Reebok

in Wikipedia, die vrye ensiklopedie
Jump to navigation Jump to search
Reebok
Klein-Brak
Klein-Brak
Ligging van Reebok op 'n kaart (Wes-Kaap)
Reebok
Reebok
 Reebok se ligging in Wes-Kaap
Koördinate: 34°5′16″S 22°8′52″O / 34.08778°S 22.14778°O / -34.08778; 22.14778Koördinate: 34°5′16″S 22°8′52″O / 34.08778°S 22.14778°O / -34.08778; 22.14778
Land Vlag van Suid-Afrika Suid-Afrika
Provinsie Wes-Kaap
Distrik Eden
Munisipaliteit Mosselbaai
Oppervlak[1]
 - Dorp 3,45 km²  (1,3 vk m)
Bevolking (2011)[1]
 - Dorp 2 037
 - Digtheid 590/km² (1 528,1/myl2)
Rasverdeling (2011)[1]
 • Blank 67.9%
 • Indiër/Asiër 0.2%
 • Kleurling 25.7%
 • Swart 5.7%
 • Ander 0.4%
Taal (2011)[1]
 • Afrikaans 85.0%
 • Engels 12.6%
 • Ander 2.3%
Poskode (strate) 6503

Reebok is 'n strandoord aan die Suid-Kaapse kus geleë tussen Groot- en Klein-Brakrivier.

Toe die spoorlyn tussen Mosselbaai en George gebou is, het 'n stuk duingrond van die plaas Rheeboksfontein tussen die see en die spoor kom te lê. Weens die ongerief hieraan verbonde was die eienaar bereid om dit te verkoop. Twintig morg is in 1911 vir 50 pond aan 10 boere van Oudtshoorn as 'n vakansieoord verkoop. Van die begin af het die eienaars van Strand Rust probleme gehad met 'n goeie toegangsroete oor die duine en met drinkwater. Alles wat nodig was vir 'n vakansie moes aangery word “. …’n slagskaap of twee, 'n fuik hoenders en 'n kalkoen (lewendig) saamgeneem strand toe. Soms moes 'n koei ook aangejaag word van Oudtshoorn … Dit het soms twee dae geneem om die koei op Reebok te kry”, aldus Hazel le Roux. Na 1957 is die grond bokant die spoor ontwikkel as Reebok. In 1965 is beide oorde saam as dorpsgebied verklaar onder die naam Reebok en het die naam Strand Rust verdwyn.

Die munisipaliteit van Mosselbaai het water aangelê en vanaf 1976 is elektriese krag verskaf en in dieselfde jaar is 'n gemeenskapsaal gebou. Reebok beskik sedert daardie tyd ook oor sy eie brandweerwa. Reebok en sy buuroord Tergniet se strande is baie rotsagtig. Daar is mooi poele met mossels, seekatte, krappe en visse. Van die planne om rotse weg te skiet om oop strand te skep het niks gekom nie. Afstammelinge van die aanvanklike boere van Oudtshoorn soos die Le Rouxs en De Jagers is nog vakansietye daar. Selfs die Volksraadslid vir Oudtshoorn, Piet Badenhorst, en die President van die Senaat, kommdt. Chris van Niekerk, het daar vakansies deurgebring.

Baie ontwikkeling het sedert die sewentigerjare van die vorige eeu aan hierdie kusstrook plaasgevind. Reebok het al hoe meer permanente inwoners gekry en saam met Klein-Brakrivier, Tergniet en Fraaiuitsig tot woonbuurte van Mosselbaai ontwikkel.

Verwysings[wysig | wysig bron]

  1. 1,0 1,1 1,2 1,3 "Hoofplek Reebok". Sensus 2011. 

Bibliografie[wysig | wysig bron]

  • Le Roux, Hazel: Die verhaal van Reebok. Uitgegee deur die skryfster, 1991.