Kleinfontein

in Wikipedia, die vrye ensiklopedie
Kleinfontein
Kleinfontein is in Gauteng
Kleinfontein
Kleinfontein
Koördinate: 25°49′55″S 28°30′3″O / 25.83194°S 28.50083°O / -25.83194; 28.50083Koördinate: 25°49′55″S 28°30′3″O / 25.83194°S 28.50083°O / -25.83194; 28.50083
LandVlag van Suid-Afrika Suid-Afrika
ProvinsieGauteng
Metropolitaanse MunisipaliteitStad Tshwane
Oppervlak
 • Totaal8,6 km2 (3,3 vk. myl)
Hoogte
1 448 m (4 751 ft)
Bevolking
 • Totaal650
TydsoneUTC+2 (SAST)
Webwerfhttp://www.kleinfontein.net/

Kleinfontein is 'n jong nedersetting naby Pretoria, Suid-Afrika, waarvan die inwoners deur hul aandeelhouer-reëls tot Afrikaanssprekende Christene beperk word. Kleinfontein-plaas is in 1992 aangekoop en is sedert die middel 1990s ontwikkel as 'n Afrikaner-enklawe met 'n beperkte ekonomie. Alhoewel dit 'n plaas met woonhuise eerder as 'n dorpsgebied is, het dit teen 2017 reeds 'n inwonertal van 1 200 mense en 'n laerskool gehad.[1] Orania word as hul sustersdorp beskou.

Ligging[wysig | wysig bron]

Kleinfontein is geleë tussen Pretoria en Bronkhorstspruit. Dit lê net suid van die N4 en net wes van die R515, 'n paar kilometer suid van Rayton.

Inwoners[wysig | wysig bron]

Dit is gestig deur afstammelinge van die oorspronklike Voortrekkers en Boere wat selfbeskikking in 'n outonome volkstaat soek. Dit is 'n poging om die ideaal van 'n volkstaat van sommige Afrikaners te verwesenlik. Kleinfontein is een van twee slegs-Afrikaner enklawe in Suid-Afrika, die ander synde Orania.[2]

Regstatus en leefwyse[wysig | wysig bron]

Na 'n 9 maande lange proses is Kleinfontein op 16 Maart 2018 van 'n koöperasie na 'n aandeleblokskema omskep,[3] en is in hierdie opsig soortgelyk aan Orania. Deelname geskied deur kontrakte wat lede se verpligtinge en vererfbare gebruiksreg uitstippel,[3] en effektief neerkom op verblyfreg in 'n plaasgebied met 'n aandeelblokskema as vorm van eiendomsreg.

Die gemeenskap se gestelde doelwit is om hul eiendom te ontwikkel tot leefruimte vir vryheidsgesinde Boere-Afrikaners, waarbinne alle fasette van hul eiesoortige volksbestaan vrylik, onverhinderd en onbedreigd uitgeleef kan word. Hieronder tel veral hul Christengeloof, Afrikaanse taal en volkskultuur. 'n Welvarende plaaslike ekonomie word nagestreef wat op volkseie arbeid gevestig is. In praktyk behels dit dat alle tuinwerk en tuinbou, huis- en konstruksiewerk net deur Afrikaners verrig word.[1] Nie-Afrikaners kan wel aflewerings doen onder toesig van 'n veiligheidswag. Die inwoners beskou hulself nie as rassiste nie, maar wel as mense wat weens veiligheids- en ander oorwegings in 'n aparte eerder as gemengde bestel wil lewe.[1] Die post-1993 bestel in Suid-Afrika word gesien as 'n bedreiging vir Afrikaner werkskepping, benewens hul kultuur en beskouing van die geskiedenis. Joernaliste het gevind dat die jonger geslag van Kleinfontein oorwegend dieselde oortuigings as hul ouers huldig.[1]

Sien ook[wysig | wysig bron]

Verwysings[wysig | wysig bron]

  1. 1,0 1,1 1,2 1,3 Segalov, Michael; Kakó, Jonas (8 Februarie 2017). "The white South Africans longing for Apartheid's return ― Stuck in the past". Art and Culture. huckmag.com. Huck. Besoek op 26 Augustus 2021.
  2. Kleinfontein se webwerf Geargiveer 16 Maart 2009 op Wayback Machine, besoek op 5 April 2010.
  3. 3,0 3,1 Kleinfontein nou Aandeleblok, Selfbeskikking, 8 Augustus 2018, facebook