Boeber
Boeber is 'n tradisionele Kaap-Maleise soet melkdrankie wat gemaak word van vermicelli, sago en suiker, en verder gegeur word met kardemom, heel kaneel en rooswater. Die drankie word tradisioneel bedien op die 15de aand van Ramadaan, wat die middelpunt van die vastyd is, te vier. Diegene wat die eerste 15 dae se vas voltooi het word ook na verwys as “hy/sy is op die berg” – hy/sy is halfpad deur die vas van Ramadaan.
Oorsprong[wysig | wysig bron]
Boeber is oorspronklik gemaak deur Kaap-Maleiers wie se voorvaders van Indonesië, Oos-Afrika en Indië na Suid-Afrika gekom het. Die Maleiers geniet ook 'n soortgelyke drankie wat genoem word ‘bubur lambuk’ wat beteken ‘spesiale pap’. Dit word ook tradisioneel bedien met die breek van die vas gedurende Ramadaan. 'n Soortgelyke drankie word bedien in Trinidad en Tobago gedurende Eid al-Fitr (die fees aan die einde van Ramadaan) en word genoem ‘Sawine’ of ‘Sewine’. In baie ander dele van die wêreld word die drankie geniet vanaf die ooste wat dit noem ‘kheer’ of ‘soet congee’ tot selfs in Afrikaanse huishoudings wat iets soortgelyks doen, genaamd ‘melkkos’. Baie huishoudings maak boeber gebaseer op familieresepte en mens kan boeberresepte in meeste Kaap-Maleise kookboeke kry. ‘Gereed-om-te-maak’ boeber-mengsels is ook beskikbaar in uitgesoekte supermarkte, kafees en speserywinkels in Suid-Afrika.
Resep[wysig | wysig bron]
Bestanddele:
- 100 g botter
- 75 ml sago
- 1 koppie water om sago in te week
- 200 g vermicelli
- 3 heel kaneelstokkies
- 5 heel kardemomsade, gekneus
- 50 g sultanas
- 2 liter melk
- 15 ml rooswater
- 150 ml witsuiker (na smaak)
- 50 g geblansjeerde amandels
Voorbereiding: Week die sago in water vir 15 minute. Smelt die botter in 'n diep souspan. Voeg die vermicelli by en roerbraai tot ligbruin van kleur. Voeg die kardemom, kaneelstokkies en die sultanas by. Hou aan roer. Voeg die melk by en bring tot kookpunt. Voeg die sago by en laat prut vir 30 minute terwyl jy aanhou roer om te verhoed dat bestanddele vasbrand. Sodra sago deurskynend van kleur is, voeg die rooswater, suiker en amandels by en hou aan prut en roer vir 10 minute of totdat alles goed deurgemeng is. Bedien warm. Maak 8 tot 10 porsies. Voorbereidingstyd: 1 uur
Bronne[wysig | wysig bron]
- Smith S. 2015, Cape Malay Cooking & Other Delights
- Field S, Meyer R, Swanson F. Imagining the City : memories and cultures in Cape Town. HSRC Press, 2007, p.126.
- Baderoon G. Representation of Islam in South African media and culture. University of Cape Town, 2014, p.113