See van Ochotsk

in Wikipedia, die vrye ensiklopedie
Spring na: navigasie, soek
Satellietbeeld van die See van Ochotsk
Kaart van die See van Ochotsk

Die See van Ochotsk (Russies: Охо́тское мо́ре Ochotskoje More, Japannees: オホーツク海) is deel van die Westelike Stille Oseaan. Dit lê tussen die Kamtsjatka-skiereiland in die ooste, die Koeril-eilande in die suidooste, die Japannese eiland Hokkaidō in die verre suide, die eiland Sachalin in die weste, en ’n lang stuk Oos-Siberiese kus (onder andere die Sjantar-eilande) in die weste en noorde. Dit is genoem na Ochotsk, die eerste Russiese nedersetting in die Russiese Verre-Ooste.

Geografie[wysig]

Die See van Ochotsk beslaan 1 583 000 km2, met ’n gemiddelde diepte van 859 meter. Die maksimum diepte is 3 372 meter. Dit is aan albei kante van Sachalin verbind aan die See van Japan.

In die winter is dit moeilik of selfs onmoontlik om op die see te vaar weens die vorming van ys: die groot hoeveelhede vars water van die Amoer-rivier verlaag die soutinhoud van die see en verhoog so die vriespunt daarvan.

Met die uitsondering van Hokkaidō word die see omring deur Russiese grondgebied en dit word dus gewoonlik beskou as onder Russiese jurisdiksie.

Eilande[wysig]

Van die eilande wat die See van Ochotsk omring, soos Hokkaidō en Sachalin, is baie groot. Die meeste eilande in die see is óf kuseilande óf hulle behoort tot die Koeril-eilandgroep. Ion-eiland is die enigste een wat op die oopsee lê. Die meeste van die eiland is onbewoon, met kolonies robbe en seevoëls.

Naam[wysig]

Die Russiese seevaarders wat die see vanaf die 17de eeu bevaar het, het oorspronklik geen vaste naam vir die see gehad nie. Die see is soms Damskojesee (Damskoje more) en soms Kamtsjatkasee (Kamtsjatskoje more) genoem. Later is dit die See van Ochotsk genoem. Die Japanners het histories hulle eie naam vir die see gehad; Hokkai (北海) wat "noordsee" beteken. Omdat dié naam egter nou vir die Noordsee in Europa gebruik word, is dit vervang met Ohōtsuku-kai (オホーツク海), wat 'n transliterasie is van die Russiese benaming vir die see.

Hierdie artikel is in sy geheel of gedeeltelik vanuit die Engelse Wikipedia vertaal.