Antiope

in Wikipedia, die vrye ensiklopedie
Jump to navigation Jump to search
Jupiter en Antiope, Hendrik Goltzius (omstreeks 1616).
Jupiter en Antiope, deur Antoine Watteau.

Antiope was in die Griekse mitologie die dogter van die riviergod Asopos, volgens Homeros.[1] Haar skoonheid is raakgesien deur Zeus, wat hom soos ’n sater vermom en haar verkrag het.[2] Daarna het Epopeus haar ontvoer en geweier om haar te laat gaan totdat haar oom, Lukos, hom gedwing het.

Antiope se seuns[wysig | wysig bron]

Op pad huis toe het Antiope die lewe geskenk aan ’n tweeling, Amfion en Zetos. Amfion was Zeus se seun en Zetos die seun van Epopeus. Albei is by ’n veewagter gelos om grootgemaak te word.

In Thebe is Antiope toe deur Dirke, die vrou van Lukos, getreiter en sy het na Eleuterai ontsnap. Daar het sy onwetend skuiling gevind in die huis waar haar twee seuns as veewagters gewoon het. Hier is sy ontdek deur Dirke, wat ’n fees daar kom bywoon het. Sy het die twee seuns beveel om Antiope aan die horings van ’n wilde bul vas te bind. Net toe hulle dit wou doen, het die ou veewagter wat hulle grootgemaak het, sy geheim onthul. Die seuns het Dirke toe aan die bul vasgebind omdat sy hul ma so wreed behandel het.[3]

Weens dié daad het Dionisos Antiope met waansin gestraf en sy het doelloos deur Griekeland geswerf totdat sy later gesond gemaak is. Daarna het sy met Fokus van Titorka getrou.

Amfion het ’n bekende sanger en musikant geword nadat Hermes hom ’n goue lier gegee en hom dit leer speel het; Zetos was ’n jagter en veewagter. Vir Grieke van die klassieke tydperk was dié verskil tussen die broers die hoofelement van die verhaal. Amfion is met Niobe getroud en het selfmoord gepleeg ná die dood van sy vrou en kinders. Zetos het met Edon getrou (of soms met Tebe). Die broers is saam in een graf begrawe.

Verwysings[wysig | wysig bron]

Hierdie artikel is merendeels vertaal vanaf die Engelse Wikipedia-artikel en:Antiope (mother of Amphion)
  1. Homeros, Odussee. xi. 260
  2. Apollodorus Bibliotheke iii. 5
  3. Hyginus, Fabula 8.