Pakistanse Krieketraad
| Pakistanse Krieketraad | |
|---|---|
 Kenteken van die Pakistanse Krieketraad
| |
| Engelse naam | Pakistan Cricket Board |
| Afkorting | PCB |
| Oerdoenaam | پاکستان کرکٹ بورڈ |
| Land |  Pakistan
|
| Sportsoort | Krieket |
| Gestig op | 1 Mei 1949 |
| Lid van | Internasionale Krieketraad |
| Aangesluit op | 28 Julie 1952 |
| Vastelandse beheerliggaam | Asiatiese Krieketraad |
| Voorsitter | Najam Sethi |
| Hoof- uitvoerende beampte | Faisal Hasnain |
| Setel | Gaddafistadion, Lahore, Pakistan |
| Amptelike tale | Engels en Oerdoe |
| Amptelike webwerf | pcb.com.pk |
Die Pakistanse Krieketraad (Engels: Pakistan Cricket Board, afgekort “PCB”; Oerdoe: پاکستان کرکٹ بورڈ), voorheen bekend as die Raad vir Beheer van Krieket in Pakistan (Board of Control for Cricket in Pakistan, “BCCP”), is die bestuursliggaam wat krieket in Pakistan beheer. Die raad is by die Internasionale Krieketraad (IKR) geaffilieer[1] en organiseer verskeie nasionale spanne, insluitend Pakistan se nasionale seniorkrieketspan vir mans (die Shaheens, Green Shirts, Men in Green of Cornered Tigers), vroue en jeug. Hulle is ook verantwoordelik vir die bestuur en organisasie van toets-, EDI- en T20I-reekse teen ander spanne, en vir die reëling van internasionale wedstryde tuis. Daarbenewens is die Pakistanse Krieketraad verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Pakistanse span. Die Pakistanse Krieketraad het al opgetree as medegasheer van belangrike toernooie soos die krieketwêreldbekertoernooie in 1987 (saam met Indië) en 1996 (saam met Indië en Sri Lanka). Pakistan sal die komende Kampioenetrofee 2025 ook aanbied.[2]
Nadat Pakistan onafhanklik geword het van die Britse Ryk in 1947, het professionele en amateurkrieket in dieselfde jaar begin, aangesien plaaslike infrastruktuur reeds gevestig was toe die land deel was van die Britse Raj. Die Pakistanse Krieketraad is op 1 Mei 1949 as Raad vir Beheer van Krieket in Pakistan gestig.[3] Sedert 28 Julie 1952 is Pakistan ’n volle lid van die Internasionale Krieketraad (IKR) – op aanbeveling deur Indië – en mag dus toetskrieket speel, wat na die belangrikste en vernaamste internasionale krieketwedstryde verwys.[4][5]
Kinders en jongmense word reeds op skool aan krieket bekend gestel en na gelang van hul belangstelling en talent begin hul met hul afrigting. Nes ander krieketnasies beskik Pakistan oor ’n o/19-nasionale span wat aan die o/19-krieketwêreldbeker deelneem.[6] Pakistan A, oftewel Pakistan Shaheens, is die tweede nasionale span van Pakistan en van hul wedstryde geniet eersterangse of A-lys-status. Die belangrikste krieketligas in Pakistan is die Quaid-e-Azam-trofee in eersterangse krieket (ses spanne), die Pakistanse Beker in A-lys-krieket (ses spanne) en die Pakistanse Superliga in T20-krieket (ses spanne).
Verwysings[wysig | wysig bron]
- ↑ (en) "Pakistan Cricket Board". Internasionale Krieketraad. Besoek op 24 Junie 2021.
- ↑ (en) Nagraj Gollapudi (16 November 2021). "USA co-hosts for 2024 T20 WC, Pakistan gets 2025 Champions Trophy, India and Bangladesh 2031 World Cup". ESPNcricinfo. Besoek op 5 Mei 2023.
- ↑ (en) Ikram Bari Cheema (11 November 2014). "A history of cricket in Pakistan". Tribune. Besoek op 24 Junie 2021.
- ↑ (en) "Pakistan". Internasionale Krieketraad. Besoek op 24 Junie 2021.
- ↑ (en) Rowland Bowen. "Some dates in Pakistan cricket history". ESPNcricinfo. Besoek op 24 Junie 2021.
- ↑ (en) Martin Williamson. "A brief history: The Under-19 World Cup". ESPNcricinfo. Besoek op 24 Junie 2021.
Eksterne skakels[wysig | wysig bron]
- (en) (ur) Die Pakistanse Krieketraad se tuisblad
| Nasionale Krieketrade van die Internasionale Krieketraad | 
|
||
|---|---|---|---|
|
Afghanistan • Australië • Bangladesj • Engeland • Ierland • Indië • Nieu-Seeland • Pakistan • Sri Lanka • Suid-Afrika • Wes-Indië • Zimbabwe | |||