Vlag van België

in Wikipedia, die vrye ensiklopedie
Vlag van België
Vlag van België
Vlag van België
Gebruik Nasionale vlag Nasionale vlag
Verhouding 13:15
Goedgekeur 23 Januarie 1831[1]
Ontwerp Vertikale driekleur in swart, geel en rooi

Die nasionale vlag van België (Nederlands: Vlag van België; Frans: Drapeau de la Belgique; Duits: Flagge Belgiens) bestaan uit drie ewe wye vertikale bane in swart (vlagpaalkant), geel en rooi. Toe onluste uitbreek as gevolg van die Belgiese Rewolusie teen Nederlandse oorheersing, is 'n siviele wag gevestig wat die kleure van Brabant gedra het. Die ongewone verhouding (13:15) is van onbekende oorsprong.

Geskiedenis[wysig | wysig bron]

Na die afsterwe van Karel die Grote het die hedendaagse gebied van België (behalwe vir die Graafskap Vlaandere) deel van Lotharingia geword met ’n vlag van drie horisontale bane in rooi-wit-rooi.[2] Die gebied het daarna in Spaanse hande geval en na die kroning van Karel V, Heilige Romeinse Keiser is geel en rooi, die kleure van Spanje, toegevoeg. Van die 16de tot die einde van die 18de eeu was die kleure van wat vandag as België bekendstaan, rooi, wit en geel.[2] Die rooi Boergondiese kruis is soms tot die wit baan van die vlag toegevoeg.[2]

Gedurende die tydperk van Oostenrykse oorheersing is ’n aantal verskillende vlae gebruik. Die Oostenrykse keiser het uiteindelik die gebruik van die Oostenrykse vlag afgedwing. Die inwoners van Brussel was egter hierteen gekant en in navolging van die Franse voorbeeld, het kokardes in rooi, geel en swart kleure, die kleure van Brabant begin verskyn.[2] Die kleure stem dus ooreen met die rooi leeu van die Graafskappe Henegouwe, Limburg en Luxemburg, die geel leeu van Brabant en die swart leeu van Vlaandere en Namur.[2]

Onafhanklikheid en huidige vlag[wysig | wysig bron]

Op 26 Augustus 1830, die dag na die protes by die Koninklike Muntskouburg en tydens die begin van die Belgiese Rewolusie, is die vlag van Frankryk oor die stadsaal in Brussel gehys. Die insurgente het die vlag spoedig vervang met ’n driekleur van rooi, geel en swart in horisontale bane (soortgelyk aan die vlag wat gebruik is gedurende die Brabantse Rewolusie[2] van 1789–1790 en waartydens die Verenigde Nederlandse State opgerig is) wat by ’n nabygeleë fabriek vervaardig is. Gevolglik beskryf die Belgiese Grondwet die kleure van die Belgiese volk as Rooi, Geel en Swart, die omgekeerde volgorde wat in die amptelike vlag te sien is.[1]

Op 23 Januarie 1831 is die horisontale bane na vertikale bane verander en op 12 Oktober van dieselfde jaar het dit sy huidige vorm aangeneem met die swart vaan aan die vlagpaalkant.[2]

Vorige vlae[wysig | wysig bron]

Ontwerp[wysig | wysig bron]

Die amptelike protokolgids in België lui dat die nasionale vlag 2,6 m hoog vir elke 3 m wyd moet wees,[2] wat ’n verhouding van 13:15 tot gevolg het. Elk van die bane is een derde van die wydte van die vlag en die geel is nie dieselfde kleur as dié van die Duitse vlag nie.

Kleure[wysig | wysig bron]

’n Wapperende vlag van België

Die kleurskema word hieronder gelys:

Kleurskema Swart Geel Rooi
Heksadesimaal #000000 #FDDA24 #EF3340
RGB 0-0-0 253-218-36 239-51-64
CMYK 0-0-0-100 0-6-67-0 0-86-63-0
Pantone Swart Geel 115 Rooi 32

Vlagverklaring[wysig | wysig bron]

Vlag van België in die Brusselse Jubelpark

Die Belgiese vlag mag altyd deur private individue gehys word, maar dit moet op sekere dae aan die buitekant van regeringsgeboue, amptelike geboue, monumente en openbare ondernemings gehys word.[3] In die Weermag geld nog strengere instruksies.

Datum Info
20 Januarie Geboorte van die Koningin van België
17 Februarie (halfstok) Afsterwe van SM Koning Albert I, en lede van die koningshuis
7 April Herdenking van gesneuweldes
15 April Geboorte van die Koning van België
1 Mei Werkersdag
9 Mei Europadag – uitgebrei, saam met die vlag van Europa
6 Junie Geboorte van de sesde Koning van België
2 Julie Troudag van die ou-vorstepaar
21–23 Julie Troonsbestyging van Koning Leopold I – Nasionale Feesdag
11 September Geboorte van die sesde Koningin van België
24 Oktober Dag van die Verenigde Nasies, gestig in 1945
11 November Wapenstilstand
15 November Koningsdag
4 Desember Troudag van die vorstepaar

Protokol[wysig | wysig bron]

Die vlag aan die Belgiese Federale Parlementsgebou

Aangesien Belgiue ’n federale staat is beklee die vlae van die gemeenskappe en streke in beginsel dieselfde rang as die vlag van België.[2] Nietemin, wanneer vlae in ’n prosessie gehys en gestryk word kry die nasionale vlag voorkeur bo die ander vlae.[2]

Die voorkeurvolgorde is:[2]

  1. Die nasionale vlag van België
  2. Die vlag van die Belgiese gemeenskap of streek
  3. Die Europese vlag
  4. Die vlae van die provinsies van België in alfabetiese volgorde in die plaaslike taal (indien meer as een vertoon word)
  5. Die vlag van die munisipaliteit

Indien daar ’n besoekende staatshoof is mag daardie land se vlag tweede in die voorkeurvolgorde weesmet die res van die volgorde wat dieselfde bly.[2]

Ander vlae[wysig | wysig bron]

Variante[wysig | wysig bron]

Die vlag aan die Koninklike Paleis van Brussel

Nasionale vlag en burgerlike vaandel[wysig | wysig bron]

Die nasionale vlag het ’n ongewone vlagverhouding van 13:15. Die 2:3-vlag is die burgerlike vaandel en is die korrekte vlag wat burgerlikes ter see mag gebruik.[4]

Vlootvaandel en geus[wysig | wysig bron]

België se vlootvaandel het bevat die drie nasionale kleure in ’n St. Andrieskruis op ’n wit veld met ’n swart kroon oor gekruisde kanonne aan die bokant en ’n swart anker aan die onderkant. Dit is in 1950 geskep kort nadat die Belgiese vloot hervestig is nadat dit ’n afdeling van die Britse Vloot was gedurende die Tweede Wêreldoorlog. Die vaandel herinner ook aan wit vaandel van die Koninkklike Vloot.[5]

Daar is ook ’n amptelike Belgiese vlootgeus wat identies aan die nasionale vlag is, behalwe dat die vlagverhouding 1:1 is en die geus gevolglik vierkantig is.[5]

Koninklike standaard en vlae op die koninklike paleise[wysig | wysig bron]

Die Belgiese koninklike standaard is die persoonlike standaard van die huidige koning, koning Filip en vertoon sy monogram, ’n gestileerde ‘F’ gekruis met ’n ‘P’ (vir die Franse ‘Philippe’). Die ontwerpe van die koninklie standaarde van vorige monarge is soortgelyk aan die huidige.[6]

Die vlag van België word op die Koninklike Paleis van Brussel asook die Kasteel van Laken vertoon maar in ’n ander vlagverhouding as die standaard. Dit het ’n onreëlmatige verhouding van 4:3 wat dit hoër maak as wat die breed is.[6] Die bane bly egter vertikaal. Hierdie verhouding word as estetiese oorweging verklaar aangesien peleise groot geboue is en die vlae dus van ’n afstand beskou kan word. Deur verkorting vertoon die vlae dus normaler as wat die werklikheid is..[6]

Wanneer die koning in België is word die vlae bo paleise vertoon, nie noodwendig die paleis waar die koning hom bevind nie. Die vlae word nie vertoon wanneer die koning op ’n staatsbesoek aan ’n ander land is of met vakansie buite België verkeer nie.[6] Daar was al uitsonderings op hierdie reël, maar in die breë is die vertoon of nie van die koninklike standaard ’n betroubare aanduider van of die koning wel in die land is, al dan nie.

Vlae en standaarde[wysig | wysig bron]

Vlae van die geweste en gemeenskappe[wysig | wysig bron]

Vlae van die provinsies[wysig | wysig bron]

Verwante vlae[wysig | wysig bron]

Verwysings[wysig | wysig bron]

  1. 1,0 1,1 (en) "België". Flags of the World. Besoek op 21 Desember 2020.
  2. 2,00 2,01 2,02 2,03 2,04 2,05 2,06 2,07 2,08 2,09 2,10 2,11 (fr) Van den Bussche, E., Hoof van Protokol, Belgiese Federale Departement van Binnelandse Sake (2008). Noble Belgique, ô Mère chérie – LE PROTOCOLE EN BELGIQUE (PROTOKOL IN BELGIË). Heule: Editions UGA. ISBN 978-90-6768-935-9.{{cite book}}: AS1-onderhoud: meer as een naam (link)
  3. (nl) "Vlaggen van België". belgium.be. Besoek op 27 Desember 2020.
  4. (en) "Burgerlike vlag en vaandel van België". Flags of the World. 12 April 2009. Besoek op 3 November 2009.
  5. 5,0 5,1 (en) "België: Vlootvaandel en geus". Flags of the World. 7 Julie 2006. Besoek op 3 November 2009.
  6. 6,0 6,1 6,2 6,3 (en) "België: Koninklike standaard". Flags of the World. Besoek op 3 Julie 2013.

Eksterne skakels[wysig | wysig bron]