Treviso

in Wikipedia, die vrye ensiklopedie
Jump to navigation Jump to search
Città di Treviso
Trevixo
Die Silerivier in Treviso
Die Silerivier in Treviso
Ligging van Città di Treviso op 'n kaart (Italië)
Città di Treviso
Città di Treviso
Koördinate: 45°40′20″N 12°14′32″O / 45.67222°N 12.24222°O / 45.67222; 12.24222Koördinate: 45°40′20″N 12°14′32″O / 45.67222°N 12.24222°O / 45.67222; 12.24222
Land Vlag van Italië Italië
Streek Flag of Veneto.svg Veneto
Provinsie Treviso
Romeinse municipium (Tarvisium) 89 v.C.
Regering
 - Burgemeester Mario Conte (Lega Nord)
Oppervlak
 - Stad 55,5 km²  (21,4 vk m)
Hoogte 15 m (49 vt)
Bevolking (31 Maart 2018)
 - Stad 85 136
 - Digtheid 1 531,8/km² (3 967,3/myl2)
Tydsone MET (UTC+1)
 - Somer (DST) MEST (UTC+2)
Poskode 31100
Skakelkode(s) 0422
Webwerf: comune.treviso.it

Treviso [tre'vizo], Venesiaans Trevixo, is 'n welvarende nedersetting en munisipaliteit (comune) in die Noordoos-Italiaanse streek Veneto met 'n bevolking van iets meer as 85 000. Treviso, wat as administratiewe setel van die gelyknamige provinsie dien, is in die Venesiaanse vlakte by die samevloeiing van die Botteniga- en Sile-riviere geleë, sowat 30 km noord van Venesië en 40 km noordoos van Padua. In ekonomiese opsig word die stadsnaam verbind met wêreldrolspelers soos De’Longhi en Benetton - twee ondernemings wat hul oorsprong in Treviso het en steeds vanuit die stad bestuur word - en sy Antonio Canova-lughawe (een van drie in Venesië en sy omgewing - genoem na die befaamde Venesiaanse beeldhouer). Dit is veral gewild by laekosterederye soos die Ierse Ryanair.

Canale dei Buranelli. Treviso se kanale en voetbrûe het aan die stad die bynaam "Klein-Venesië" besorg. Histories was Treviso in 1339 die eerste nedersetting in Veneto wat hom by die Venesiaanse Dogerepubliek aangesluit het. Vervolgens is dit uitgebou tot 'n vesting wat Venesië teen aanvalle uit die noorde sou beskerm. Kanale het deel uitgemaak van die konsep
Piazza dei Signori met die Palazzo dei Trecento
Via Calmaggiore is die belangrikste winkelstraat in die historiese middestad
Treviso se gewilde radicchio rosso
Tiramisù
In die argeologiese afdeling van Treviso se Musei Civici word antieke Romeinse glaskuns soos hierdie houer vertoon

Treviso, wat reeds in die antieke tydperk deur Kelte gestig is en in die 1ste eeu v.C. Romeinse stadstatus behaal het, het sy bloeitydperk tussen die 12de en 14de eeu beleef. Die elegante paleise op die plein Piazza dei Signori, waaronder die ou raadsaal Palazzo dei Trecento (begin in 1185 en genoem na die 300 lede van die stadsraad) in die Romaanse styl, dateer uit hierdie periode. Middeleeuse digters het na Treviso weens sy rustige en gesofistikeerde atmosfeer as "hoofse stad" of città cortese verwys. Die stad en sy omgewing was een van die gunstelingplekke van welvarende Venesiane wat hier in die 18de eeu paleise as somerverblyf laat bou het.[1]

Gedurende die Tweede Wêreldoorlog is voorrade vir die Duitse Weermag in Italië vanuit die stad versprei wat van Treviso 'n teiken vir hewige geallieerde lugaanvalle gemaak het. Groot dele van Treviso is hierdeur in puin gelê. Die historiese geboue in die middestad, wat tussen die gekanaliseerde rivierarms van Sile en Botteniga geleë is, is ná die oorlog keurig gerestoureer en tot hul oorspronklike toestand teruggebring.

Van Treviso se belangrikste argitektoniese besienswaardighede is die ryklik versierde fasades van woongeboue, veral in die stadsbuurt Calmaggiore. Hierdie tradisie het sy oorsprong in die Middeleeue toe plaaslike families gewedywer het om hul woonhuise, wat weens 'n gebrek aan waardevolle stene as boumateriaal hoofsaaklik van bakstene en hout gebou is, met kunsvolle en kleurryke fresko's te versier. Hierdie versierings het aan Treviso die bynaam "die geverfde stad" besorg.

Die waterryke omgewing van Treviso was van oudsher af 'n belangrike landboustreek, soos weerspieël in die stad se voortreflike kookkuns. So word die stadsnaam onder meer verbind met prosecco-vonkelwyn (Veneto se Prosecco-heuwels is noord van Treviso geleë), die befaamde Italiaanse koffiekoek-nagereg Tiramisù (wat in 1962 vir die eerste keer in die plaaslike restaurant Alle Beccherie voorgesit is[2]), en die radicchio rosso of rooi Italiaanse sigoreiwortel (in Italië dikwels ook radicchio trevigiano of radicchio di Treviso genoem[3]). Met sy sagte note van bitterheid word dit as slaai voorgesit, gebraai of gesoteer. Elke jaar in Desember word in Treviso 'n gastronomiese fees gevier waarin die radicchio sentraal staan.

Die geskiedenis van Veneto se wol-, sy- en tekstielbedryf strek terug tot in die 14de eeu toe sywewers uit Toskane hulle as politieke vlugtelinge hier gevestig het. Tekstiele uit Veneto is na Venesië se oorsese besittings en ander Mediterreense markte uitgevoer. Omrede Venesië nie oor riviere beskik het waarlangs tekstielmeule gevestig kon word nie, is Venesiaanse tekstiele in Treviso verwerk. Treviso is steeds die setel van Italiaanse tekstielondernemings wat met hul gesofistikeerde luukse produkte soos katoen en wol en verwerkte tekstiele belangrike rolspelers op die wêreldmark is. Op 11 April 2019 was Treviso saam met Venesië danksy die inisiatief van Benetton die gasheerstad van die Internasionale Woltekstielorganisasie (IWTO) se 88ste jaarlikse kongres wat tussen 9 en 11 April gehou is.[4][5]

Verwysings[wysig | wysig bron]