's-Hertogenbosch

vanuit Wikipedia, die vrye ensiklopedie.

's-Hertogenbosch Den Boch Frans:Bois-le-Duc Duits: Herzogenbusch Spaans: Bolduque Italiaans: Boscoducale
Vlag Wapen
Koördinate: 51° 41′ " N 5° 18′ " O
Land	Nederland
Provinsie	Noord-Brabant
Oppervlak
- Stad	39,98 km²  (15,4 sq mi)
- Land	36,38 km² (14 sq mi)
- Water	3,60 km² (1,4 sq mi)
Bevolking (2006)
- Stad	100 850
- Digtheid	2 522/km² (6 532/myl2)
Webwerf: www.s-hertogenbosch.nl

's-Hertogenbosch (sɛɾtoɣən'bɔs (help·info)) (letterlik "Die hertog se Bos"), plaaslik in die omgangstaal bekend as Den Bosch, is die hoofstad van Noord-Brabant, een van die drie suidelike provinsies van Nederland. Dit is in die suide van die land geleë, ongeveer 80 km suid van Amsterdam. Die Gemeente 's-Hertogenbosch omvat die stad 's-Hertogenbosch en die omliggende dorpies Bokhoven, Empel, Engelen, Hintham, Kruisstraat, Meerwijk, Orthen, en Rosmalen. In Januarie 2007 het die gemeente 135 596 inwonders gehad.

's-Hertogenbosch is volgens oorlewering in 1185 gestig deur hertog Hendrik I van Brabant by die sameloop van die Aa en Dommel, wat tans saamkom by die burg in die stad. Dit is een van die vroeë Middeleeuse stede van Nederland.

Inhoud 1 Geskiedenis 1.1 Stigting van die stad 1.2 Bloeitydperk 1.3 Verwowering deur die Republiek 1.4 Revolusietydperk 1.5 Na 1830 2 Ligging 3 Kuns en Kultuur 3.1 Beeldende kuns en keramiek 3.2 Gebeurtenisse en feeste 4 Verwysings

[wysig] Geskiedenis

[wysig] Stigting van die stad

Die naam 's-Hertogenbosch is 'n verkorting van die Nederlandse frase des Hertogen bosch - "die Hertog se Bos". Die Hertog waarna verwys word is Hendrik I, Hertog van Brabant, wie se huis reeds vir vier eeue 'n groot landgoed naby Orthen gehad het toe Den Bosch gestig is op 'n sandopeenhoping in die middel van 'n deltagebied wat deur die Aa en die Dommel gevorm is. Volgens oorlewering het hy in 1185, op 26-jarige ouderdom, stadsregte en handelsvooregte wat daarmee saam gegaan het verleen. Die stigtingsakte het verlore gegaan en die vroegste verwysing na die stad in eietydse bronne dateeer uit 1196. Hertog Hendrik I het die stad gestig om sy belange teen Gelre en Holland te verdedig en die stad is van meet af as vestingstad beplan. Dit is in 1203 deur 'n gesamentlike ekspedisie van Gelre en Holland vernietig, maar is kort daarna herbou. Oorblyfsels van die ou klip stadsmure kan steeds besigtig word. Die nuwe stad het vinnig gegroei en teen 1300 het dit reeds 10 000 inwoners gehad. Skippers uit Den Bosch het op die Ryn na Keulen gewaar om wyn te haal, na die Oossee vir haringvisvang en na Luik om kalk, natuursteen, wapens en geelkopervoorwerpe te bekom. Die stad se invloedsfeer het oor die hele oostelike deel van Noord-Brabant gestrek. In ongeveer 1475 is 'n baie groter stadsmuur opgerig om die stad se teen daardie tyd baie groter gevestigde gebied te beskerm. Kunsmatige waterweë waardeur die riviere Domme en Aa herlei is, is gegrawe om as stadsgrag te dien.^[1]

[wysig] Bloeitydperk

Tussen 1475 en 1525 het 's-Hertogenbosch 'n bloeitydperk beleef. Dit het toe die tweede grootste bevolkingsseentrum in die gebied van die hedendaagse Nederland geword, na Utrecht. Die Sint-Janskathedraal is in hierdie tydperk gebou. Die stad is in nege wyke verdeel wat elke sy eie buurtkapel en wykorganisasie gehad het. 's-Hertogenbosch was in die tydperk die geboorte plek van een van die belangrikste skilders van die noordelike renaissance, Jeroen Bosch (c. 1450–1516). Die stad was ook 'n sentrum van musiek met talle komponiste, soos Jheronimus Clibano wat hulle opleiding by die katedrale in die stad opgedoen het.^[1]

[wysig] Verwowering deur die Republiek

Vanaf 1525 tot 1795 het die stad 'n tydperk van wisselende ekonomiese opbloei en verval beleef. Die Nederlandse Opstand wat in 1566 uitgebars het het die stad in krisis gedompel. 'n Poging is deur calviniste aangewend om die stadsbestuur met geweld oor te neem. Dit het egter misluk na 'n hewige geveg tussen protestante en katolieke op die markplein van 's-Hertogenbosch. In 1579, tydens die Tagtigjarige Oorlog, het die stadsbestuur die kant van die Spaanse Habsburgse koning gekies en daarmee saam hernude katolisisme. Nadat dit duidelik geword het dat die stadsbestuur nie sou oorgaan na die erkenning van die Unie van Utrecht nie en die Hertog van Parma om beskerming gevra het, het duisende inwoners weens godsdienstige, politieke en ekonomiese oorwegings uit die stad gevlug. Die platteland om die stad is geheel en al verwoes.^[1]

In 1600 en 1603 is twee onsuksesvolle beleggings van die stad deur Prins Maurits van Oranje, die kommandeur van die Republiek van die Sewe Verenigde Nederlande, onderneem. Toe die verwoestende Dertigjarige Oorlog in Duitsland uitgebreek het, het die Habsburgers probeer om die opstandige Republiek te breek deur dit te isoleer van die hinterland. 's-Hertogenbosch het in hierdie tydperk die spil van 'n ring van vestings geword en groot bedrae is spandeer op nuwe vestingwerke. Die middeleeuse klipmure is vervang met grondwalle, waarvan de hoofwalle grotendeels bewaar gebly het. Prins Maurits se broer, Prins Frederik Hendrik van Oranje loods egter in 1629 met sowat 30 000 man 'n reuse teenaanval, die Beleg van 's-Hertogenbosch. Hy slaag daarin om die stad, met die bynaam "Moerasdraak" wat as onneembaar met bestaande beleëringsmetdodes beskou is, na drie maande tot oorgawe te dwing deur die loop van die Aa en die Dommel te verlê en 'n nuwe veertig kilometer lange dubbele ringdyk op te rig en die polder wat ontstaan het met honderde perdemeule droog te lê. As gevolg van die onverwagte nederlaag is die Habsburgse strategie volledig in die wiele gery. Tot 1794 het die stad dus deel geword van die Staatse besettingssone van Brabant, as onderworpe "Generaliteitsland". As dwangburg teen die katolieke inwoners is 'n 'n enorme sitadel, fort "Papenbril", aan die noordekant van die stad opgerig.

As deel van die Republiek (1629-1794) het die stedelike samenlewing 'n ryk geskakeerde karakter ontwikkel. Handelsverkeer het van gtoot belang gebly en die garnisoen het 'n spesifieke stempel op die samenlewing afgdruk en ekonomies gesproeke het die stad hom goed gehandhaaf. Hoewel die bevolking hoofsaaklik katoliek gebly het, het godsdienstige diversiteit toegeneem met 'n omvangryke Nederduits-gereformeerde gemeente, 'n Waals-gereformeerde gemeente, 'n lutherse kerk en vanaf die laat sewentiende eeu'n kleine joodse gemeenskap.^[1]

[wysig] Revolusietydperk

In 1794 is die stad sonder veel moeite deur die revolusionêre Franse leërs verower. Die Bataafse Republiek wat met Franse steun tot stand gekom het is die Brabanders en katolieke vir die eerste keer in 165 jaar as volwaardige medeburgers opgeneem. In 1810 het Napoleon Bonaparte alle gebiede suide van die Waal by die Franse Keiserryk as begin van die totale anneksasie van die Koninkryk van Holland. 's-Hertogenbosch het die hoofdstad van die departement Bouches-du-Rhin geword. In 1813 het die Pruise die Fransen weer verjaag en het 's-Hertogenbosch binne die Verenigde Koninkryk van die Nederlande die hoofstad van die provinsie Noord-Brabant geword. Die stad het nie aangesluit by die Belgiese Opstand van 1830 nie.

[wysig] Na 1830

Die stad het vir lank 'n behoudende karakter gehad. As uitvalsbasis vir Die Suidelike Veldleër was dit tot 1877 verbode om buite die walle uit tebrei. Selfs toe daar uiteindelik met stadsuitbreiding begin is, het dit aanvanklik aarselend gebeur. Die stadskern is sodoende oorbevolk en verarm. In 1900 het die stad die hoogste kindersterftesyfer in Nederland gehad. Na 1950 is 'n poging aangewend om aan te sluit by die grootste agglomerasies van die land en is enorme bou- en sloopprogramme van stapel gestuur. Behoudende en progressiewe kragte het egter op 'n nippertjie na verhoed dat die historiese stadskern nie verlore gegaan het nie. So het De Moriaan, die oudste baksteenhuis van Nederland wat in die 13e eeu gebou is byvoorbeeld behoue gebly.

Die voormalige gemeentes Bokhoven, Empel, Meerwijk, en Engelen is in 1971 met die gemeente 's-Hertogenbosch saamgevoeg. Deur die samesmelting met die gemeente Rosmalen is die honderdduisend inwonermerk in 1996 oorskry. Ondanks die stad se groei het die historiese karakter van die stadskern redelik goed behoue gebly en vandag word restourasiewerk aan die historiese vestingwerke onderneem.

[wysig] Ligging

As die noordelikste stad in Suidelike Nederland het die goeie verbindinge met Nijmegen en Arnhem in die ooste, Utrecht en Amsterdam in die noorde, Tilburg en Breda in die weste en Eindhoven, Veghel en Helmond in die suidooste. Die Randstad, die Duitse Ruhrgebied, Antwerpen en Luik is ook maklik bereikbaar. laasgenoemde twee verbindings stam uit die tyd van die Hertogdom van Brabant. Die stedelike gebied Waalboss is 'n kombinasie van die gemeente 's-Hertogenbosch, Oss, Waalwijk, Loon op Zand, Heusden, Vught, Bernheze en Maasdonk. Hierdie gebied beleef tans 'n sterk ekonomiese opbloei.

[wysig] Kuns en Kultuur

's-Hertogenbosch beskik oor 'n ryk kultuurhistoriese erfenis. Vernaam hieronder is die vestingwerke om die historiese stadskern wat in die middeleeue opgebou is ter verdediging teen vyande en die stygende water. Die stad beskik oor talle godsdienstige geboue soos die Ned. Hervormde (Grote) Kerk, San Salvatorkerk, Sint Cathrien of Kruiskerk, Parochie H. Antonius Abt, R.K. Kapucijnenkerk en die Sint Janskathedraal wat die hoogtepunt van die gotiek in Nederland verteenwoordig.

Die Jheronimus Bosch Art Center is ook in 'n voormalige kerk en buitegeboue gehuisves. Die sentrum is toegewy aan die werk en lewe van die kunstenaar Jeroen Bosch wat in Den Bosch gebore is, daar groot geword en gewerk het.^[2]

[wysig] Beeldende kuns en keramiek

Sowel historiese as eietydse beeldende kuns word in Den Bosch se museums en galerye uitgestal en die Centrum voor Beeldende Kunst (CBK) beywer hom vir die versterking en verbetering van die kunsklimaat in ’s-Hertogenbosch.^[3]

Den Bosch is ook 'n bekende sentrum vir keramiekwerk met die Akademie voor Kunst en Vormgeving / St. Joost, Cor Unum Contemporary Ceramics, die Europees Keramisch Werkcentrum en die Stedelijk Museum 's-Hertogenbosch wat in 2003 saam die stigting Den Bosch Keramiekstad (DBKS) gestig het om die stad Den Bosch te posisioneer as die stad 'waar het gebeurt' op die gebied van die moderne keramiek.^[4]

[wysig] Gebeurtenisse en feeste

'n Uiteenlopende versameling kulturele gebeurtenisse en feeste vind jaarliks in die stad plaas. Bourgondisch 's-Hertogenbosch is 'n kulinêre gebeurtenis wat in September aan die voet van die Sint Janskaterdral gehou word. Die Erasmusfestival wat in November plaasvind bestaan uit dans, film, mode, opvoeding en diverse tentoonstellings binne 'n tema wat jaarliks wissel. Die Noord-Zuid bevrijdingsfestival is 'n multikulturele bevrydingsfees met wêreldmusiek, kulturele mark, kinderprogramme en tema-aktiwiteite.^[5]

Sedert 1962 word die Jazz in Duketown fees in die pinkstertyd in 's-Hertogenbosch gehou. Die opelug fees waar sowat 250 000 besoekers gratis in die ou stadskern na jazzmusiek kom luister is uniek veral in terme van die organisasie daarvan wat deur vrywilligers gedoen word. Die fees sluit in toeganklike blues, funk & dans, latin jazz, improvisasie en tradisionele jazz.^[5]

Koninginnedag in 's-Hertogenbosch word jaarliks deur die Stichting Koninginnemarkt georganiseer in die middestad van 's-Hertogenbosch en sluit in dans, musiek, salsa, beeldende kuns, opteredes en 'n rommelmark.^[5]

Tydens karnavalstyd word die stad herdoop tot die Bourgondiese Oeteldonk. Anders as die karnavals in Limburg, waar die karnaval volgens de Rynlandse tradisie gehou word, hou 's-Hertogenbosch en Bergen op Zoom die karnaval volgens die Bourgondiese Karnaval tradiesie. Dit blyk byvoorbeeld daaruit mense in 's-Hertogenbosch in 'n boerenkiel aantrek om dit duidelik te maak dat in hierdie tydperk gewone range en stande binne die samelewing verval. Dit word ook weerspieël in die tydelike oordrag van die stadsleutel deur die burgemeester aan die "karnavalsburgemeester" (Peer vaan den Muggenheuvel tot den Bobberd).

In Augustus word die tien dae lange Theaterfestival Boulevard gehou waar teatermakers, musici, dansers en beeldend kunstenaars hulle programme opvoer vir die sowat 100 000 besoekers.^[5]

[wysig] Verwysings