Krieketwêreldbeker 2023

Die artikel beskryf ’n sportgebeurtenis wat in die toekoms gaan plaasvind. Die inligting is moontlik spekulatief en kan vinnig verander soos data beskikbaar raak.

Krieketwêreldbeker 2023

Die IKR-trofee waarom meegeding sal word
Datums	Oktober – 26 November
Bestuurder	Internasionale Krieketraad (IKR)
Krieketformaat	Internasionale eendagkrieket (EDI)
Toernooiformaat	Groep- en uitklopfase
Gashere	Indië
Deelnemers	10
Wedstryde gespeel	48
← 2019 2027 →

Die Krieketwêreldbeker 2023, amptelik bekend as die IKR Krieketwêreldbeker 2023, sal vanaf Oktober tot en met 26 November 2023 in Indië plaasvind. Die oorspronklike datums vir dié toernooi was tussen 9 Februarie tot 26 Maart 2023, maar in Julie 2020 is dit na Oktober en November 2023 herskeduleer, nadat die kwalifisering weens die wêreldwye Covid-19-pandemie vertraag is. Dit sal die 13de krieketwêreldbeker in internasionale eendagkrieket (EDI) wees wat deur die Internasionale Krieketraad (IKR) aangebied word en die vierde in Indië. Dié land het voorheen as medegasheer van die toernooie in 1987 (saam met Pakistan), 1996 (saam met Pakistan en Sri Lanka) en 2011 (saam met Bangladesj en Sri Lanka) opgetree; net Engeland het meer toernooie gehuisves. Dit sal die eerste toernooi wees wat geheel en al in Indië aangebied word en net die derde wat deur een gasheerland gehou sal word; die eerste twee toernooie in 1975 en 1979 is deur Engeland alleenlik gehuisves.

Tien nasionale krieketspanne sal aan die Krieketwêreldbeker 2023 kan deelneem, waartydens 48 wedstryde beslis sal word. Die eerste bal word iewers in Oktober geboul; maar die presiese datum is nog nie bekend nie. Al die spanne sal in een groep speel en 45 wedstryde beslis, waarvan elke span een keer teen al die ander spanne van die groep sal speel. Die boonste vier spanne sal hierna vir die halfeindrondte van twee wedstryde kwalifiseer, waarna albei wenners op 26 November in die eindstryd ontmoet. ’n Soortgelyke formaat is voorheen tydens die Krieketwêreldbeker 1992 en die vorige Krieketwêreldbeker 2019 aangewend.

Die Internasionale Krieketraad het voor die Krieketwêreldbeker 2015 aangekondig dat net tien van die vernaamste krieketnasies aan die volgende toernooie van 2019 en 2023 sal kan deelneem. Dit het groot kritiek uitgelok, omdat veral die geassosieerde lede van die IKR vrees dat die afstand in kwaliteit tussen hulle en die voorste toetskrieketlande groter sal word. Die IKR se redenasie vir hierdie stap is egter ’n beter bemarkingsmoontlikheid van die kompetisie, want al die spanne sal dan mededingend wees.

Toewysing

Tydens ’n spesiale vergadering van die Internasionale Krieketraad in Junie 2013 in Londen is die Krieketwêreldbeker 2023 aan Indië toegewys.

Deelnemers

Kwalifisering

Grafiek van die kwalifiseringsproses vir die Krieketwêreldbeker 2023

Soos tydens die Krieketwêreldbeker 2019 mag tien krieketspanne aan die Krieketwêreldbeker 2023 deelneem. Die hoofroete tot kwalifikasie sal die nuwe Superliga wees, wat die EDI-kampioenskap vervang. Aan die Superliga, wat vanaf Julie 2020 tot Maart 2022 uitgespeel sal word, neem die twaalf toetsnasies (insluitende die gasheer Indië) en Nederland deel.

Die gasheer Indië en die boonste sewe spanne van die dertien deelnemers in die Superliga sal outomaties vir die finale toernooi kwalifiseer. Die vyf spanne van die Superliga, wat nie daarin geslaag het om direk vir die toernooi te kwalifiseer nie, sal aan die Krieketwêreldbekerkwalifikasie 2022 deelneem, waarna twee spanne na die finale toernooi gaan.

Aan die Krieketwêreldbekerkwalifikasie 2022 neem, naas die vyf onderste spanne van die Superliga, ook die drie beste spanne van die vir die eerste keer uitgespeelde Krieketwêreldbekerliga 2 2019–2022 (gehou tussen Augustus 2019 en Januarie 2022) deel. Die oorblywende twee plekke vir die kwalifikasie sal deur ’n uitspeeltoernooi tussen die Krieketwêreldbekerliga 2 se niekwalifiserende spanne en die Krieketwêreldbekeruitdagingsliga 2019–2021 se twee beste spanne bepaal word. Aan die Krieketwêreldbekerliga neem die oorblywende sewe lande met ’n tydelike EDI-status deel (Nederland neem tans aan die Superliga deel).

Deur die die Krieketwêreldbeker Superliga 2020–2022 sal die volgende agt spanne vir die Krieketwêreldbeker 2023 kwalifiseer:

Indië (neem ook aan die Superliga 2020–2022 deel) Eerste van die Superliga 2020–2022 Tweede van die Superliga 2020–2022 Derde van die Superliga 2020–2022

Vierde van die Superliga 2020–2022 Vyfde van die Superliga 2020–2022 Sesde van die Superliga 2020–2022 Sewende van die Superliga 2020–2022

Deur die Krieketwêreldbekerkwalifikasie 2022 sal die volgende twee spanne vir die Krieketwêreldbeker 2023 kwalifiseer:

Eerste van die kwalifikasie 2022

Tweede van die kwalifikasie 2022

Kwalifiserende spanne

Die volgende span het al vir die Krieketwêreldbeker 2023 gekwalifiseer. Later sal nog nege spanne aansluit.

Span	Kwalifiseringmetode	Verskynings by eindstryde	Laaste verskyning	Vorige beste prestasie
Indië	Gasheer	13de	2019	Kampioen (1983, 2011)

Wedstryde

In een enkele groep met tien spanne sal elke span een keer teen al die ander spanne wedstryde beslis; vir ’n oorwinning sal twee punte, terwyl vir ’n gelykop of geen uitslag een punt toegeken sal word. Die vier boonste spanne van die groep sal vir die halfeindrondte kwalifiseer, waarvan albei wenners tot die eindstryd vorder. Altesaam 48 wedstryde sal beslis word, waarvan 45 tydens die groepfase en drie in die uitklopfase, insluitende die eindstryd. ’n Soortgelyke formaat is voorheen tydens die Krieketwêreldbeker 1992 gebruik, maar destyds het nege in plaas van tien nasionale krieketspanne deelgeneem; en tydens die vorige Krieketwêreldbeker 2019 is dieselfde formaat aangewend.

Die uitklopfase sal uit twee halfeindwedstryde bestaan, waarvan die twee wenners in die eindstryd sal ontmoet. Engeland is die verdedigende kampioen nadat hulle die vorige Krieketwêreldbeker 2019, teen Nieu-Seeland in die nouste eindstryd nog (’n amptelike gelykop), tuis gewen het.

Sien ook

• Rugbywêreldbeker 2023

Eksterne skakels

• (en) Amptelike webwerf van die Krieketwêreldbeker 2023
• (en) Amptelike webtuiste van die Internasionale Krieketraad