Vlag van Thailand

in Wikipedia, die vrye ensiklopedie
Spring na: navigasie, soek
Vlag van Thailand
Vlag van  Thailand
Bynaam (th) Trairanga (ธงไตรรงค์), Thong Trairong), "Driekleurvlag"
Gebruik Nasionale vlag en Burgerlike- en Staatsvaandel Nasionale vlag en burgerlike- en staatsvaandel
Verhouding 2:3
Goedgekeur 28 September 1917
Ontwerp Vyf horisontale bane in die rooi, wit, blou, wit en rooi
Ontwerp deur Koning Vajiravudh (Rama VI)

Die nasionale vlag van Thailand (Thai: ธงไตรรงค์ Trairanga, Thong Trairong, "Driekleurvlag") is op 28 September 1917 amptelik in gebruik geneem. Die vlag vertoon vyf horisontale bane in rooi, wit, blou, wit en rooi. Thailand vier sedert 2016 hul nasionale vlagdag op 28 September, en dit is ook ’n openbare vakansiedag in Thailand.[1]

Simboliek[wysig | wysig bron]

Van die kleure word gesê dat dit volk-geloof-koning (’n nie-amptelike leuse van Thailand) voorstel,[2] rooi vir die land en die volk, wit vir gelowe en blou vir die monargie. Blou was ook die kleur wat Rama VI gekenmerk het. Die koning het in Julie 1917 oorlog teen Duitsland verklaar; gevolglik is opgemerk dat die vlag dieselfde kleure as dié van Brittanje, Frankryk, Rusland en die Verenigde State gehad het, wat op simpatie met die Geallieerdes gedui het.[3]

Ontwerp[wysig | wysig bron]

Die Vlagwet van BE 2522 (1979 CE)[4] stipuleer die ontwerp van die vlag as “reghoekig in vorm met in die verhouding van 6 by 9 dele, verdeel in vyf bane deur die wydte van die vlag; met die middelste baan twee dele hoog in donkerblou, die wit bane elk een deel hoog aan weerskante van die blou baan, en die rooi bane elk een deel hoog aan die buitekant van die wit bane. Die Nasionale Vlag sal as die Tri-Rong-vlag bekend staan”.[5]

Konstruksietekening

Kleure[wysig | wysig bron]

Die kleure van die vlag is in ’n aankondiging van die Kantoor van ide Eerste Minister aangekondig en op 4 Oktober 2017 in die Thai Staatskoerant gepubliseer. Dit verskaf aanbevole waardes vir die bepaling van die standaardkleure van fisiese materiaalvlae, soos volg in die CIELAB-kleurruimte onder Ligbron D65 gedefinieer:[6]

Kleur L* a* b* ΔE* Heksadesimaal
Wit 96.61 -0.15 -1.48 Niks meer as 1.5 #FFFFFF
Rooi 36.4 55.47 25.42 Niks meer as 1.5 #ED1C24
Blou 18.63 7.89 -19.45 Niks meer as 1.5 #241D4F

Geskiedenis[wysig | wysig bron]

Die eerste vlag wat vir Siam gebruik is, is waarskynlik ’n effekleurige rooi vlag, vir die eerste keer deur Koning Narai (1656–1688) gebruik. Vlootvlae het later verskillende simbole op die rooi agtergrond gebruik — ’n wit chakra (die Boeddhiste wiel), ’n wit olifant binne die chakra, of ’n wit skyf met ’n son daarbinne.

Die eerste vlag is amptelik in 1855 deur Koning Mongkut (Rama IV) geskep. Dit het ’n wit olifant (’n koninklike simbool) op ’n rooi agtergrond vertoon, aangesien die effekleurige vlag nie uitsonderlik genoeg vir internasionale verhoudinge was nie.

In 1916 is die vlag verander na die huidige ontwerp, maar met die middelste kleur dieselfde as die buitenste baan. Koning Vajiravudh (Rama VI) het die vlag blykbaar tydens ’n vloed onderstebo sien hang. Om te keer dat dit weer gebeur het hy ’n nuwe vlag ontwerp wat simmetries is. In 1917 is die middelste kleur na blou verander, die kleur vir Saterdag, die dag waarop Koning Vajiravudh gebore is. Volgens ander bronne is die blou kleur gekies om solidariteit met die Geallieerde Magte tydens die Eerste Wêreldoorlog, wat ook die kleure blou-rooi-wit in hulle vlae gehad het, te toon.

Vorige vlae[wysig | wysig bron]

Ander vlae[wysig | wysig bron]

Die vlootvaandel van Thailand ((th) ธงราชนาวี) is in 1917 aangeneem. Dit is soortgelyk aan die nasionale vlag, maar het ’n rooi skyf in die middel wat strek tot by die rooi bane aan die bo- en onderkant. In die skyf is ’n wit olifant, in volle mondering, wat in die rigting van die vlagpaal staan. Die handelsvlag van Thailand ((th) ธงฉาน) is ook in 1917 aangeneem. Dit is die nasionale vlag wat die embleem van die Koninklike Thailandse Vloot in die middel het. Die ontwerp van die regimentele kleure van RTN is dieselfde as dié van die vlag.

Soortgelyke vlae[wysig | wysig bron]

Bronne[wysig | wysig bron]

Eksterne skakels[wysig | wysig bron]

Verwysings[wysig | wysig bron]

  1. (th) การฉลองครบรอบ 100 ปี การประกาศใช้ธงไตรรงค์ เป็นธงชาติไทย Retrieved 26 September 2017.
  2. (en) "Thailand: 'n Landstudie". Landstudiesprogram, voorheen die Weermag Areahandboekprogram, van die Library of Congress. Mongabay.com. Verkry op 23 Julie 2011. Sarit Thanarat het die leuse “Volk-Geloof-Koning” laat herleef as ’n politieke slagspreuk vir sy regering wat hy as ’n kombinasie van paternalisme van die antieke Thaistaat en die welwillende idees van Boeddhisme gekarakteriseer het. 
  3. (en) Stearn, Duncan (14–20 Februarie 2003). "'n Stukkie Thaise geskiedenis: lig die standaard; Thailand se nasionale vlae". Pattaya Mail. Verkry op 24 Julie 2011. Die heersende – hoewel nie-amptelike – beskouing van die betekenis van die vyf bane is dat rooi die land en die volk verteenwoordig, die wit is vir Theravada-Boeddhisme, die staatsgeloof en die blou baan stel die monargie voor. Dit is ook genoem dat blou die amptelike kleur van Koning Rama IV was. ’n Ander verhaal lui dat blou toegevoeg is in solidariteit met Thailand se toetrede tot die Eerste Wêreldoorlog (in Julie 1917) as ’n bondgenoot van Brittanje en Frankryk. 
  4. (th) Die Vlagwet van BE 2522 (1979 CE)((th) พระราชบัญยัติธง พ.ศ.2522) in Koninklike Thailand Koerant No. 96 Afdeling 67 spesiale uitgawe bladsy 1
  5. ’n Nie-amptelike vertaling van die Kantoor van die Staatsprokureur, sien http://www.krisdika.go.th/wps/wcm/connect/d9e7ff804ba1c19498d99a8b4221fda7/FLAG+ACT%2C+B.E.+2522+%281979%29.pdf?MOD=AJPERES&CACHEID=d9e7ff804ba1c19498d99a8b4221fda7
  6. (th) (4 Oktober 2017) “ประกาศสำนักนายกรัฐมนตรี เรื่อง รูปธงชาติตามพระราชบัญญัติธง พ.ศ. 2522”. Koninklike Thai Staatskoerant 164 (Special 245 D): 1–2. Besoek op 4 Oktober 2017.