Bangka

in Wikipedia, die vrye ensiklopedie
Jump to navigation Jump to search
Bangka
Inheemse naam: Pulau Bangka
Topografiese kaart van Seram
Topografiese kaart van Seram
Geografie
ID - Bangka.png
Ligging Suidoos-Asië
Koördinate 2°15′S 106°0′O / 2.250°S 106.000°O / -2.250; 106.000Koördinate: 2°15′S 106°0′O / 2.250°S 106.000°O / -2.250; 106.000
Argipel Maleise argipel

Oppervlakte 11 693,54 vk km
Hoogste punt Berg Maras 699 m
Administrasie
Vlag van Indonesië Indonesië
Provinsies Pangkal Pinang, Bangka-regentskap, Sentraal-Bangka, Suid-Bangka, Wes-Bangka

Grootste stad Pangkal Pinang (134 082)

Demografie
Bevolking 960 692

Bevolkingsgroepe Maleiers, Han-Chinese, Hakka

Bangka of Banka (Indonesies: Pulau Bangka) is, na die vier Groot Soenda-eilande (Borneo, Soematra, Sulawesi en Java), die grootste eiland in die weste van die eilandnasie Indonesië, maar word egter nie as deel van die Groot Soenda-eilande beskou nie. Bangka lê langs die ooskus van Soematra net suid van die ewenaar; net oos is Belitung geleë. Bangka grens aan die Suid-Chinese See in die noorde en die Javasee in die suidooste. Verder noord is Maleisië en Singapoer geleë.

Visserbote op Bangka

Bangka beslaan 'n oppervlakte van 11 693,54 km² en het 'n bevolking van 960 692 in 2010 gehad. Van die etniese groepe op die eiland sluit in Maleiers, Han-Chinese en Hakka.

Bangka is in die Karimata-straat, wat die Suid-Chinese See met die Javasee verbind en Borneo van Soematra skei, geleë. Tydens die glasiale tyd het Bangka saam met die groter eilande Borneo, Soematra en Java deel van die Soendaplat gevorm, maar nadat die seevlak gestyg het, het dit 'n eie eiland begin word.

Weens sy strategiese ligging tussen die Britse kolonies in die noorde en die Nederlandse kolonies in die suide het Bangka 'n twisappel tussen albei lande geword. Die Verenigde Oos-Indiese Kompanjie het in 1722 'n monopolistiese tinkoopooreenkoms met die sultan van Palembang gesluit, maar tussen die sultan en die Nederlanders het vyandelikhede begin ontwikkel. Tydens die Britse inval in Java in 1811 (gedurende die Napoleontiese Oorloë in Europa) het die destydse sultan Mahmud Badaruddin die Nederlandse personeel van die Nederlandse handelspos aangeval en uitgemoor. Hy is later deur die Britte afgesit en toe tereggestel. Sy opvolger het Bangka in 1812 aan die Verenigde Koninkryk afgestaan, maar na die sluiting van die Anglo-Nederlandse verdrag in 1814 het die Britte Bangka met die Nederlanders vir Cochin in Indië verruil. Tot Indonesië se onafhanklikheid van Nederland het dit tot Nederlands-Indië behoort.

Eksterne skakels[wysig | wysig bron]

  • Wikimedia Commons logo Wikimedia Commons het meer media in die kategorie Bangka.
  • (en) "Bangka". Encyclopædia Britannica. Besoek op 27 April 2020.