Joseph Brodsky

in Wikipedia, die vrye ensiklopedie
Spring na: navigasie, soek
Joseph Brodsky
’n Beeld van die betrokke persoonlikheid.
Joseph Brodsky in 1988

Geboortenaam Josif Aleksandrowitsj Brodski
Gebore (1940-05-24)24 Mei 1940
Leningrad, Russiese SFSR, Sowjetunie (nou Sint Petersburg, Rusland)
Oorlede 28 Januarie 1996 (op 55)
New York Stad, New York, Verenigde State
Nasionaliteit Vlag van Sowjetunie Sowjetunie (1940–1972)
Staatloos (1972–1977)
Vlag van Verenigde State van Amerika Verenigde State (1977–1996)
Beroep Digter en essayis
Eerbewyse Nobelprys vir Letterkunde (1987)
Struga Poetry Evenings Golden Wreath Award (1991)
Huweliksmaat Maria Sozzani (1990–1996)
Kind(ers) Andrei Basmanov, Anna Brodsky
Iosif Brodsky signature.jpg

Joseph Brodsky ([ˈbrɒdski]; gebore as Ио́сиф Алекса́ндрович Бро́дский, Josif Aleksandrowitsj Brodski; * 24 Mei 1940 in Leningrad; † 28 Januarie 1996 in New York) was 'n Russies-Amerikaanse digter en essayis.

Brodsky, wat in sy werk 'n verskeidenheid sosiale, ekonomiese en politieke wantoestande in die destydse Sowjetunie aangespreek het - soos byvoorbeeld die ondoeltreffendheid van 'n sentraal-beplande ekonomie, behuisingsnood en latente antisemitisme - is deur die Sowjet-Russiese owerheid as sosiale en militante "parasiet" bestempel (onder meer omdat "digter" nie as 'n werklike beroep beskou is nie), in hegtenis geneem en in 1964 tot vyf jaar in 'n werkkamp gevonnis. Nadat Sowet-Russiese en internasionale literêre kringe druk op die Sowjet-bewind uitgeoefen het, is die vonnis ná een jaar opgeskort.[1][2] In 1972 is hy van sy Sowjet-burgerskap ontneem nadat hy geweier het om sy werk onder sensuur te laat plaas en in 'n vliegtuig na Wene gesit.

Brodsky het hom daarna met die hulp van ondersteuners, onder wie die Britse digter W. H. Auden, in die Verenigde State gevestig waar hy as dosent aan 'n verskeidenheid universiteite verbonde was, waaronder Yale, Columbia, die Universiteit van Cambridge in Massachusetts en die Universiteit van Michigan.

In 1987 is die Nobelprys vir Letterkunde aan Brodsky toegeken vir sy "alomvattende" literêre werk, die "klaarheid van sy gedagtes" en die "poëtiese intensiteit" van sy digkuns.[3] In 1991 is hy as die Verenigde State se Poet Laureate benoem.[4]

Anders as wat sy ballingskap in die VSA insinueer was Brodsky se literêre werk allesbehalwe sterk politiek gekleur. Eerder het hy in sy gedigte, wat dikwels in 'n meditatiewe styl geskryf is, universele vrae oor die menslike bestaan, lewe en dood gestel, en dit was juis sy standpunte ten gunste van individuele vryheid en anti-materialisme waaraan Sowjet-amptenare aanstoot geneem het.[5]

Verwysings[wysig | wysig bron]

Eksterne skakels[wysig | wysig bron]