Wakkerstroom

Wakkerstroom
Dorp
Wakkerstroom  Wakkerstroom se ligging in Mpumalanga
Koördinate: 27°21′S 30°08′O
Land	Suid-Afrika
Provinsie	Mpumalanga
Distrik	Gert Sibande
Munisipaliteit	Pixley ka Seme
Stigting	1859
Oppervlak
• Totaal	87,68 km2 (33,85 vk. myl)
Bevolking  (2011)
• Totaal	6 852
• Digtheid	78/km2 (200/vk. myl)
Rasverdeling (2011)
• Wit mense	10.2%
• Indiërs/Asiërs	1.3%
• Bruin mense	0.3%
• Swart mense	87.8%
• Ander	0.4%
Taal (2011)
• Zoeloe	86.2%
• Engels	4.2%
• Afrikaans	3.7%
• Ndebele	1.6%
• Ander	4.2%
Poskode (strate)	2480
Poskode (posbusse)	2480
Skakelkode	017
Webwerf	http://www.wakkerstroom.info

Die vorige NG kerkgebou op Wakkerstroom het reeds teen 1874 gestaan toe die eerste leraar, ds. D.P. Ackerman, hier bevestig is in die gemeente wat al in 1861 gestig is. Die ou gebou is in 1879 vergroot, maar tydens die Eerste Vryheidsoorlog het Engelse soldate die gebou as 'n fort ingerig. Die bevolking het ná die oorlog so gegroei dat die gemeente op 'n vergadering op 4 Augustus 1887 besluit het om 'n nuwe kerkgebou op te rig, die gebou wat vandag nog dié doel dien.

Wakkerstroom is die tweede oudste dorp in Mpumalanga in Suid-Afrika. Dit is in 1859 gevestig en die dorp se naam is 'n Afrikaanse vertaling van die Zoeloenaam vir die rivier wat naby die dorp verby vloei, die uThaka, (Wakker). Die R543-streeksroete gaan deur die dorp.

Geskiedenis

Die dorp is deur Dirk Cornelius Uys (Swart Dirk) gestig wat die gebied opgemeet het op die plaas Gryshoek. Hy het al die erwe uitgelê met 'n 50-jaart lang riempie wat van 'n elandbulvel gemaak is wat hy geskiet het tydens sy aankoms in Wakkerstroom. Die dorp en distrik is in November 1859 geproklameer en die eerste erwe in 1864 verkoop.

St Marks kerk, die hofgebou en die ou brug oor die Wakkerstroom is as nasionale monumente verklaar. Die roman She is deur H. Ryder Haggard geskryf terwyl hy in Hoogstraat in Wakkerstroom gebly het. Die dorp spog met 'n straatbrug wat in 1893 deur die regering van die destydse Zuid-Afrikaansche Republiek opgerig is. Die staalkonstruksie vir die brug is uit Duitsland ingevoer. Naby die brug vloei die Marthinus Wesselstroom. Hier is Suid-Afrika se eerste Swart lede van die Zionistebeweging in 1904 deur D. Bryant van die American Christian Catholic Church in Zion gedoop.

Eerste Vryheidsoorlog

Wakkerstroom is deur die 58th Regiment North Staffordshires, die 80th Regiment of Foot (Staffordshire Volunteers) en die 1st King's Dragoon Guards beset in 1880/81 tydens die Eerste Vryheidsoorlog. Oorblyfsels van die South Staffordshires Regiment en die Dragoon Guards se teenwoordigheid kan gesien word op die spits van die Ossewakop en Voortrekkerkop suid van Wakkerstroom.

Tweede Vryheidsoorlog

Tydens die Tweede Vryheidsoorlog het die Britte 'n lyn van een-en-twintig blokhuise tussen Volksrust en Wakkerstroom gebou en een honderd tussen Wakkerstroom en Piet Retief. Die blokhuise is gebou om die Britse toevoerroete van Durban af te beskerm.

Distrik

Die distrik is 2 323 km² groot. Skaap- en beesboerdery is die hoof ekonomiese aktiwiteite. Daar is verskeie San-rotstekeninge te vinde in die gebied om Wakkerstroom. Die gebied is heuwelagtig met klowe, bergfonteine, vleigebiede en damme. Dit is wêreldbekend as 'n voëlkykparadys.

Boorlinge van Wakkerstroom

• Wena Naudé, Afrikaans aktrise.

Sien ook

• NG gemeente Wakkerstroom
• Wakkerstroom (kiesafdeling)
• Vrou Soek Boer, rolprent wat hier verfilm is
• Lys van dorpe in Suid-Afrika

Bronne

• Op Pad in Suid-Afrika. B.P.J. Erasmus. 1995. ISBN 1-86842-026-4
• Ensiklopedie van Suidelike Afrika, Eric Rosenthal, 1967
• Olivier, ds. P.L. (samesteller), 1952. Ons gemeentelike feesalbum. Kaapstad en Pretoria: N.G. Kerk-uitgewers.