang as hulle die wapens opneem teen die Britse anneksasie, kan Koning Cetshwayo die situasie uitbuit en hulle aanval. Die daaropvolgende anneksasies, en in besonder die anneksering van Griekwaland-Wes, het 'n klimaat van broeiende ongemaklikheid by die Boererepublieke geskep.

In sy hoedanigheid as Brtise goewerneur van Natal, het Shepstone sy kommer uitgespreek oor die Zoeloe-leër van Cetshwayo en die potensiële bedreiging wat dit vir Natal inhou- veral in die lig van ou voorlaaiers en ander uitediende vuurwapens wat in die Zoeloes se hande beland het. In sy nuwe rol as administrateur van Transvaal was Shepstone nou verantwoordelik vir die beskerming van die gebied en het 'n regstreekse belang by die grensgeskil van die Zoeloes en die Boere gehad. Voorvalle van Zoeloe-aanvalle aan albei kante van die Transvaal/Natal grens, het Shepstone laat besluit dat Cetshwayo 'n uitdagende houding inslaan.

Die Natalse biskop, John Colenso, was die kampvegter vir die regte van die boorlinge van Natal en Zoeloeland en het geglo dat die mens onregverdige behandel word deur die koloniale regering van Natal. In 1874 gaan bekla hy die lot van Langalibalele, en die Hlubi en Ngwe-stamme by Carnarvon. In sy voorlegging sê Colenso dat Langalibalele valslik in 1873 van 'n rebellie beskuldig is, en daarna in 'n belaglike hofsaak skuldig bevind en na Robbeneiland gestuur is. Die feit dat Colenso Langalibalele se kant teen die koloniale bewind van Natal gekies het, en sy lot aan die sekretaris van naturellesake, Theophilus Shepstone gaan voorlê het, het hom nog verder van die koloniale gemeenskap in Natal vevreem. 

Bisop Colenso was 'n promimente kritikus van Frere se pogings om die Zoeloe Ryk  as 'n bedreiging vir Natal voor te hou. Colenso se se veldtog het die donker, rassistiese grondslag van die koloniale bewind in Natal ontbloot en vir hom baie vyande onder die koloniste gemaak.  

Die Britse eerste minister, Benjamin Disraeli, se regering wou nie 'n oorlog met die Zoeloes hê nie. Sir Bartle Frere was toe al sedert 1877 in die Kaapkolonie waar hy as goewerneur en hoë-kommissaris reeds ver gevorder het met sy opdrag om 'n federasie in Suid-Afrika te stig. Hy het geglo die Zoeloes staan in die pad van so 'n federasie en Shepstone het sy siening gedeel dat Koning Cetshwayo die vrede in die gebied bedreig. Die voorbereiding vir 'n Britse inval van die Zoeloe Ryk was reeds vir maande aan die gang. Ondanks die Britse regering se onwilligheid om in nog 'n konflik betrokke te raak, stuur Frere in Desember 1878 'n ultimatum aan Cetshwayo om sy gevegsmagte te ontbind en hulle aan Britse gesag onderwerp. Dit was, vanselfsprekend onaanvaarbaar vir die Zoeloes, want dit sou beteken dat Cetshwayo sy troon moes prysgee. 

Zoeloe Ryk[wysig | wysig bron]

Foto van Cetshwayo kaMpande- 1875

Shaka Zoeloe, die eerste Zoeloekoning het met oorlog en verowering die klein Zoeloestam tot 'n Zoeloe Ryk uitgebou wat teen 1825 'n gebied van 30 000 vierkante kilometer beslaan het. Hy is in 1828 deur een van sy Indoenas en twee van sy halfbroers by Dukuza doodgemaak. Een van die halfbroers, Dingaan, het vir Shaka as koning opgevolg. Hy is op 1 Desember 1838 met die Slag van Bloedrivier, deur die Voortrekkers verslaan. Dingaan het gevlug, maar is ook doodgemaak. Mpande het hom as koning opgevolg. Toe hy in 1877 op 'n hoë ouderdom sterf, het Cetshwayo by Mpande oorgeneem.

Cetshwayo wou nie oorlog maak nie en wou die oorlog met die Britte vermy. Hy het sy troepe opdrag gegee om hul land te verdedig en die oorlog nie oor die grense te voer nie. Sy opdrag was om hulself net te verdedig as hulle aangeval word en om net Britse soldate met hul rooi uniforms dood te maak.

Britse inval en terugslae[wysig | wysig bron]

Die Slag van Isandlwana- skildery deur Charles Edwin Fripp (1854-1906)

In Januarie 1879 val die Britse mag, onder aanvoering van Lt.-Gen. Frederick Augustus Thesiger, 2de Baron Chelmsford, vir Zoeloeland in- sonder enige goedkeuring van die Britse regering.[2][7]

Lord Chelmsford het sy invalsmag van Pietermaritzburg na Helpmekaar naby Greytown verskuif en op 9 Januarie 1879 na Rorke's Drift beweeg. Daarvandaan die Buffelsrivier oorgesteek en die Zoeloe-koninkryk binnegeval.[8] Drie eenhede het uit die Laer-Tugela, Rorke's Drift en Utrecht inbeweeg met die gemeenskaplike teiken, die koninklike setel, Ulundi.

Hoewel Cetshwayo se gevegsmag uit sowat 35 000 man bestaan het was dit hoofsaaklik 'n burgermag wat opgeroep kon word in gevalle van nasionale gevaar.[lower-alpha 1] Sy mag het baie beperkte logistieke vermoëns gehad en kon net vir 'n paar weke in die veld bly voordat hulle moes terugkeer na hul burgerlike pligte.[9] [lower-alpha 2][10]

Aanvanklik het die oprukkende Britse magte geen weerstand ondervind nie, en op 22 Januarie slaan die middelste flank, van Rorke's Drift af, kamp op by Isandlwana. Daardie oggend deel Lord Chelmsford sy magte op en beweeg uit om 'n verkenningseenheid te gaan ondersteun, en laat die bevel oor aan Kol. Pulleine. Die Britte is deur die Zoeloemag van sowat 20 000 krygers uitoorlê en Chelmsford is ooswaarts saam met die meeste van sy middelste flank deur 'n klein Zoeloe-eenheid werggelok terwyl die impi die hoofkamp aanval. Die Slag van Isandlwana was die grootste oorwinning van die Zoeloes tydens die oorlog. Die Britse eenheid is verwoes en sy kamp uitgewis. Die Britte het ook al hul voorade, ammunisie en vervoer verloor. Chelmsford het geen keuse gehad nie en moes inderhaas uit Zoeloeland terugval. In die doodsnikke van die slag het 4 000 Zoeloe-reserwemagte 'n ongemagtigde aanval op 'n Britse grenspos geloods en in die bloedige 10-uur-lange Slag van Rorke's Drift het die Britse magte daarin geslaag om die aanvallers terug te dryf.

Zoeloekrygers, 1879 (Charles Edwin Fripp)

Terwyl die Britse middelste eenheid onder die aanvoering van Chelmsford in gevegte betrokke was, het die regterflank kuslangs, onder die bevel van Kol. Charles Pearson, die Tugelarivier oorgesteek en in gevegte betrokke geraak met 'n Zoeloe-impi wat 'n hinderlaag by die Inyezane-rivier wou gaan opstel. Toe Pearson hoor van die slag by Isandlwana wou hy weer terugval oor die Tugela-rivier, maar nog voor hy die besluit kon neem is sy toevoerlyne deur die Zoeloes afgesny, en die Beleg van Eshowe het begin.

Intussen moes die linkerflank by Utrecht onder aanvoering van Kol. Evelyn Wood, die Zoeloestamme van noordwes-Zoeloeland aandurf en verhoed dat hulle die middelste eenheid se opmars na Ulundi kan stuit. Hy het beplan om die Zoeloemag van 4 000 krygers, wat by die Hlobane-berg saamgetrek het, op 24 Janaurie aan te val, maar toe hy hoor van Isandlwana het hy teruggetrek. Dus, een maand na die Britse inval, is dit net die linkerflank wat militêr aktief was, maar te swak is om op sy eie met die veldtog voort te gaan. Die eerste inval in Zoeloeland was 'n neerlaag vir die Britte.[lower-alpha 3]

Die Slag van Intombe-rivier

Cetshwayo wou nooit Natal binneval nie en wou sy gevegte binne die grense van die Zoeloe Ryk gehou het. In die daaropvolgende twee maande hergroepeer Chelmsford en die Britste regering stuur inderhaas nog sewe regimente en twee artillerie-eenhede na Natal.

Op 12 Maart word 'n gewapende konvooi voorrade op pad Luneberg toe deur sowat 500 Zoeloes in die Slag van Intombe oorweldig; waartydens 80 Britse soldate sneuwel[lower-alpha 4] en al die voorrade gebuit word. Die eerste troepe kom op 7 Maart in Durban aan. Op 29 Maart ruk Chelmsford met 3 400 Britse soldate en 2 300 inheemse soldate op en ontset Eshowe.

Chelmsford beveel Sir Evelyn Wood se troepe om die abaQulusui Zoeloe-vesting in Hlobane aan te val. Lt.Kol. Redvers Henry Buller lei op 28 Maart die aanval. Toe die 20 000 soldate van die Zoeloes se leër opmars om hul beleërde stamlede te help, val die Britse mag terug met 1 000 Zoeloes van die abaQulusui op hul spoor. Sowat 225 Britse soldate sneuwel.

Die volgende dag val 20 000 Zoeloekrygers[lower-alpha 5] Wood se 2 068 man in hul goed gefortifiseerde kamp by Kambula aan. Dit was blykbaar sonder Cetswhayo se toestemming. Die Britte veg terug met die Slag van Kambula, en na vyf ure se bloedige stryd slaan die Zoeloes op die vlug met 'n Britse berede mag op hul hakke. Terwyl 28 Brittte in die slag sneuwel, was die dodetal aan die kant van die Zoeloes meer as 2 000.[lower-alpha 6] Die slag het die Zoeloes 'n lelike knou gegee en hul moraal was so swak dat baie eenvoudig opgepak en huis toe gegaan het.[11]

Ulundi afgebrand

Met Woods aan die veg het Chelmsford se mag Eshowe toe beweeg. Op 2 April word hulle by Gingindlovu aangeval, maar die Zoeloes word teruggejaag. Die volgende dag word Pearson en sy manne ontset en Eshowe ontruim waarna die Zoeloes dit afbrand.

Tweede inval en die oorwinning oor die Zoeloes[wysig | wysig bron]

Die Laaste Rusplek van die Dapperes- 1879, Alphonse de Neuville.

Die nuwe begin van die groter, beter toegeruste tweede inval[lower-alpha 7] was nie juis 'n verbetering nie. Ondanks die suksesse by Kambula, Gingindlovu en Eshowe, was die Britse mag weer terug waar hulle aan die begin van Januarie afgeskop het. Chelmsford het 'n goeie rede gehad om vinnig te beweeg aangesien Sir Garnet Wolseley op pad was om by hom oor te neem, en hy wou baie graag 'n beslissende oorwinning oor Cetshwayo hê voor hy die leisels moet oorgee. Daar was uiteindelik 16 000 Britse troepe en 7 000 inheemse troepe vir die opmars. Dit begin in Junie en hierdie keer bou die Britte gefortifiseerde kampe al die pad soos hulle beweeg om 'n herhaling van Isandlwana te verhoed.

Een van die eerste ongevalle was Napoléon Eugène Louis Bonaparte, die uitgeweke troonopvolger van die Franse kroon wat as vrywilliger by die Britse leër aangesluit het. Hy is op 1 Junie dood terwyl hy met 'n verkenningseenheid in die veld was. 

Cetshwayo het geweet hy gaan dié keer teen 'n meer gedugte vyand moet veg, en het probeer om vir 'n vredesverdrag te onderhandel. Chelmsford was nie lus vir praat nie en hy wou sy verlore eer herstel voor Wolseley kom oorvat. Die opmars na Cetshwayo se kraal by Ulundi het aangegaan en op 4 Julie begin die Slag van Ulundi waartydens Cethwayo se gevegsmag die finale nekslag toegedien word.

Nabetragting[wysig | wysig bron]

Na die slag van Ulundi is die Zoeloemag uiteen gedryf, die meeste hoofmanne het oorgegee en Cetshwayo het gevlug. Wolseley het na Ulundi die bevel by Chelmsford oorgeneem en die finale operasies hanteer. Op 28 Augustus is die Zoeloekoning gevang en na Kaapstad gestuur.   Wolseley het nie op hom laat wag nie en Frere se konfederasieplan opgeskort en 'n nuwe plan opgestel waarvolgens Zoeloeland in 13 stamgebiede opgedeel is sodat daar nie weer onder 'n koning herenig kan word nie. 





Laaste veterane[wysig | wysig bron]

  • Colour Sergeant (later Lieutenant-Colonel) Frank Bourne, DCM (1854–1945). Last survivor of Rorke's Drift.[12]
  • Private Charles Wallace Warden (died 8 March 1953)
  • Henry "Harry" Figg R.N. (died 23 May 1953)[13]

Anglo-Zoeloe-oorlog in rolprente[wysig | wysig bron]

Twee gedramatiseerde rolprente oor die oorlog is:

  • Zulu (1964), gegrond op die Slag van Rorke's Drift, en
  • Zulu Dawn (1979), wat handel oor die Slag van Isandlwana.

Monty Python's The Meaning of Life (1983) skets die komediese sy van die oorlog waar mans in tierpakke die been van 'n Britse soldaat steel. 

Lees ook[wysig | wysig bron]

Notas en verwysings[wysig | wysig bron]

  1. Knight (1992, 2002), p. 8.
  2. 2,0 2,1 Spiers 2006, p. 41.
  3. Colenso 1880, pp. 261–262.
  4. Morris 1998, pp. 291–292.
  5. Gump 1996, pp. 73-93.
  6. Gump 1996, p. 91.
  7. Knight 2003, p. 9.
  8. Giliomee & Mbenga 2007.
  9. Knight 2005, p. 8.
  10. Lock & Quantrill 2002, p. 62.
  11. Knight 1995, p. 142.
  12. "The Rorke's Drift VC Discussion Forum". rorkesdriftvc.com. 15 December 2001. Verwysingfout: Invalid <ref> tag; name "rorkesdriftvc" defined multiple times with different content Verwysingfout: Invalid <ref> tag; name "rorkesdriftvc" defined multiple times with different content
  13. Henry "Harry" Figg at Find a Grave Verwysingfout: Invalid <ref> tag; name "findagrave" defined multiple times with different content Verwysingfout: Invalid <ref> tag; name "findagrave" defined multiple times with different content

Buiteskakels[wysig | wysig bron]


Verwysingfout: <ref> tags exist for a group named "lower-alpha", but no corresponding <references group="lower-alpha"/> tag was found, or a closing </ref> is missing