Vlag van Sirië

in Wikipedia, die vrye ensiklopedie
Jump to navigation Jump to search

As gevolg van die voortslepende Siriese Burgeroorlog is daar tans twee vlae wat gebruik word om Sirië te verteenwoordig, soos gebruik deur die vegtende faksies.[1] Die sittende regering van die Siriese Arabiese Republiek wat deur die Ba’ath-party gelei word, gebruik die rooi-wit-swart-driekleur wat oorspronklik deur die Verenigde Arabiese Republiek gebruik is, terwyl die Siriese opposisiefaksies soos die Siriese Nasionale Koalisie gebruik die groen-wit-swart-driekleur wat as die Onafhanklikheidsvlag bekend is en vir die eerste keer deur die Gevolgmagtigde Sirië gebruik is.

Vlag wat deur die Siriese Regering gebruik word[wysig | wysig bron]

Vlag van die Siriese Arabiese Republiek
Vlag van die Siriese Arabiese Republiek
Gebruik Nasionale vlag en vaandel Nasionale vlag en vaandel Normale of de jure weergawe van vlag, of voorkant
Verhouding 2:3
Goedgekeur 22 Februarie 1958 en 30 Maart 1980[2]
Ontwerp ’n Horisontale driekleur in rooi, wit en swart met twee groen vyfpuntige sterre in die wit baan.

Die huidige vlag is aanvanklik in 1958 aanvaar om Sirië as deel van die Verenigde Arabiese Republiek te verteenwoordig. Dit is tot 1961 gebruik en in 1980 weer aanvaar. Sedert die eerste aanvaarding is variasies van die rooi-wit-swart-vlag in verskeie Arabiese Unies van Sirië met Egipte, Libië, Soedan, Jemen en Irak gebruik. Hoewel Sirië nie deel van enige Arabiese staatsunie uitmaak nie, is die vlag van die Verenigde Arabiese Republiek weer aanvaar om Sirië se toewysing aan Arabiese eenheid te toon.[3] Die gebruik van die vlag het ’n twispunt geword omdat die dikwels met die Ba’ath-party verbind word, en word gebruik om partye wat lojaal is aan Basjar al-Assad se regering in die Siriese Burgeroorlog.[4]

Die Siriese vlag word in artikel 6 van die Siriese Grondwet omskryf. Die eerste paragraaf van die artikel lui soos volg:

Die vlag van die Siriese Arabiese Republiek bestaan uit drie kleure, rooi, wit en swart, met twee groen sterre met vyf punte elk. Die vlag is reghoekig met die hoogte twee derdes van die breedte. Dit is in drie reghoeke van identiese dimensies verdeel wat elk dieselfde breedte as die vlag is. Dit boonste is rooi, die middelste is wit en die onderste swart met twee groen sterre in die middel van die wit reghoek.
1ste Paragraaf van Artikel 6 van die Siriese Grondwet[5]

Die vlag is gebaseer op die Arabiese Bevrydingsvlag met vier kleure – swart, groen, wit en rooi – wat die vier groot dinastieë in die Arabiese geskiedenis voorstel: Abbasid, Fatimid, Oemajjad en Hasjemiete.[6]

Ontwerp[wysig | wysig bron]

Kleure[wysig | wysig bron]

Die rooi van die Siriese vlag verteenwoordig die Hasjemiete en die bloederige vryheidstryd[7], die wit verteenwoordig die Oemajjad[7] en ’n helder en vredevolle toekoms, die groen verteenwoordig die Fatimid[7] terwyl die stervorme Egipte en Sirië verteenwoordig[6], en die swart verteenwoordig die Abbasid[7] en onderdrukking.

Die kleurskema word hieronder gelys:

Flag of Syria.svg Rooi Wit Groen Swart
RGB 206-17-38 255-255-255 0-122-61 0-0-0-0
Heksadesimaal #CE1126 #FFFFFF #007A3D #000000
CMYK 12, 100, 98, 3 0, 0, 0, 0 89, 27, 100, 15 75, 68, 67, 90

Vlag wat deur die Siriese opposisie gebruik word[wysig | wysig bron]

Vlag van die Siriese Nasionale Koalisie
Vlag van die Siriese Nasionale Koalisie
Bynaam “Onafhanklikheidsvlag”
Verhouding 2:3 (omstrede)
Goedgekeur Aanvanklik in 1932 met 1:2 verhouding, in 1961 heraanvaar. In2012 met 2:3-verhouding aanvaar deur opponerende banregering
Ontwerp ’n Horisontale driekleur in groen, wit en swart met drie rooi vyfpuntige sterre in die wit baan.

Gedurende die loop van die voorslepende burgeroorlog gebruik die Siriese opposisie, wat deur die Siriese Nasionale Raad, toe deur die Nasionale Koalisie vir Rewolusionêre en Opposisiemagte in Sirië[8] (algemeen bekend as die Siriese Nasionale Koalisie) ’n gewysigde weergawe van die onafhanklikheidsvlag (met die verhouding 2:3) wat vir die eerste maal in 1932 gebruik is. Die gewysigde onafhanklikheidsvlag is laat in 2011 begin gebruik as ’n universele simbool van die beswaarde opposisie.[8] Die opposisie wou hulself van die Siriese regering onderskei en was ten gunste van die gebruik van die vlag wat gebruik is toe Sirië sy onafhanklikheid van Frankryk verkry het. Khaled Kamal, ’n amptenaar van die Siriese Nasionale Raad is nou oortuig dat hierdie vlag ook onafhanklikheid en die einde van Basjar al-Assad se regering verteenwoordig. Dit vlag word deesdae hoofsaaklik gebruik in gebiede wat deur die Siriese Nasionale Koalisie beheer word. Die gebruik van die gewysigde onafhanklikheidsvlag is soortgelyk aan wat die Libiese rebelle gedoen het deur die gebruik van die pre-Ghaddafi Libiese vlag vanuit die tydperk van die Koninkryk Libië wat dit in opposisie teen Moeammar al-Ghaddafi se groen vlag[9] Die oorspronklike 1:2 aspekverhouding is per geleentheid nie-amptelik deur die opposisie gebruik.

Geskiedenis[wysig | wysig bron]

Koninkryk Sirië[wysig | wysig bron]

Die Ottomaanse vlag is tot 18 September 1918, toe die Ottomane die land verlaat het, in Sirië gebruik. In 1918 was die nie-amptelike vlag van Sirië die Faysalvlag of die vlag van die Arabiese opstand wat van 1916 tot 1918 teen die Ottomane gebruik is. Dit is op 30 September 1918 amptelik deur die Hasjemietfamilie aanvaar en het tot 8 Maart 1920 in gebruik gebly. Dit was die eerste vlag om die groen-rooi-wit-swart-kombinasie te gebruik wat in die meeste daaropvolgende Siriese vlae gesien is. Die simboliek van die kleure is soos volg beskryf: wit vir die Damaskiese Oemajjad-tydperk, groen vir die Kalief Ali, rooi vir die radikale Islambeweging van Kharidjisme en swart vir die Profeet Mohammed, wat die “politieke aanwending van religie” in teenstand met die toenemende gesekulariseerde Turkse koloniale oorheersing getoon het.[10] As alternatief is aangevoer dat die horisontale bane die Abbasidiese (swart), Oemajjadiese (wit) en Fatimidiese (groen) kalifate voorstel terwyl die rooi driehoek na die Hasjemiese ryk verwys het.[11][12]

Onder die Arabiese Koninkryk Sirië is die Faysalvlag herontwerp met ’n sewepuntige wit ster wat op die rooi driehoek gesuperponeer is, en dit is tot 24 Julie 1920 gebruik. Hierdie vlag is egter ’n tyd later deur Jordanië aanvaar.[3] Die koninkryk het vir net meer as 4 maande in 1920 bestaan voordat dit deur Frankryk beset is en formeel in die Franse koloniale ryk ingewy is, waarvan dit 12 jaar lank deel was.

Franse Mandaat (1920–32)[wysig | wysig bron]

Die Faysalvlag is met die koms van die Franse kolonies laat vaar. Die Franse Hoëkommissaris vir Sirië, generaal Henri Gouraud het op 24 Julie 1920 die nuwe vlag van Frans Mandaat-Sirië aanvaar (blou baan met wit sekelmaan en die Franse vlag in die skildhoek). Gouraud se vlag is tot 1 September 1920 gebruik waarna Sirië in afsonderlike gebiede verdeel is met elk sy eie vlag.[13] Djamil al-Oelsji, die Siriese Eerste Minister onder die Franse Mandaat, het op 22 Junie 1920 ’n nuwe vlag aanvaar. Hierdie vlag is tot 1930 gebruik. Die derde en finale vlag onder vir Franse Mandaat is in 1930 deur die Eerste Minister Tadj al-Din al-Hasani aanvaar, en is tot 1 Januarie 1932 gebruik.[14]

Onafhanklikheidsvlag (Franse Mandaat en onafhanklikheid)[wysig | wysig bron]

Die vlag van die nuutgestigte Siriese Republiek onder die Franse mandaat, is deur die 1930-grondwet vasgestel. Die grondwet is deur ’n parlementêre komitee onder leiding van Ibrahim Hananu, leier van die nasionaliste, opgestel.[15] Die Franse owerhede het aanvanklik geweier dat die samestellende vergadering die grondwet bekragtig en Henri Ponsot, Hoë Kommissaris van die Levante, het die vergadering op 5 Februarie 1929 ontbind. Na openbare opskudding het die Franse hul besluit hersien en die konsep met enkele wysigings goedgekeur.[16] Op 14 Mei 1930 het Ponsot Verondening 3111 uitgereik wat die konsep vir die “Grondwet van die Siriese Republiek” soos deur die Siriërs opgestel, goedgekeur het. Artikel IV van Deel I daarvan lui soos volg:

“[Die] Siriese vlag sal soos volg daar uitsien: breedte dubbel hoogte, en verdeel in drie parallelle en gelyke kleure met groen bo, dan wit en dan swart, dat die wit deel drie rooi vyfpuntige sterre in ’n reguit lyn sal bevat”.
Artikel IV, Deel I, Grondwet van die Siriese Republiek[17]

Die groen kleur het die Rasjidoen-kalifaat verteenwoordig, die wit die Oemajjadiese Kalifaat en die swart die Abbasidiese Kalifaat. Die drie sterre het oorspronklik die drie distrikte van Sirië verteenwoordig, naamlik Aleppo, Damaskus en Deir ez-Zor.[18] In 1936 is die Latakia Sandjak en Jabal Druze tot Sirië toegevoeg, waarop die betekenis van die sterre verander het na die eerste wat Aleppo, Damaskus en Deir ez-Zor verteenwoordig het, die tweede wat Jebel Druze verteenwoordig het en die derde wat die Latakia Sanjak verteenwoordig het.[14] Die vlag is op 11 Junie 1932 amptelik in Damaskus gehys, maar is vantevore, op 1 Januarie 1932, in Aleppo vertoon.[14] Die vlag is gebruik as ’n simbool van die begeerte na outonomie waarom Siriërs hulle kon skaar toe die Franse die ooreenkoms on die lant te verlaat, verbreek het weens die uitbreek van die Tweede Wêreldoorlog.[19][18] Die simboliek was soos volg: swart vir die donker onderdrukte verlede, wit vir ’n belowende toekoms en rooi vir die bloed wat moet vloei om van eersgenoemde na laasgenoemde te vorder.[18] Die vlag is aanvaar toe Sirië op 17 April 1946 sy onafhanklikheid verkry het.[3] Hierdie standaard is gebruik tot en met die oprigting van die Verenigde Arabiese Republiek in 1958 wat uit Sirië en Egipte bestaan het. Na die val van die Verenigde Arabiese Republiek het Sirië tot 28 September 1961 voortgegaan met die gebruik van die VAR-vlag, waarna die onafhanklikheidsvlag heet teruggestel is sodat Sirië kon wegstaan van die voormalige gefaalde staat.[3]

Ba’athistiese vlae[wysig | wysig bron]

Die huidige tweestervlag van Sirië is vir die eerste maal deur Gamal Abdel Nasser, president van Egipte asook van die Verenigde Arabiese Republiek aanvaar.[20] Die vlag is in April 1958 van die voormalige onafhanklikheidsvlag en die verwante wette verander om ’n breër Arabiese identiteit te skep.[20] Die nuwe vlag het die rooi, wit en swart bane van die Egiptiese revolusionêre vlag gebruik en die sterre op die vlag is van rooi na groen verander om op die Pan-Arabiese kleure te dui. Die twee sterre het op Sirië en Egipte gedui.[21]

Nadat Sirië die VAR op 28 September 1961 verlaat het, is die voormalige onafhanklikheidsvlag weer aanvaar om Sirië se afstand van die gefaalde staat duidelik te maak.

Na die Ba’athistiese staatsgreep in 1963,[22] is ’n nuwe vlag op 8 MAart 1963 deur die Revolusionêre Bevelsraad aanvaar, wat tot 1 Januarie 1972 gebruik is.[3] In 1963 het die Ba’athiste ook in Irak aan bewind gekom en die twee Ba’athistiese regerings het in Kaïro met onderhandelinge begin om nogmaals ’n unie van Egipte, Sirië en Irak te vorm. Die proses het misluk nadat die Irakse Ba’ath-regering in November 1963 omver gewerp is. Sirië en Irak het egter reeds ’n nuwe vlag aanvaar om die vereniging te verteenwoordig.[23] Hierdie vlag was soortgelyk aan die vlag van die VAR behalwe dat daar drie sterre in plaas van twee was om die Irak se toevoeging tot die federasie te verteenwoordig.[3] Die drie sterre het op die eenheid van Egipte, Sirië en Irak getoon, en het ook die drie steunpilare van Ba’athisme verteenwoordig, nl. eenheid, vryheid en sosialisme.[24]

President Hafiz al-Assad het op 1 JAunarie 1972 ’n nuwe vlag aanvaar toe Sirië by Egipte en Libië aangesluit het in die Federasie van Arabiese Republieke. Die groen sterre is vervang met die Hawik van Quraish (die simbool van die stam van die profeet Mohammed).[25] Die valk het ’n lint vasgehou waarop die naam van die federasie was, maar anders as Egipte en Libië, het Sirië nie sy naam op die wapenskild aangebring nie.[14] Hierdie vlag was in 1973 ’n nie-amptelike vlagg gedurende die Oktoberoorlog.[3] Die federasie is in 1977 ontbind maar Sirië het nog vir drie jaar daarna die vlag gebruik.[14] Op 29 Maart 1980 is die vlag herroep[3] en vervang deur die huidige tweestervlag[24] om Sirië se toewyding aan Arabiese eenheid te toon.[3]

Galery[wysig | wysig bron]

Verwysings[wysig | wysig bron]

  1. Mohammad Dibo Debat: Die Nuwe Sirië tussen Vlae en Tale, SyriaUntold 14 Junie 2016
  2. (en) "Sirië". Flags of the World. 19 Julie 2013. Besoek op 15 Junie 2019.
  3. 3,0 3,1 3,2 3,3 3,4 3,5 3,6 3,7 3,8 (en) "Siriese Vlag". Geskiedenis van Sirië. Besoek op 7 Augustus 2012.
  4. (en) Moubayed, Sami (6 Augustus 2012). "Vang die vlag". Foreign Policy. Besoek op 8 Oktober 2014.
  5. (en) "Engelse Vertaling van die Siriese Grondwet". Qordoba. 15 Februarie 2012. p. 8. Besoek op 14 November 2012.
  6. 6,0 6,1 (en) "Siriese Vlag - kleure, betekenis, geskiedenis van Sirië se Vlag". facts.co.
  7. 7,0 7,1 7,2 7,3 (en) "Kom na Sirië | Siriese vlag | Nasionale Lied van Sirië | Feite oor Sirië". http://www.cometosyria.com/en/pages/National+Symbols+syria/2/1. 
  8. 8,0 8,1 (en) "Sirië staak beleg van Homs met aankoms van Arabiese raadgewers". CBS News. 27 Desember 2011. Besoek op 30 Augustus 2012.
  9. (en) Daraghi, Borzou (30 Desember 2011). "Siriese rebelle hys 'n vlag uit die verlede". Besoek op 7 Augustus 2012.
  10. (en) Sergie, Lina, Onthou die geskiedenis : liedere, vlae en ’n Siriese vierkant Massachusetts Instituut van Tegnologie. Dept. Argitektuur, 2003, p/24
  11. (en) Edmund Midura, “Vlae van die Arabiese Wêreld”, in Saudi Aramco World, Maart/April 1978, bll. 4–9
  12. (en) Mahdi Abdul-Hadi, “Feite oor Palestina: die betekenis van die vlag” Geargiveer 22 Desember 2013 op Wayback Machine
  13. (en) Sache, Ivan; Ollé, Jaume (29 Maart 2012). "Geskiedkundige vlae tot 1932 (Sirië)". Flags of the World. Besoek op 22 November 2012.
  14. 14,0 14,1 14,2 14,3 14,4 (en) Ipavec, Eugene; Martins, António; Heimer, Željko; Dotor, Santiago (10 Junie 2011). "Geskiedkundige vlae sedert 1932". Flags of the World. Besoek op 7 Augustus 2012.
  15. Thompson 2000, p. 52.
  16. Schumann 2008, p. 204.
  17. Die 1930-grondwet in sy geheel weergegee in: (fr) Giannini, A. (1931). "Le costituzioni degli stati del vicino oriente". Istituto per l’Oriente. Besoek op 31 Maart 2012.
  18. 18,0 18,1 18,2 Sergie, Lina, Onthou die geskiedenis: liedere, vlae en ’n Siriese Vierkant Massachusetts Instituut van Tegnologie. Dept. Argitektuur, 2003, p.25
  19. Lawson 2006, p. 46.
  20. 20,0 20,1 Podeh 1999, p. 120.
  21. (en) Mills, T. F. (10 Maart 2012). "Pan-Arabiese Kleure". Flags of the World. Geargiveer vanaf die oorspronklike op 13 November 2012. Besoek op 24 November 2012.
  22. King 2009, p. 41.
  23. Goodarzi 2006, p. 14.
  24. 24,0 24,1 (ar) "العلم السوري". Ontdek Sirië. Besoek op 7 September 2012.
  25. Sergie, Lina, Onthou die geskiedenis: liedere, vlae en ’n Siriese vierkant Massachusetts Instituut van Tegnologie. Dept. Argitektuur, 2003, p.26

Bibliografie[wysig | wysig bron]

  • Goodarzi, Jubin M. (2006). Syria and Iran: Diplomatic Alliance and Power Politics in the Middle East. I.B. Tauris. ISBN 9781845111274.
  • Heydemann, Steven (1999). Authoritarianism in Syria: Institutions and Social Conflict, 1946–1970. Cornell University Press. ISBN 9780801429323.
  • Lawson, Fred H. (2006). Constructing International Relations in the Arab World. Stanford University Press. ISBN 9780804753722.
  • King, Stephen J. (2009). The New Authoritarianism in the Middle East and North Africa. Indiana University Press. ISBN 9780253353979.
  • Podeh, Elie (1999). The Decline of Arab Unity: The Rise and Fall of the United Arabic Republic. Sussex Academic Press. ISBN 9781902210209.
  • Schumann, Cristoph (2008). Liberal Thought in the Eastern Mediterranean: Late 19th Century Until the 1960s. BRILL. ISBN 9789004165489.
  • Thomas, Martin (2007). Empires of Intelligence: Security Services and Colonial Disorder after 1914. University of California Press. ISBN 9780520251175.
  • Thompson, Elizabeth (2000). Colonial Citizens: Republican Rights, Paternal Privilege, and Gender in French Syria and Lebanon. Columbia University Press. ISBN 9780231106610.

Eksterne skakels[wysig | wysig bron]