Joga

in Wikipedia, die vrye ensiklopedie
Spring na: navigasie, soek
'n Westerse jogaklas.
Hande voor die hart.

Joga (Sanskrit: "verbinding", "vereniging"), is as filosofiese stelsel een van die ses ortodokse denkrigtings van die Hindoes, maar het ook baie gemeen met verskeie ander Indiese denkrigtings en godsdienstige stelsels. In die praktyk is joga die uitskakeling van alle negatiewe geestelike funksies, soos sinlike denke en materialistiese begeertes, deur middel van meditasie- en konsentrasie-oefeninge wat voorafgegaan word deur asemhalingsoefeninge en askese.

Die standaardwerk oor joga is die Jogasoetra van Patandjali, wat waarskynlik in die 5de eeu n.C. saamgestel is. Die agt afdelings (langa's) in hierdie werk bestaan hoofsaaklik uit 'n streng psigiese opleiding met betrekking tot selfhipnotiese metodes. Die wysgerige grondslag is ontleen aan die Samkha-stelsel. Joga speel ook 'n belangrike rol in die Boeddhisme.

Een van die beginsels waarop joga berus, is dat spanning in die liggaam die direkte gevolg is van druksituasies waaraan die mens blootgestel word - en wat dikwels hoofsaaklik beïnvloed word deur die denke en reaksies op bepaalde situasies. Gevolglik moet sowel die liggaam as die intellek aan ontspanningsoefeninge blootgestel word, sodat gewoontes wat spanning veroorsaak, verbreek kan word.

Die getroue beoefening van joga lei daartoe dat die liggaam meer buigsaam en soepel word. In samehang hiermee sluit die beoefening van joga ook asemhalingsoefeninge (pranayama) en meditasietegnieke in wat liggaam en gees verder ontspan en sodoende die mens se algemene gesondheid verbeter.

Enige persoon kan baat vind by joga. Dit stimuleer die onwillekeurige spierstelsel en verbeter bloedsirkulasie, energievlakke en lewenskragtigheid. Op intellektuele en geestelike gebied lei dit tot kalmte en 'n gevoel van welgeluksaligheid. Dit is nie alleen die gevolg van die meditasietegnieke nie, maar kan ook in groot mate aan die fisieke oefeninge toegeskryf word.

Commons-logo.svg
Wikimedia Commons het meer media verwant aan:
Joga (kategorie)