Tirreense See

in Wikipedia, die vrye ensiklopedie
Spring na: navigasie, soek
Die Tirreense See
Die Golf van Gaeta (Latium)

Die Tirreense See (Italiaans: Mar Tirreno, Frans: Mer Tyrrhénienne) maak deel uit van die Middellandse See en lê wes van Italië tussen die vasteland, Korsika, Sardinië en Sisilië. In die Golf van Genua grens dit in die noorde aan die Liguriese See en word in die weste deur Korsika en Sardinië, in die ooste deur Toskane, Latium (Lazio), Kampanië en Kalabrië, en in die suide deur Sisilië begrens.

Seestrate[wysig]

Die Seestraat van Messina met 'n wydte van drie kilometer verbind die Tirreense met die Ioniese See. Ander belangrike seestrate is die Korsikakanaal tussen Italië en Korsika met 'n wydte van sowat 80 kilometer, die Seestraat van Bonifacio tussen Korsika en Sardinië met 'n wydte van elf kilometer, die Sardiniese Kanaal tussen Sardinië en Tunisië met 'n wydte van 200 kilometer, en die Seestraat van Sisilië tussen Tunisië en Sisilië met 'n wydte van 160 kilometer.

Geologie en klimaat[wysig]

Die Tirreense See bereik 'n maksimale diepte van 3 785 meter en lê naby die geologiese breuklyn tussen die Europese en Afrika-vastelande, wat deur onderseese bergreekse en aktiewe vulkane soos Marsili gekenmerk word.

Die belangrikste winde, wat in die gebied optree, is die Mistral uit die Rhônevallei, die Libeccio uit die suid-ooste en die Ostro uit die suide.

Etimologie[wysig]

Die naam is ontleen aan die Griekse woord vir die Etruskers, Tyrrhenoi. Hulle het na bewering onder die leierskap van prins Tyrrhenus oorspronklik uit Lidië in Klein-Asië gekom en hulle in die kusgebied van die huidige Toskane gevestig. Die Etruskers het die seegebied langs hulle gebied die "Etruskiese See" genoem.

Mitologie[wysig]

Volgens die Griekse mitologie het die rotswande bo-oor die Tirreense See die vier winde gehuisves, wat deur Aeolus beheer is.