Pritzker-prys

in Wikipedia, die vrye ensiklopedie
Spring na: navigasie, soek

Die Pritzker-prys vir argitektuur (Engels: Pritzker Architecture Prize) is die mees prestigieuse toekenning op die gebied van argitektuur en word deur die Amerikaanse Hyatt-stigting jaarliks aan 'n lewende argitek toegeken wat met sy werk 'n beduidende bydrae tot die argitektoniese kuns en die menslike kultuur gelewer het.

Die prys is in 1979 deur Jay A. Pritzker (1922-1999), die stigter van die Hyatt-hotelgroep, in die lewe geroep en is ná sy afsterwe deur die Hyatt-stigting toegeken. Die toekenning geniet in die argitektuur dieselfde internasionale erkenning soos die Nobelprys op die gebied van die letterkunde, ekonomie en natuurwetenskappe en vestig die publiek se aandag op argitektuur as 'n belangrike kunsvorm wat 'n groot invloed op die maatskappy uitoefen.

Naas 'n argitek se bydrae tot die internasionale boukuns word ook die vernuwende gehalte en finesse van sy argitektoniese gedagte by die uitvoering van sy werk as 'n kriterium vir die prystoekenning in ag geneem. Daarnaas speel ook die manier waarop moderne boutegnologie by die werk ingespan is 'n belangrike rol.

Die wenner ontvang 'n prysgeld van VSA-$ 100 000, maar trek veral voordeel uit die internasionale erkenning as 'n meester-argitek en die belangstelling van bouontwikkelaars in sy vaardighede wat uit die prystoekenning voortspruit.

Wenners van die Pritzker-prys vir argitektuur 1979-2011[wysig]

JAAR WENNER LAND PLEK VAN PRYSTOEKENNING
1979 Philip Johnson Verenigde State Dumbarton Oaks, Washington DC
1980 Luis Barragán Mexiko Dumbarton Oaks, Washington DC
1981 James Stirling Verenigde Koninkryk National Building Museum, Washington DC
1982 Kevin Roche Verenigde State The Art Institute, Chicago (Illinois)
1983 Ieoh Ming Pei Verenigde State Metropolitan Museum of Art, New York Stad
1984 Richard Meier Verenigde State National Gallery of Art, Washington DC
1985 Hans Hollein Oostenryk Huntington Library, Art Collections and Botanical Gardens, San Marino (Kalifornië)
1986 Gottfried Böhm Duitsland Goldsmiths' Hall, Londen (Engeland)
1987 Kenzo Tange Japan Kimball Art Museum, Fort Worth (Texas)
1988 Gordon Nunshaft
Oscar Niemeyer
Verenigde State
Brasilië
The Art Institute, Chicago (Illinois)
1989 Frank Gehry Verenigde State Todaiji-tempel, Nara (Japan)
1990 Aldo Rossi Italië Palazzo Grassi, Venesië (Italië)
1991 Robert Venturi Verenigde State Palacio de Iturbidi, Mexikostad
1992 Álvaro Siza Portugal Harold Washington Library Center, Chicago (Illinois)
1993 Fumihiko Maki Japan Kasteel van Praag, Tsjeggiese Republiek
1994 Christian de Portzamparc Frankryk The Commons, Columbus (Indiana)
1995 Tadao Ando Japan Grand Trianon en Kasteel van Versailles (Frankryk)
1996 Rafael Moneo Spanje Bouterrein van The Getty Center, Los Angeles (Kalifornië)
1997 Sverre Fehn Noorweë Bouterrein van die Guggenheim-museum, Bilbao (Spanje)
1998 Renzo Piano Italië Withuis, Washington DC
1999 Sir Norman Foster Verenigde Koninkryk Altes Museum, Berlyn (Duitsland)
2000 Rem Koolhaas Nederland Argeologiese Park van Jerusalem (Israel)
2001 Jacques Herzog
Pierre de Meuron
Switserland Thomas Jefferson se Monticello, Virginië
2002 Glenn Murcutt Australië Michelangelo se Campidoglio, Rome (Italië)
2003 Jørn Utzon Denemarke Koninklike Akademie van die Skone Kunste, Madrid (Spanje)
2004 Zaha Hadid Verenigde Koninkryk Sint Petersburg (Russiese Federasie)
2005 Thom Mayne Verenigde State Pritzker-pawiljoen, Millennium Park (Chicago)
2006 Paulo Mendes da Rocha Brasilië Dolmabahçe-paleis, Istanboel (Turkye)
2007 Richard Rogers Verenigde Koninkryk The Banqueting House, Londen
2008 Jean Nouvel Frankryk Kongresbiblioteek, Washington DC
2009 Peter Zumthor Switserland Wetgewende Paleis van die Stadsraad, Buenos Aires
2010 Kazuyo Sejima en Ryue Nishizawa (SANAA) Japan Ellis-eiland
2011 Eduardo Souto de Moura Portugal Estádio Municipal de Braga, Braga

Bronne[wysig]

  • Abbate, Jay en Thomsett, Michael C.: Celebrating the Art of Architecture. 25 Years of Pritzker Prize Winning Architects. Columbia, MD: Marketplace Books 2004

Eksterne skakels[wysig]