Gaan na inhoud

Raad vir Beheer van Krieket in Indië

in Wikipedia, die vrye ensiklopedie
Raad vir Beheer van Krieket in Indië
Kenteken van die Raad vir Beheer van Krieket in Indië
Kenteken van die Raad vir Beheer van Krieket in Indië
Engelse naam Board of Control of Cricket in India
Afkorting BCCI
Hindinaam भारतीय क्रिकेट नियंत्रण बोर्ड
Land Vlag van Indië Indië
Sportsoort Krieket
Stigting 1928
Lid van Internasionale Krieketraad
Aangesluit op 31 Mei 1926
Vastelandse beheerliggaam Asiatiese Krieketraad
President Roger Binny
Hoof- uitvoerende beampte Hemang Amin
Setel Wankhedestadion, Churchgate, Mumbai, Maharashtra, Indië
Amptelike tale Engels en Hindi
Amptelike webwerf bcci.tv

Die Raad vir Beheer van Krieket in Indië (Engels: Board of Control of Cricket in India, afgekort “BCCI”; Hindi: भारतीय क्रिकेट नियंत्रण बोर्ड) is die bestuursliggaam wat krieket in Indië beheer. Die beheerliggaam is in 1928 gestig en by die Wankhedestadion in Mumbai gesetel. Sedert 1926 verteenwoordig dit Indië by die Internasionale Krieketraad (IKR) as ’n volle lid en sedert 1983 ook by die Asiatiese Krieketraad (Asian Cricket Council, ACC).

Geskiedenis

[wysig | wysig bron]

Die Raad vir Beheer van Krieket in Indië is in 1928 in in die destydse Brits-Indië gestig.[1] Op 31 Mei 1926 het die Indiese beheerliggaam saam met sy Nieu-Seelandse en Wes-Indiese eweknieë volle lede geword van die Imperiale Krieketkonferensie (IKK; nou Internasionale Krieketraad, IKR) wat voorheen slegs uit die Marylebone-krieketklub (MKK) en verteenwoordigers uit Australië en Suid-Afrika bestaan het. Hulle mag dus toetskrieket speel, wat na die belangrikste en vernaamste internasionale krieketwedstryde verwys.[2] Daarbenewens was die Indiese beheerliggaam in 1983 ’n stigtingslid van die Asiatiese Krieketkonferensie (Asian Cricket Conference, ACC; nou Asiatiese Krieketraad).[3]

Die BCCI is een van die rykste sportbeheerliggame wêreldwyd. Sy mediaregte-inkomste vir die Indiese toernooie vir die periode 2006–2010 het VS$ 612 000 000 beloop.[4] Met sy sterk finansiële bande in die krieketwêreld het die BCCI al herhaaldelik weerstand ontbied teen die IKR se toerskedule, en op meer toetsreekse teen Australië en Engeland aangedring, aangesien hulle hiermee meer inkomste verdien as met ’n toetsreeks teen Bangladesj of Zimbabwe.[5] In die verlede het die BCCI met die IKR ook oor borgskappe[6] en die Kampioenetrofee se bestaansrede verskil.

Taak

[wysig | wysig bron]

Die Raad vir Beheer van Krieket in Indië organiseer verskeie nasionale spanne, insluitend Indië se nasionale seniorkrieketspan vir mans (die Men in Blue of Team India), vroue en jeug. Hulle is ook verantwoordelik vir die bestuur en organisasie van toets-, EDI- en T20I-reekse teen ander spanne, en vir die reëling van internasionale wedstryde tuis. Daarbenewens is die Raad vir Beheer van Krieket in Indië verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Indiese span.

Daarbenewens bestuur die beheerliggaam kinder- en jeugkrieket in Indië. Net soos ander krieketlande beskik Indië oor ’n o/19-nasionale span wat aan die o/19-krieketwêreldbeker deelneem.[7] Indië A is die tweede nasionale span van Indië en van hul wedstryde geniet eersterangse of A-lys-status.

Die beheerliggaam reël ook die plaaslike kompetisies. Die belangrikste krieketligas in Indië is die Ranji-trofee in eersterangse krieket (38 spanne), die Vijay Hazare-trofee in EDI-krieket (38 spanne) en die Indiese Premierliga in T20-krieket (tien spanne).

Die Raad vir Beheer van Krieket in Indië organiseer ook gereeld internasionale toernooie. Hulle het al opgetree as gasheer van die krieketwêreldbekertoernooie in 1987 (saam met Pakistan), 1996 (saam met Pakistan en Sri Lanka), 2011 (saam met Bangladesj en Sri Lanka) en 2023 (alleenlik), asook die Kampioenetrofee 2006 en die T20I-wêreldbeker 2016. Indië is ook aangewys as gasheer van die T20I-wêreldbeker 2026 (saam met Sri Lanka), Kampioenetrofee 2029 (alleenlik) en Krieketwêreldbeker 2031 (saam met Bangladesj).[8]

Verwysings

[wysig | wysig bron]
  1. ↑ (en) "Unbeaten innings: BCCI and its role in making cricket a religion in India". India Today. 21 Augustus 2017. Besoek op 16 Februarie 2024.
  2. ↑ (en) "Board Of Control For Cricket In India". Internasionale Krieketraad. Besoek op 16 Februarie 2024.
  3. ↑ (en) "Inaugural Meeting of The Asian Cricket Conference on 19th and 20th September 1983, New Delhi, India". Asiatiese Krieketraad. Besoek op 16 Februarie 2024.
  4. ↑ (en) "Nimbus Bags Cricket Rights for $612 m". The Hindu. 23 April 2011. Besoek op 16 Februarie 2024.
  5. ↑ (en) "ICC faces threat from India". ESPNcricinfo. 2 Januarie 2006. Besoek op 16 Februarie 2024.
  6. ↑ (en) "India challenge ICC". Television New Zealand. Geargiveer vanaf die oorspronklike op 8 Februarie 2007. Besoek op 8 Februarie 2007.
  7. ↑ (en) Martin Williamson (11 Januarie 2006). "The Under-19 World Cup". ESPNcricinfo. Besoek op 16 Februarie 2024.
  8. ↑ (en) Nagraj Gollapudi (16 November 2021). "USA co-hosts for 2024 T20 WC, Pakistan gets 2025 Champions Trophy, India and Bangladesh 2031 World Cup". ESPNcricinfo. Besoek op 16 Februarie 2024.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Raad_vir_Beheer_van_Krieket_in_Indië&oldid=2665591"