Pieter Mulder

in Wikipedia, die vrye ensiklopedie
Spring na: navigasie, soek
Pieter Mulder
Pieter Mulder

Amptelike foto van dr. Mulder


Adjunk-Minister van Landbou, Bosbou en Visserye
Ampsbekleër
Ampsaanvaarding
10 Mei 2009
President Jacob Zuma
Voorafgegaan deur Dirk du Toit

Leier van die Vryheidsfront Plus
Vise Abrie Oosthuizen
Voorafgegaan deur Genl. Constand Viljoen

Persoonlike besonderhede
Gebore 26 Julie 1951 (1951-07-26) (62 jaar oud)
Randfontein, Suid-Afrika
Politieke party KP (1982 - 1994)
VF+ (1994 - )
Eggenoot/eggenote Triena Mulder
Kind(ers) Heleen
Suzanne
Catrien
Connie
Gerdi
Alma Mater Potchefstroomse Universiteit vir CHO
Religie Gereformeerd

Dr. Pieter W.A. Mulder (26 Julie 1951) is die huidige leier van die Vryheidsfront Plus en Suid-Afrika se Adjunk-Minister van Landbou, Bosbou en Visserye.

Grootwordjare en studies[wysig]

Mulder is op 26 Julie 1951 gebore en het in Randfontein en Kaapstad groot geword. Hy voltooi sy hoërskoolopleiding in 1968 aan die Riebeeck Hoërskool in Randfontein, waar hy onder andere hoofseun, en in atletiek Victor Ludorum was.

In 1969 verrig hy sy militêre diensplig in die Suid-Afrikaanse Vloot te Saldanhabaai, en aan die einde van die jaar is die eresabel aan hom toegeken as die beste offisier van die jaar.

Mulder voltooi sy BA graad in Kommunikasiekunde in 1974, en ook sy MA graad in Kommunikasiekunde in 1976, aan die Potchefstroomse Universiteit vir CHO met onderskeiding. As student was hy onder andere Voorsitter van die Alabama-studentegeselskap; het hy vir die Universiteit se o/20-rugbyspan gespeel en hy was ook Voorsitter van die Studenteraad. In 1978, op 26-jarige ouderdom, verwerf hy die Doktorsgraad in Kommunikasiekunde.

Gedurende 1981 studeer hy vir ’n jaar aan die Universiteit van Wisconsin, Madison, in die Verenigde State van Amerika. Sy na-doktorale studie daar het oor internasionale kommunikasie gehandel.

Mulder is in 1984 as dosent in Kommunikasiekunde aan die PU vir CHO aangestel en word in dieselfde jaar gekies tot vise-president van die Suider Afrikaanse Kommunikasiekundedosentevereniging. Hy word ook in 1984 lid van die Openbare Skakelinstituut. Hy is daarna in 1985 tot professor en departementshoof van die Departement Kommunikasiekunde bevorder.

Politieke Loopbaan[wysig]

Mulder se openbare politieke loopbaan begin in 1985 met sy verkiesing as stadsraadslid in Potchefstroom. Hy is verder in 1988 in ’n tussenverkiesing tot Parlementslid verkies - hy was die Konserwatiewe Party se verteenwoordiger vir die kiesafdeling Schweizer-Reneke - en hy was ook deel van die KP se onderhandelingspan met die ANC in 1993 voor die 1994-verkiesing.

In Maart 1994 is hy betrokke by die stigting van die Vryheidsfront waar hy tot voorsitter verkies is, en is sedert 1994 ’n VF Parlementslid. Mulder is egter in April 2001 tot die leier van die Vryheidsfront verkies, en dien as die VF se hoofwoordvoerder oor Buitelandse Sake en die Uitsaaiwese.

Hy was selfs ’n lid van die VF se onderhandelingspan in die Grondwetskrywende Vergadering en het gedurende 1994 en 1997 deel gevorm van ’n veelparty-groep wat namens die Suid-Afrikaanse Parlement verskillende lande besoek het ten einde hulle verskeie grondwette te bestudeer.

Die Organisasie vir Onverteenwoordigde Volke en Mense (Unrepresented Nations and Peoples Organization - UNPO) het op hul IXde Algemene Vergadering op 16 en 17 Mei 2008 in Brussel, België, die Afrikaners eenparig aanvaar as lid van die organisasie. Mulder het die lidmaatskap van UNPO namens die Afrikaners aanvaar.

Op 10 Mei 2009 word hy deur pres. Jacob Zuma aangestel as Adjunk-Minister van Landbou, Bosbou en Visserye onder Tina Joemat-Petterson.[1][2][3] Hy behou sy pos as leier van die Vryheidsfront Plus maar bedank as parlementêre leier van die party.

Teen einde Mei 2010 het Mulder daarin geslaag om ’n mosie oor die ernstigheid van plaasmoorde in Suid-Afrika aanvaar te kry voor UNPO se sitting in Rome, Italië. Hy is tydens hierdie geleentheid ook gekies om op die organisasie se dagbestuur te dien.[4]

In Februarie 2012 was Mulder weer in die nuus nadat hy in die parlement, in reaksie op pres. Zuma se staatsrede, gesê het dat die swart bevolking geen historiese aanspraak het op die Wes- en Noord-Kaap nie omdat daar niemand behalwe die Khoi- en San-mense was nie toe Jan van Riebeeck in 1652 aan die Kaap geland het. Die swart bevolkingsgroepe het van die noorde van Afrika suid getrek en het die blankes eers by die Keirivier teëgekom.[5] Prof. Hermann Giliomee, gesiene Suid-Afrikaanse historikus, asook die voormalige media-ombudsman in Suid-Afrika, James Myburgh, het egter vir Mulder in die bres getree en die media daarvan beskuldig dat hulle spoke opjaag en die punt van Mulder se toespraak oor die manier waarop grondherverdeling plaasvind, totaal ignoreer en buite konteks aanhaal.[6][7][8] Frans Cronjé, hoof van die Suid-Afrikaanse Instituut vir Rasseaangeleenthede het ook tot die gesprek toegetree en Mulder verdedig deur te sê dat blankes slegs 50% van die grond in Suid-Afrika besit terwyl die regering se syfers meen dit is 87%.[9]

Persoonlike lewe[wysig]

Mulder het verskeie kere as kerkraadslid in sy gemeente gedien en is deurlopend aktief betrokke in Afrikaner-kultuurorganisasies en -aktiwiteite. Hy speel muurbal, lees graag en stel in sterrekunde, rekenaars en geskiedenis belang.

Pieter Mulder is met Triena Roestorf getroud, hulle het vyf kinders en is in Potchefstroom woonagtig.

Triena is ’n Wiskunde-onderwyseres en het haar B.Sc Honns in Wiskunde aan die PU vir CHO voltooi. Sy was departementshoof: Wiskunde aan die Hoër Tegniese Skool Potchefstroom asook aan die Hoërskool Schweizer-Reneke. Sy gee tans onderrig in Wiskunde aan die Hoërskool Gimnasium Potchefstroom.

Mulder het vroeg in 2009 ’n boek oor sy ervarings in die Suid-Afrikaanse politiek die lig laat sien met die titel "Kan Afrikaners Toyi-toyi?"[10]

Verwysings[wysig]

  1. Naudé, Colleen (22 Mei 2009). “’n Mulderhek gaan oop”. (html) Fin24. URL besoek op 22 Februarie 2012.
  2. Du Toit, Pieter (12 Mei 2009). “Alle VF-leiers steun Mulder”. (html) Beeld. URL besoek op 22 Februarie 2012.
  3. Isaacs, Abigail (24 Mei 2009). “Mulder kry groen lig vir kabinet”. (html) Beeld. URL besoek op 22 Februarie 2012.
  4. Mulder, Pieter (31 Mei 2010). “UNPO-kongres 2012”. (html) VF+. URL besoek op 22 Februarie 2010.
  5. Azzakani, Rajaa (16 Februarie 2012). “Mulder vat Zuma aan oor grond”. (html) Die Burger. URL besoek op 22 Februarie 2012.
  6. Giliomee, Hermann (23 Februarie 2012). “Wat Mulder eintlik sê”. (html) Beeld. URL besoek op 27 Februarie 2012.
  7. (en) Myburgh, James (22 Februarie 2012). “Mulder, Zuma and the press”. (html) PoliticsWeb.co.za. URL besoek op 27 Februarie 2012.
  8. (en) Milazi, Abdul (22 Februarie 2012). “Is Mulder racis, or are we?”. (html) TimesLive.co.za. URL besoek op 27 Februarie 2012.
  9. Cronjé, Frans (25 Februarie 2012). “Grond: net hitte, geen lig”. (html) Rapport. URL besoek op 29 Februarie 2012.
  10. De Beer, Linda (2 Februarie 2009). “Mulder illustreer SA politiek só in ‘toyi-toyi’ boek”. (html) Beeld. URL besoek op 22 Februarie 2012.