Renoster

in Wikipedia, die vrye ensiklopedie
Spring na: navigasie, soek
Renoster
Tydperk: Eocene–Recent
'n Witrenoster
Wetenskaplike klassifikasie
Koninkryk: Animalia
Filum: Chordata
Klas: Mammalia
Orde: Perissodactyla
Familie: Rhinocerotidae
Gray, 1821
Genera

Ceratotherium
Dicerorhinus
Diceros
Rhinoceros

Die renoster is die grootste lewende landsoogdier met die uitsondering van die olifant. Daar bestaan tans vyf spesies renosters wêreldwyd: drie spesies in Asië en twee in Afrika. Altwee die spesies van Afrika kom ook in Suid-Afrika voor, en is die witrenoster en die skaarser swartrenoster.

Witrenoster[wysig | wysig bron]

Vir hoofartikel, sien Witrenoster.

Die witrenoster (Cerarotherium simum) van Afrika is die renosterspesie wat nog die volopste in die wêreld voorkom. Die totale bevolking van hierdie soort in die natuur beloop 20 170 indiwidue (2010), waarvan die oorgrote meerderheid van 18 800 indiwidue (2010) in Suid-Afrika voorkom.[1]

Die witrenoster het, nes die swartrenoster, twee neushorings, maar 'n meer "vierkantige" bolip as die swartrenoster s'n. Hierdie lip gebruik hy om gras na sy mond te "vee". Aangesien dit 'n grasvreter is, word die witrenoster gewoonlik gesien met sy kop grond toe gebuig.

Swartrenoster[wysig | wysig bron]

Vir hoofartikel, sien Swartrenoster.

Die swartrenoster (Diceros bicornis) is baie skaarser as die witrenoster. Volgens skattings was daar in 2010 nog slegs 4 880 van dié renosterspesie in lewe. Hoewel hierdie aantal 'n verdubbeling is van die aantal swartrenosters in 1995, is dit nog 90% minder as wat daar drie geslagte terug was.[2]

Dié renostersoort het ’n lang, gepunte bolip (in teenstelling tot die vierkantige bolip van die witrenoster), wat dit gebruik om blare en fyn takkies mee beet te kry om te vreet. Hierdie renoster word daarom, in teenstelling met die witrenoster, gewoonlik met sy kop in die lug waargeneem.

Sien ook[wysig | wysig bron]

Bronnelys[wysig | wysig bron]

  1. Emslie, R. (2012). “"Ceratotherium simum"”. IUCN Rooilys van Bedreigde Spesies. Weergawe 2014.2. Internasionale Unie vir die Bewaring van die Natuur. URL besoek op 2014-09-09.
  2. Emslie, R. (2012). “"Diceros bicornis"”. IUCN Rooilys van Bedreigde Spesies. Weergawe 2014.2. Internasionale Unie vir die Bewaring van die Natuur. URL besoek op 2014-09-09.
Wiktionary-logo-en.svg Vir woordeboekinligting, sien die bladsy renoster op WikiWoordeboek