Krieketwêreldbeker 2031

Die artikel beskryf ’n sportgebeurtenis wat in die toekoms gaan plaasvind. Die inligting is moontlik spekulatief en kan vinnig verander soos data beskikbaar raak.

Krieketwêreldbeker 2031

Die IKR-trofee waarom meegeding sal word
Bestuurder	Internasionale Krieketraad (IKR)
Krieketformaat	Internasionale eendagkrieket (EDI)
Toernooiformaat	Groep- en uitklopfase
Gashere	Indië  Bangladesj
Deelnemers	14
Wedstryde gespeel	54
← 2027 2035 →

Die Krieketwêreldbeker 2031 (Engels: 2031 Cricket World Cup), amptelik bekend as die IKR Krieketwêreldbeker 2031, sal in 2031 in Indië en Bangladesj aangebied word. Dit sal die 15de krieketwêreldbeker in internasionale eendagkrieket (EDI) wees wat deur die Internasionale Krieketraad (IKR) aangebied word en die vyfde op die Indiese subkontinent. In dié streek is voorheen die toernooie van 1987, 1996, 2011 en 2023 aangebied.

14 nasionale krieketspanne neem aan die Krieketwêreldbeker 2031 deel, waartydens 54 wedstryde gespeel word. Die spanne word in twee groepe van sewe spanne elk verdeel, waarvan die boonste drie spanne van elke groep vir die Super Ses kwalifiseer. Van die Super Ses kwalifiseer die boonste vier spanne vir die halfeindrondte. Elke wedstryd bestaan uit 50 boulbeurte per span. ’n Soortgelyke formaat is voorheen tydens die Krieketwêreldbeker 1999, Krieketwêreldbeker 2003 en Krieketwêreldbeker 2027 aangewend.

Toewysing

Die Internasionale Krieketraad het die gasheerlande van beide die 2027- en 2031-manstoernooie op 16 November 2021 aangewys. Suid-Afrika, Zimbabwe en Namibië is as gashere vir die 2027-toernooi benoem, terwyl die 2031-toernooi aan Indië en Bangladesj toegeken is.

Wedstryde

In twee groepe van sewe spanne elk speel elke span een keer teen al die ander spanne wedstryde; vir ’n oorwinning word vier punte, terwyl vir ’n gelykop of geen uitslag twee punte toegeken word. Die drie boonste spanne van elke groep kwalifiseer vir die Super Ses. In die Super Ses-rondte speel elke span teen die spanne, waarteen in die groepfase geen wedstryde gespeel is nie. Spanne wat alreeds in die groepfase ontmoet het, speel nie teen mekaar nie en die punte van dié wedstryde word na die Super Ses-rondte se tabel oorgedra. Die vier beste spanne van die Super Ses vorder tot die halfeindrondte en die twee wenners van die halfeindrondte speel die eindstryd. Altesaam 54 wedstryde word gespeel, waarvan 42 tydens die groepfase, nege in die Super Ses, en drie in die uitklopfase, insluitende die eindstryd.

Sien ook

• Rugbywêreldbeker 2031

Eksterne skakels

• (en) Amptelike webwerf van die Krieketwêreldbeker 2031
• (en) Amptelike webtuiste van die Internasionale Krieketraad