Czesław Miłosz

in Wikipedia, die vrye ensiklopedie
Spring na: navigasie, soek

Czeslaw Milosz, 1986.jpg

Czesław Miłosz

Poolse skrywer, digter en essayis


Beduidende werke in Engelse vertaling

The Captive Mind (1953)
The Seizure of Power (1953)
Seleted Poems (1973)

Czesław Miłosz [ˈt​͡ʂɛswaf ˈmiwɔʂ] (* 30 Junie 1911 in Šeteniai, destyds Russiese Ryk, tans Litaue; † 14 Augustus 2004 in Kraków, Pole) was 'n Poolse skrywer, digter, essayis en vertaler. Hy was die wenner van die Nobelprys vir Letterkunde in 1980.

Biografie[wysig]

Miłosz het aan die Universiteit van Vilnius in die regte gestudeer. In Vilnius - destyds as Wilno 'n merendeels Poolssprekende stad - het hy ook sy eerste gedigte gepubliseer. In die 1930's het hy reise deur Wes-Europa onderneem en later danksy 'n stipendiaat een jaar in Parys gebly.

Tydens die Duitse besetting van Pole in die Tweede Wêreldoorlog het hy in Warskou gebly. Ná die oorlog het hy 'n pos in die Poolse diplomatieke diens in Parys en die Verenigde State beklee. In 1951 is hy politieke asiel in Frankryk toegestaan.

Vanaf 1960 was Miłosz meer as twintig jaar lank as professor vir Slawiese tale en literatuur aan die Universiteit van Kalifornië in Berkeley werksaam. In 1970 het hy Amerikaanse burgerskap aanvaar.

Vir sy literêre werk is in 1978 die Internasionale Neustadt-prys vir letterkunde aan hom toegeken. In Israel is hy met die Yad Vashem-medalje vir sy verset teen Nazi-Duitsland vereer en het ook talle ander toekennings ontvang soos die U.S. National Medal of Arts, 'n Guggenberg-stipendiaat en 'n eredoktorsgraad van die Harvard-universiteit.

In Pole was sy werke voor 1989 verbode sodat baie van sy boeke eers in Frankryk, die Verenigde State of deur ondergrondse uitgewerye in Pole gepubliseer is. Ná die val van die Ystergordyn het hy aanvanklik tussen Berkeley en Kraków gependel en hom in 2000 uiteindelik in dié Suid-Poolse stad gevestig. Hier is Miłosz in 2004 oorlede.

Literêre werk[wysig]

Die poësie van Czesław Miłosz word deur 'n groot rykdom aan simbole en metafore gekenmerk. Sy romans het daarenteen dikwels outobiografiese trekke. Sy bekendste werke sluit Zniewolony umysł ("Verleide denke", 1953) oor die gedrag van intellektueles in 'n totalitêre bedeling; Dolina Issy ("Die Issa-vallei", 1955), 'n poëtiese verhaal oor die mitiese Pools-Litause landskap; en Rodzinna Europa (1958), 'n outobiografiese werk waarin Miłosz oor die Europese mentaliteit en 20ste eeuse geskiedenis reflekteer, in.

Miłosz het sy werke byna uitsluitlik in Pools gepubliseer, ook tydens sy ballingskap in die weste. 'n Groot deel daarvan is na Engels en 'n tiental ander tale vertaal. Miłosz het sy latere gedigte in samewerking met Robert Hass self na Engels vertaal.