Capital Park

in Wikipedia, die vrye ensiklopedie
Capital Park
Capital Park is in Gauteng
Capital Park
Capital Park
 Capital Park se ligging in Gauteng
Koördinate: 25°43′38″S 28°11′19″O / 25.72722°S 28.18861°O / -25.72722; 28.18861Koördinate: 25°43′38″S 28°11′19″O / 25.72722°S 28.18861°O / -25.72722; 28.18861
LandVlag van Suid-Afrika Suid-Afrika
ProvinsieGauteng
MunisipaliteitStad Tshwane
Oppervlak
 • Totaal3,42 km2 (1,32 vk. myl)
Bevolking
 (2011)[1]
 • Totaal8 094
 • Digtheid2 367/km2 (6 130/vk. myl)
Rasverdeling (2011)
 • Wit mense65.4%
 • Indiërs/Asiërs1.5%
 • Bruin mense2.8%
 • Swart mense29.6%
 • Ander0.6%
Taal (2011)
 • Afrikaans 60.7%
 • Engels 19.6%
 • Noord-Sotho 3.4%
 • Zoeloe 2.5%
 • Ander 6.0%
Poskode (strate)
0084
Poskode (posbusse)
Geen
Skakelkode012
Die Steve Biko Akademiese Hospitaal in Capital Park, Pretoria

Capital Park is een van Pretoria se oudste en eerste voorstede en lê sowat 4 km noord van die geskiedkundige Kerkplein, agter die Pretoria Nasionale Dieretuin. Die woonbuurt word omgrens deur die Witwatersberge aan die suidekant en die Apiesrivier aan die westekant. Die woonbuurt strek vanaf die Apiesrivier tot by Voortrekkerweg. Strate in die woonbuurt is vernoem na vroeë burgemeesters van Pretoria (Venterstraat, Malherbestraat, Van Heerdenstraat, Myburgstraat). Een van die voormalige burgemeesterswonings is in Capital Park. Capital Park was voorheen 'n baie gewilde buurt onder Italiaanse, asook Portugese gemeenskappe – die Portugese Kerk is steeds in Van Heerdenstraat (2010). Die woonbuurt is vandag kosmopolities, met oorwegend Afrikaanssprekende inwoners. CAPRPA (Capital Park Inwoners en Belastingbetalers Vereniging) funksioneer as inwonersvereniging om na die belange van die buurt se inwoners om te sien.

Skole in Capital Park sluit in Hoërskool Langenhoven, Capital Park Primary School en Laerskool Generaal Jacques Pienaar. Verskeie Afrikaanse en Engelse kerke is in Capital Park gevestig.

Capital Park is sentraal geleë met die volgende inkopiesentrums sowat 10 minute se ry vanaf die woonbuurt: Wonderboom Junction, Jakaranda Sentrum, Gezina Galleries. Hospitale in die omgewing sluit in: Eugene Marais Life Hospitaal en die Steve Biko Akademiese Hospitaal.

Die klimaat is sub-tropies teen die hange van die Witwatersberge (Malherbe en Venterstraat). Die ligging, as gevolg van die Pretoria Nasionale Dieretuin, bied volop voëllewe.

Trouwstraat en Flowersstraat loop deur Capital Park en is belangrike skakelroetes tussen die noordoostelike en westelike voorstede van Pretoria. Paul Krugerstraat dien as hoofroete tussen noordelike voorstede en die Pretoria sentrale sakesentrum. Capital Park is algemeen bekend as 'n gunsteling woonbuurt vir die hoofstad se kunstenaarsgemeenskap. Capital Park is sowat 2 km van die Tshwane-Universiteit van Tegnologie (TUT) en 'n gunsteling studentebuurt. Capital Park is ook die tuiste van die wêreldbekende ROVOS RAIL – 'n luukse outydse treindiens.

In 2002 het plaaslike kunstenaars 'n borsbeeld van 'n vrou (Beaula), deur plaaslike kunstenaar Johan Blignaut, "onwettig" in die Apiesrivier opgerig. Die oprigting van die borsbeeld het wye mediadekking geniet. Die Tshwane Metroraad het plaaslike kunstenaars skriftelik kennis gegee om die borsbeeld binne 7 dae te verwyder of aanspreeklikheid te aanvaar vir koste aangegaan deur die Metroraad om die beeld te verwyder. Verset deur die plaaslike gemeenskap, asook wye mediadekking, het verseker dat Beaula 'n permanente tuiste in Capital Park kon verkry. Beaula het egter in die daaropvolgende jaar (2003) onverklaarbaar verdwyn, nadat die magtige Apiesrivier in vloed was. 'n Afdruk van die oorspronklike Beaula-beeld het in 2003 'n permanente rusplek langs die Apiesrivier gekry.

Die Metroraad se reaksie op die plasing van die Beaula-standbeeld het 'n positiewe impak op Capital Park gehad. Aan die einde van November 2002 is die Capital Meander Kunsroete in Capital Park gevestig, met die oogmerk om plaaslike kunstenaars se kuns te bevorder en om Capital Park as die hoofstad se "kunsvoorstad" te vestig. Die kunsroete bestaan ondermeer uit 'n verskeidenheid kunsgalerye, koffiehuise, die Mimi Coertse Museum van Afrikaans en 'n wynkelder.

Meer kuns vir die Kunsvoorstad[wysig | wysig bron]

'n Totaal van 3 nuwe borsbeelde/kunswerke het sedert die oprigting van Beaula 'n tuiste in Capital Park gekry.

Capital Park, as gevolg van sy ligging en sub-tropiese klimaat, is bekend vir die groot aantal avokadobome in die buurt. In 2007 is 'n jaarlikse kunstefees, "AvoDazz Kuns, Kultuur en Toerismefees" begin en vind jaarliks gedurende Mei plaas. Die Capital Kunsmark is 'n maandelikse kunsmark wat elke laaste Sondag van die maand in Wespark, Flowerstraat, Capital Park gehou word.

Verwysings[wysig | wysig bron]

  1. 1,0 1,1 1,2 1,3 "Subplek Capital Park". Sensus 2011.


Hierdie artikel omtrent 'n plek in Pretoria en omgewing is slegs ’n saadjie. Jy kan Wikipedia help deur dit uit te brei.