Vlag van Macau

in Wikipedia, die vrye ensiklopedie
Jump to navigation Jump to search
Vlag van Macau
Vlag van Macau
Gebruik Nasionale vlag en Staatsvaandel Nasionale vlag en staatsvaandel
Verhouding 2:3
Goedgekeur 31 Maart 1993[1]
Gebruik sedert 20 Desember 1999
Ontwerp ’n Enkele groen baan met, in die middel, ’n gestileerde lotusblom oor die Ponte Governador Nobre de Carvalho, onder ’n boog van vyf goue vyfpuntige sterre.
Ontwerp deur Yahun Bang
Streeksvlag van die Macau Spesiale Administratiewe Streek van die Volksrepubliek China
Name (taalvariante)
Tradisionele Chinees   中華人民共和國澳門特別行政區區旗
Vereenvoudigde Chinees   中华人民共和国澳门特别行政区区旗
Pinyin Zhōnghuá Rénmín Gònghéguó Àomén Tèbié Xíngzhèngqū Qūqí
Kantonees Jūng'wàh Yàhnmàhn Guhng'wòhgwok Oumún Dahkbiht Hàhngjing Kēui Kēuikèih
Jyutping Zung1waa4 Jan4man4 Gung6wo4gwok3 Ou3mun2 Dak6bit6 Hang4zing3 Keoi1 Keoi1kei4
Ander name Bandeira regional da Região Administrativa Especial de Macau da República Popular da China (Portugees)

Die vlag van Macau (amptelik die streeksvlag van die Macau Spesiale Administratiewe Streek van die Volksrepubliek China) is op 31 Maart 1993 deur die Nasionale Volkskongres goedgekeur en is sedert 20 Desember 1999 in gebruik. Die vlag vertoon ’n enkele groen baan met, in die middel, ’n gestileerde lotusblom oor die Ponte Governador Nobre de Carvalho onder ’n boog van vyf goue vyfpuntige sterre waarvan die middelste groter as die res is.

Simboliek[wysig | wysig bron]

Die lotusblom is gekies as Macau se blomembleem. Die Ponte Governador Nobre de Carvalho is ’n brug wat die Macau-skiereiland met die eiland Taipa verbind. Die brug is een van die bekendste landmerke van die gebied. Die water onder die lotusblom stel Macau se posisie as ’n hawe en die rol wat dit in die gebied gespeel het, voor. Die vyfpuntige sterre verwys na die ontwerp van die vlag van die Volksrepubliek China en stel Macau se verhouding met die Volksrepubliek China voor.

Ontwerp[wysig | wysig bron]

Volgens die grondwet van Macau is die streeksvlag van Macau ’n groen vlag met vyf sterre, lotusblom, brug en seewater. Hierdie wet het ook vasgestel dat, buiten die vertoon van die vlag van die Volksrepubliek China, die Macau Spesiale Administratiewe Streek ook ’n streeksvlag mag gebruik.[2]

Geskiedenis[wysig | wysig bron]

Portugese oorheersing[wysig | wysig bron]

Voor Macau se oorhandiging in 1999 deur die Portugese Republiek aan die Volksrepubliek China, dus van 1557 tot 1999, het Macau amptelik slegs die Portugese vlag gebruik. Dit is in teenstelling met Hongkong wat onder Britse oorheersing ’n Britse blou vaandel met ’n wapen op die wapperkant naas die Unievlag as sy vlag gebruik het. In 1967 was daar voorstelle om aan elk van Portugal se oorsese provinsies sy eie vlag toe te ken bestaande uit die Portugese vlag met die plaaslike wapenskild, maar geeneen hiervan is ooit aanvaar nie.[3]

In 1975 is ’n vlag vir die Portugese koloniale regering van Macau in gebruik geneem. Dit was ’n ligblou agtergrond met die amptelike wapenskild van die Portugese kolonie van Macau in die middel. Gedurende die Portugese administrasie het hierdie vlag ook die Macau-streek by internasionale forums verteenwoordig, hoewel dit nie die amptelike vlag van die kolonie was nie.

Daar was ’n nieamptelike variant van die vlag van die Portugese koloniale regering van Macau. Dit was sonder die muurkroon wat die kastele van die Koninkryk Algarve in die wapenskild voorgestel het, en het die woorde ““Governo de Macau” met “Macau” vervang. Hierdie vlag is by die Universiteit van Macau opgespoor in ’n foto van ’n internasionale universiteitesporttoernooi waar dit in die parade gebruik is. Hoewel hierdie vlag nooit amptelik gebruik is nie, het sommige sportmedia dit in plaas van die Portugese vlag gebruik om Macau voor te stel.

Daar was ’n vlag van die regering van Macau waarop die kolonie se wapenskild op ’n ligblou baan verskyn het.[4]

Die Leal Senado-munisipaliteit van Macau het ook ’n vlag gehad met ’n wapenskild in Portugese styl met twee engele as skildhouers. Dié vlag is gedurende die oorgawe in 1999 gebruik. Insgelyks het die Ilhas-munisipaliteit in 1975 ’n eie vlag ontvang bestaande uit ’n oranje agtergrond met Ilhas se wapenskild in die middel.

Ander vlae[wysig | wysig bron]

1993-voorstelle[wysig | wysig bron]

Die gekose vlag van Macau

In 1993 is verskeie voorstelle aan die hand gedoen.[5]

  • ’n Vertikale tweekleur van groen-rooi wat aan die Portugese vlag herinner, met ’n gestileerde lotusblom in die middel
  • ’n Horisontale driekleur in rooi-wit-rooi met ’n gestileerde “M” wat vir “Macau” staan; ’n groot ster daaroor en vier sterre daaronder verteenwoordig die Volksrepubliek China.
  • Soortgelyk aan die huidige vlag van Macau, maar die lotusblom is anders gestileer en op ’n skyf met die sterre binne die blom
  • ’n Horisontale driekleur in rooi-wit-rooi; die middelbaan met ’n afbeelding van die St. Paulus-katedraal in Macau
  • ’n Gestileerde rooi en blou “M” met ’n groot wit vyfpuntige ster daaroor en ’n rooi lotusblom daarin effens na die vlagpaalkant met twee dun horisontale bane daaronder
  • Soortgelyk aan die huidige vlag maar in rooi en die embleem het nie die brug en water nie.
  • ’n Gestileerde lotusblom met ’n boog van geel sterre op ’n rooi agtergrond (in etlike variasies)
  • ’n Afbeelding van die Guia Vesting-vuurtoring, die oudste vuurtoring in Asië, onder ’n goue ster; ’n wit ligkrans form om die vuurtoring en twee ligkeëls verdeel die vlag in rooi (bo) en blou (onder)
  • ’n Vertikale tweekleur van groen-rooi wat aan die Portugese vlag herinner, met ’n wit seemeeu in die boonste helfte en ’n wit afbeelding van die Ponte Governador Nobre de Carvalho in die onderste helfte
  • ’n Rooi driehoek met die basis aan die vlagpaalkant en spits aan die wapperkant waarin die vyf sterre van die vlag van die Volksrepubliek China vertoon word en die boonste en onderste helftes in groen is
  • ’n Afbeelding van die Ponte Governador Nobre de Carvalho in die middel van ’n rooi baan met die vyf goue sterre van die Chinese vlag daaroor

Sien ook[wysig | wysig bron]

Verwysings[wysig | wysig bron]

  1. (en) "Macau". Flags of the World. Besoek op 11 Oktober 2020.
  2. (en) "Grondwet van die Macau Spesiale Administratiewe Streek van die Volksrepubliek China". Geargiveer vanaf die oorspronklike op 5 Februarie 2012.
  3. (en) "Macao – 1967 Kolonialevlagvoorstel". Geargiveer vanaf die oorspronklike op 14 Julie 2014.
  4. (en) Die oorhandiging – ’n persoonlike vertelling
  5. (en) 1993-voorstelle vir Macau se vlag

Eksterne skakels[wysig | wysig bron]

Hierdie artikel is in sy geheel of gedeeltelik vanuit die Engelse Wikipedia vertaal.