Jona

in Wikipedia, die vrye ensiklopedie
Spring na: navigasie, soek
Jona door Gustave Doré

Die boek Jona sorteer in die Christelike Bybel onder die klein profete. Dit bestaan uit vier kort hoofstukke.

Hoewel daar tot onlangs aanvaar is dat die boek 'n geskiedkundige verhaal is oor die profeet Jona (sy naam beteken "Duif" in Hebreeus), word dit vandag algemeen aanvaar dat die boek eerder tot die genre van 'n gelykenis, kortverhaal of parodie op die profete-amp in Israel gelees moet word.

Die boek handel oor die profeet Jona, seun van Amitai, wat weg van God vlug, nadat God hom geroep het om sy oordeel oor die groot stad Nineve aan te kondig. Binne 'n drieverdiepingwêreld vlug Jona nie net in die teenoorgestelde rigting van Nineve nie, hy vlug af na die stad Joppe en af in die binnekant van die skip. As God in die hemel bly, is dit menslik die verste punt om van God af te kom. Ironies genoeg laat God 'n groot storm op die see losbars, sodat die matrose op die skip op pad Tarsus toe genoop word om Jona oorboord te gooi. (Intussen bekeer hulle hulle tot God.) Jona bevind hom in die maag van 'n vis, die voertuig wat Jona letterlik by die grendels van die doderyk bring. Dit is terwyl hy in hierdie penarie is, letterlik die verste van God af, dat hy tot God bid en hom in die vis se maag ontmoet. Jona staan teenoor die ander profete van Israel, wat elke keer kla of verskoning maak as God hulle roep, maar uiteindelik sy wil uitvoer.

Wanneer Jona uiteindelik op die land uitgespoeg word, neem hy die pad Nineve toe om God se oordeel aan te kondig. Sy poging spreek egter van halfhartigheid. Waar profete soos Moses, Samuel en Jesaja die koning self ingelig het van God se oordeel, stap Jona slegs in die stad in en kondig sy oordeel aan. Verbasend genoeg reageer die koning van Nineve op 'n onverwagse manier. Hy gaan sit in sak en as en proklameer dat mens en dier ook moet rou en hulle voor God moet verootmoedig.

Jona is glad nie beïndruk nie en interpreteer God se genade as boosheid. Terwyl profete wat dikwels onsuksesvol was, smeek dat God hulle sal laat sterf, gaan kla Jona onder 'n plant wat die here gestuur het. Eerder as Elia se braambos, sit Jona onder die wonderplant. Hy ervaar luuksheid, maar bly mor. Daarop stuur God 'n wurmpie om Jona 'n les te leer. Dit lyk of Jona egter nie sy les leer nie. Hy bly mor. Uiteindelik lyk dit of God hom laat vergaan, terwyl almal om hom gered word.

Commons-logo.svg
Wikimedia Commons het meer media verwant aan:
Jona (kategorie)