Dooie See-rolle

in Wikipedia, die vrye ensiklopedie
Spring na: navigasie, soek
Die Psalms-skrifrol, met transkripsie.
Fragmente van die skrifrolle op uitstal by die Argeologiese Museum, Amman.

Die Dooie See-rolle is 'n versameling van ongeveer 900 dokumente, insluitende geskrifte van die Hebreeuse Bybel, wat tussen 1947 en 1956 in elf grotte in en rondom Wadi Qumran naby die murasies van die antieke nedersetting van Khirbet Qumran, op die noordwestelike kus van die Dooie See, ontdek is.

Die geskrifte is van groot religieuse en historiese belang, aangesien hulle van die enigste bekende oorblywende kopieë van Bybelse dokumente insluit wat voor 100 v.C. geskryf is en hulle bewyse bevat van die diversiteit van geloof en praktyk in die destydse Tweede Tempelse Judaïsme. Die tekste is in Hebreeus, Aramees en Koinè-Grieks geskrewe, meestal op perkament, alhoewel sommige wel op papirus geskryf is.[1] Hierdie manuskripte word geraam om uit tussen 150 v.C. en 70 v.C. te dateer.[2] Die skrifrolle word gewoonlik met die antieke Judaïstiese sekte, die Essene, verbind, alhoewel onlangse navorsers hierdie assosiasie bevraagteken.[3]

Die Dooie See-skrifrolle word tradisioneel in drie groepe verdeel: die Bybelse manuskripte (kopieë van die Hebreeuse Bybel), wat ongeveer 40% van die geïdentifiseerde skrifrolle uitmaak; Apokriefse of pseudopigraafse manuskripte (bekende dokumente van die Tweede Tempel-periode soos die Boek van Enoch, die Jubileë, die Boek van Tobit, Sirach, nie-kanonieke psalms, esv., wat uiteindelik nie in die Hebreeuse Bybel gekanonifiseer is nie) wat omtrent 30% van die geïdentifiseerde skrifrolle uitmaak; en die Sektariese manuskripte (voorheen onbekende dokumente wat die reëls en gelowe van 'n spesifieke groep of groepe binne die groter Judaïsme aanspreek) soos die Gemeenskapsreël, die Oorlogsgeskrifte, kommentaar op Habakkuk, en die Seëningsreël, wat rofweg 30% van die geïdentifiseerde skrifrolle uitmaak.[4]

Voor 1967 is die skrifrolle in die Rockefeller Museum (voorheen bekend as die Palestynse Argeologiese Museum) in Jerusalem gehou. Ná die Sesdaagse Oorlog is die skrifrolle na die Altaar van die Boek by die Israelse Museum verskuif.

Publisering van die skrifrolle het vele dekades geduur, en hierdie vertraging was 'n bron van akademiese omstredenheid. Soos op 2007 is die voltooiing van twee volumes nog uitstaande, met die volle reeks, Discoveries in the Judean Desert, wat nege-en-dertig volumes beloop. Baie van die skrifrolle word nou in die Altaar van die Boek in Jerusalem bewaar.

Inlynverwysings en notas[wysig]

Commons-logo.svg
Wikimedia Commons het meer media verwant aan:
Dooie See-rolle (kategorie)
  1. From papyrus to cyberspace The Guardian. 27 Augustus 27 2008.
  2. Bruce, F. F.. "The Last Thirty Years". Story of the Bible. ed. Frederic G. Kenyon. Retrieved 19 Junie 2007
  3. Ilani, Ofri, "Scholar: The Essenes, Dead Sea Scroll 'authors,' never existed, Ha'aretz, March 13, 2009
  4. Abegg, Jr., Martin, Peter Flint, and Eugene Ulrich, The Dead Sea Scrolls Bible: The Oldest Known Bible Translated for the First Time into English, San Francisco: Harper, 2002