Vlag van Hongkong

in Wikipedia, die vrye ensiklopedie
Vlag van Hongkong
Vlag van Hongkong
Vlag van Hongkong
Bynaam 中华人民共和国香港特别行政区区旗 (Vereenvoudigde Chinees)
Gebruik Nasionale vlag en vaandel Nasionale vlag en vaandel
Verhouding 2:3
Goedgekeur 4 April 1990[1]
Gebruik sedert 1 Julie 1997
Ontwerp ’n Enkele rooi baan met ’n gestileerde vyfblaar-hongkongboomorgideeblom in die middel.
Ontwerp deur Tao Ho
Streeksvlag van die Hongkong Spesiale Administratiewe Streek van die Volksrepubliek China
Name (taalvariante)
Tradisionele Chinees   中華人民共和國香港特別行政區區旗
Vereenvoudigde Chinees   中华人民共和国香港特别行政区区旗
Pinyin Zhōnghuá Rénmín Gònghéguó Xiānggǎng Tèbié Xíngzhèngqū Qūqí
Kantonees Jūngwàh Yàhnmàhn Guhngwòhgwok Hēunggóng Dahkbiht Hàhngjing Kēui Kēuikèih
Jyutping Zung1waa4 Jan4man4 Gung6wo4gwok3 Hoeng1gong2 Dak6bit6 Hang4zing3 Keoi1 Keoi1kei4

Die vlag van Hongkong (amptelik die streeksvlag van die Hongkong Spesiale Administratiewe Streek van die Volksrepubliek China) is op 4 April 1990 goedgekeur[2] en is sedert 1 Julie 1997 in gebruik. Die vlag vertoon ’n enkele rooi baan met ’n gestileerde vyfblaarblom van die hongkongboomorgidee (Bauhinia × blakeana) in die middel.

Sy ontwerp is tydens die derde sitting van die sewende Nasionale Volkskongres op 4 April 1990 goedgekeur.[2] Die presiese gebruik van die vlag word deur wette bepaal wat tydens die 58ste uitvoerende vergadering van die Staatsraad van die Volksrepubliek China in Beijing aanvaar is.[3] Die ontwerp van die vlag is vasgelê in Hongkong se grondwet, dié gebied se grondwetlike dokument,[4] en regulasies oor die gebruik, verbod op gebruik, vlagskending en vervaardiging van die vlag word vermeld in die Ordonnansie oor die Streeksvlag en Streeksembleem.[5] Die vlag van Hongkong is vir die eerste keer amptelik gehys tydens die oorhandigingseremonie op 1 Julie 1997 wat die oordrag van soewereiniteit van die Verenigde Koninkryk terug na China aandui.[6]

Simboliek[wysig | wysig bron]

Die vlag van Hongkong wapper langs die nasionale Chinese vlag
’n Bloeiende Bauhinia blakeana-blom

Die vlag se ontwerp kom met kulturele, politieke en streeksbetekenisse. Die kleur self is noemenswaardig; rooi is ’n feeskleur vir Hongkongers en word gebruik om ’n sin van viering en nasionalisme oor te dra.[7] Voorts is die rooi identies aan die rooi wat in die vlag van die Volksrepubliek China gebruik word.[8] Die posisie van die rooi en wit op die vlag simboliseer die politieke beginsel van “een land, twee stelsels” wat op die streek van toepassing is. Die gestileerde weergawe van die Bauhinia blakeana-blom (wat in Hongkong ontdek is) word bedoel om te dien as ’n simbool van harmonisering vir die teenstrydigheid.[7] Die Kantonese naam van die blom word geskryf as “洋紫荊”, maar word soms in amptelike gebruik verkort na 紫荊/紫荆 aangesien “洋” (yáng) “uitheems” in Kantonees beteken. ’n standbeeld van die plant is op die Goue Bauhinia-plein in Hongkong opgerig.

Voor die aanvaarding van die vlag het die voorsitter van Hongkong se Basieseregformuleringskomitee die noemenswaardigheid van die vlag se ontwerp aan die Nasionale Volksvergadering verduidelik:

Die streeksvlag dra ’n ontwerp van vyf bauhinia-blomblare, elk met ’n ster in die middel, op ’n rooi agtergrond. Die rooi vlag verteenwoordig die vaderland en die bauhinia verteenwoordig Hongkong. Die ontwerp beteken dat Hongkong ’n onvervreembare deel van China is en dat dit gedy in die omhelsing van die vaderland. Die vyf sterre op die blom simboliseer die feit dat alle Hongkongse landgenote hul vaderland liefhet terwyl die rooi en wit kleure die beginsel van “een land, twee stelsels” beliggaam.[9]


Ontwerp[wysig | wysig bron]

Die Hongkongse regering het groottes, kleure en vervaardigingsparameters gespesifiseer waarvolgens die vlag gemaak moet word. Die agtergrond van die reghoekige vlag is rooi van dieselfde skakering as wat in die vlag van die Volksrepubliek China gebruik word. Die hoogte-breedte-verhouding van die vlag is 2:3. In die middel van die rooi baan is ’n vyfblaar gestileerde weergawe van ’n wit Bauhinia × blakeana-blom. Indien ’n sirkel die blom omskryf, moet dit ’n deursnee van 0,6 keer die hoogte van die vlag hê. Die blomblare is ewewydig versprei om die middelpunt van die vlag, straal uit na buite en is in ’n kloksgewyse rigting gepunt. Elk van die blomblare bevat ’n vyfpuntige rooi ster met ’n rooi roei wat op ’n meeldraad sinspeel. Die hofie waarteen die vlag aan die vlagpaal rus, is wit.[8]

Konstruksietekening
Konstruksietekening

Groottespesifikasies[wysig | wysig bron]

Die onderstaande tabel gee al die amptelike groottes vir die vlag weer. Groottes wat hiervan afwyk word as niestandaard beskou. Indien ’n vlag nie van amptelike grootte is nie moet dit ’n vergrote of verkleinde weergawe van een van die amptelike groottes wees.[8]

Grootte Breedte en hoogte in millimeter
1 2880 × 1920
2 2400 × 1600
3 1920 × 1280
4 1440 × 960
5 960 × 640
Voertuigvlag 300 × 200
Vlag vir ondertekeningseremonies 210 × 140
Lessenaarvlag 150 × 100

Kleurspesifikasies[wysig | wysig bron]

Die volgende is benaderde kleure van die Hongkongse vlag in verskillende kleurmodelle. Dit word weergegee in webkleure in heksadesimale notasie, CMYK-ekwivalente*, kleurstofkleure, HSL-ekwivalente en Pantone-ekwivalente.

Kleur Voorbeeld HTML CMYK Tekstielkleur HSL Pantone
Rooi #FF0000 0-100-90-0 Rooi 0°,100%,50% 186
Wit #FFFFFF 0-0-0-0 Wit 0°,100%,100%

*CMYK-ekwivalente is gebaseer op amptelike lêers wat van Hongkong se protokolwebwerf Geargiveer 6 Augustus 2020 op Wayback Machine afgelaai kan word.

Vervaardigingsregulasies[wysig | wysig bron]

Die Ordonnansie oor die Streeksvlag en Streeksembleem stipuleer dat Hongkong se vlag volgens die spesifikasies wat in die ordonnansie uitgelê is, vervaardig moet word. Indien vlae nie in ontwerp volgens die ordonnansie vervaardig word nie, mag die Minister van Justisie ’n versoekskrif aan die landdroshof rig om die persoon of maatskappy wat die vlae vervaardig, te verbied om dit te doen. Indien die landdroshof toegee dat die vlae nie volgens regulasie is nie, mag dit beveel dat die vlae en materiaal wat gebruik is om die vlae te vervaardig, deur die regering in beslag geneem mag word.[10]

Geskiedenis[wysig | wysig bron]

Voorkoloniale tydperk[wysig | wysig bron]

Qing-dinastie (1862–1895)[wysig | wysig bron]

Voor die afskeiding, waar van Hongkong na afloop van die Opiumoorlog aan die Verenigde Koninkryk afgestaan is, het die streek onder die jurisdiksie van die Chinese regering geval en die vlag en wapen van daardie regering gebruik. Voor die oprigting van die kroonkolonie van Hongkong het die Qing-dinastie in China regeer. Ten spyte daarvan dat die regering in 1644 tot stand gekom het, het dit eers in 1862 ’n amptelike vlag gekry. Voor 1898, toe die Tweede Peking-konvensie tussen die Qing-hof en die regering van die Verenigde Koninkryk onderteken is, het die New Territories nog aan die Qing-dinastie behoort. Die vlag self vertoon die “asuurblou draak” op ’n geel agtergrond met die rooi vlampêrel van die driebeenkraai bo links in die skildhoek.[11]

Koloniale vlae[wysig | wysig bron]

Voor Hongkong se soewereiniteitsoordrag is van die koloniale Britse blou vaandel gebruik gemaak.[12] Van toe tot 1997 het die vlag verskeie veranderinge ondergaan.

Gebruik van die Unievlag (1843–1871)[wysig | wysig bron]

In 1843 is ’n seël wat Hongkong verteenwoordig, ingestel. Die ontwerp is gebaseer op ’n plaaslike waterfronttoneel; drie plaaslike handelaars met hul handelsware is op die voorgrond te sien, ’n vierkantig getuigde skip en ’n jonk is in die middelgrond terwyl die agtergrond bestaan uit koniese heuwels en wolke. In 1868 is ’n vlag vir Hongkong bedink wat bestaan het uit ’n Britse blou vaandel met ’n wapen wat op hierdie “plaaslike toneel” gebaseer is. Die ontwerp is egter deur Richard Graves MacDonnell, goewerneur van Hongkong, verwerp.[12]

Eerste koloniale vlag (1871–1876)[wysig | wysig bron]

Op 3 Julie 1869 is opdrag gegee vir ’n nuwe ontwerp vir die vlag van Hongkong teen ’n koste van £3 waarop ’n “heer in ’n aandpak wat op die strand by Kowloon tee koop” verskyn het. Na ’n kort bespreking in die uitvoerende raad is bepaal dat die nuwe ontwerp baie problematies was en dit is afgekeur.[13]

In 1870 is ’n wapen met ’n “wit kroon bo HK” vir die blou vaandel deur die Koloniale Sekretaris voorgestel. Die letters “HK” is weggelaat en drie jaar later het die kroon in volkleur verskyn.[12] Dit is onduidelik presies hoe die wapen in daardie tyd daar uitgesien het, maar dit is onwaarskynlik dat dit die “plaaslike toneel” was. Wat was in alle waarskynlikheid een of ander kroon waaronder die letters “HK” verskyn het of nie. In 1876 is die wapen met die “plaaslike toneel” ((zh) 阿群帶路圖|阿群帶路圖 Prent van “Ar Kwan” wat die Britse soldaat lei) weer aanvaar op die blou vaandel met goedkeuring van die Admiraliteit.[12]

Tweede kolonial vlag (1876–1955)[wysig | wysig bron]

Gedurende ’n owerheidsvergadering in 1911 is voorgestel dat die kolonie se naam in Latynse sowel as Chinese skrif op die vlag verskyn. Dit is egter afgekeur omdat die vir Chinese en Europeërs “gek” sou lyk.[14] Die vlag wat uiteindelik aanvaar is was ’n blou vaandel met ’n “plaaslike toneel” van handelaars op die voorgrond en handelskepe in Europese en Chinese styl in die agtergrond.

Tydperk van Japannese besetting (1941–1945)[wysig | wysig bron]

Hongkong is gedurende die Tweede Wêreldoorlog, van 1941 tot 1945 deur die Japannese Keiserryk beset. Gedurende die besetting het die Japannese militêre regering die vlag van Japan vir sy amptelike werksaamhede in Hongkong gebruik.[15]

Derde koloniale vlag (1955–1959)[wysig | wysig bron]

Die vlag was soortgelyk aan die een wat voorheen gebruik is. Dit was ’n Britse blou vaandel met ’n plaaslike waterfronttoneel.

Vierde koloniale vlag (1959–1997)[wysig | wysig bron]

Op 21 Januarie 1959 is ’n wapenskild aan Hongkong toegeken deur die Wapenkollege in Londen. Hongkong se vlag is in dieselfde jaar hersien om die wapenskild op die blou vaandel te laat pryk. Hierdie ontwerp is van 1959 tot 1997, met Hongkong se soewereiniteitsoordrag, amptelik gebruik.[12] Sedertdien is die koloniale vlag deur betogers toegeëien as ’n “simbool van antagonisme jeens China”, soos tydens die jaarlikse optog op 1 Julie vir universele stemreg.[16] Hierdie vlag is gebruik saam met ’n blou vlag waarop die wapenskild wat deur diegene wat hulle vir onafhanklikheid beywer, vertoon word.

Ander vlae[wysig | wysig bron]

Vlae van die Goewerneur van Hongkong[wysig | wysig bron]

Raadsvlae[wysig | wysig bron]

Hongkong Streeksraad[wysig | wysig bron]

Die vlag van die Streeksraad het die regeringsliggaam verteenwoordig wat gedurende die koloniale tydperk verantwoordelik was vir sake rakende die buiteliggende gebiede van die streek. Die vlag vertoon ’n gestileerde wit “R” op ’n hoek van 45 grade op ’n donkergroen agtergrond.

Hongkong Stedelike Raad[wysig | wysig bron]

Die vlag van die Stedelike Raad het die regeringsliggaam verteenwoordig wat gedurende die koloniale tydperk verantwoordelik was vir sake rakende die stedelike areas van die gebied. Die vlag vertoon ’n vereenvoudigde wit Bauhinia blakeana op ’n magenta agtergrond.

Potensiële alternatiewe[wysig | wysig bron]

Tussen 20 Mei 1987 en 31 Maart 1988, voor Hongkong se soewereiniteitsoordrag, is ’n kompetisie geloods onder die inwoners van die streek om te help kies aan ’n vlag vir post-koloniale Hongkong. Van die 7 147 ontwerpe wat ingedien is, was 4 489 vir ’n vlag.[17] Die argitek Tao Ho is gekies om op die beoordelaarspaneel te dien. Hy het hom herinner dat van die ontwerpe grappig was en met politieke kinkel: “Een het aan die een kant ’n hamer en sekel en aan die ander kant ’n dollar-teken gehad.”[18] Sommige ontwerpe is verwerp weens kopieregoortredings soos bv. die embleem van die Stedelike Raad, Hongkong Kunstefees en Hongkong Toerismeraad.[17] Ses ontwerpe is deur die beoordelaars as finaliste gekies maar is almal later deur die Volksrepubliek China verwerp. Ho en twee ander is toe deur China gevra om nuwe voorstelle in te dien.

Ho het in ’n park gewandel op soek na inspirasie en ’n Bauhinia blakeana-blom opgetel. Hy het die simmetrie van die vyf blomblare waargeneem en hoe die draaipatroon daarvan ’n dinamiese gevoel by hom laat opwel. Dit het tot gevolg gehad dat die blom by die vlag wat Hongkong moes verteenwoordig, geïnkorporeer is.[7] Die ontwerp is op 4 April 1990 tydens die Derde Sitting van die Sewende Nasionale Volkskongres aanvaar,[2] en die vlag is vir die eerste keer, enkele sekondes na middernag op 1 Julie 1997, gehys in die seremonie van die soewereiniteitsoordrag. Dit is saam met die Volksrepubliek China se vlag gehys terwyl die Chinese nasionale lied (Die mars van die vrywilligers) opgeklink het. Die Britse Unievlag en Hongkong se koloniale vlag is enkele sekondes voor middernag gestryk.[6]

’n Seleksie van vlagvoorstelle gedurende die kompetisie van 1987–1988:

Protokol[wysig | wysig bron]

Die Hongkongse en Chinese vlag naas mekaar by die patio van die voormalige Gebou van die Wetgewende Vergadering

Die presiese gebruik van die vlag word gereguleer deur wette wat deur die 58ste uitvoerende vergadering van die Staatsraad in Beijing gehou word, goedgekeur is.[3] Die Hongkong-vlag word daagliks by die amptelike woning van die uitvoerende hoof, die Regeringshuis, Hongkong Internasionale Lughawe en alle grensposte en binnekomsplekke in Hongkong vertoon.[19] By kerngeboue en -kantore van die regering soos die Kantoor van die Uitvoerende Hoof, die Uitvoerende Raad, die Appèlhof, Hooggeregshof, Wetgewende Raad en die Hongkong Ekonomiese- en Handelskantore in die buiteland, word die vlag vertoon op dae wanneer daar werk in sodanige geboue en kantore verrig word. Ander regeringsgeboue en -kantore, soos hospitale, skole, departementele hoofkantore, sportstadions en kulturele plekke behoort die vlag met geleenthede soos die Nasionale Dag van die Volksrepubliek China (1 Oktober), die Vestigingsdag van die Hongkong Spesiale Administratiewe Streek (1 Julie) en Nuwejaarsdag te vertoon.[19] Die vlag moet om 8:00 gehys word en om 18:00 gestryk word. Die hys en stryk van die vlag moet stadig gedoen word; die vlag moet die spits van die paal bereik wanneer dit gehys word en mag in die strykaksie nie aan die grond raak nie. Die vlag mag nie in uiterste weerstoestande gehys word nie.[20] ’n Beskadigde, geskonde, verbleikte of substandaardvlag mag nie vertoon of gebruik word nie.[21]

Vertoon[wysig | wysig bron]

Wanneer die Volksrepubliek China se vlag (nasionale vlag) saam met Hongkong se streeksvlag vertoon word, moet die nasionale vlag in die middel en bo die streeksvlag vertoon word, of andersins in ’n meer prominente posisie as dié van die Streeksvlag. Die streeksvlag moet kleiner as die nasionale vlag wees en dit moet aan die linkerkant van die nasionale vlag vertoon word. Wanneer die vlag in ’n gebou vertoon word, is die linker- en regterkante dié van die aanskouer van die vlae wat met hulle rug na die muur staan. Wanneer die vlae buite ’n gebou vertoon word, is die linker- en regterkante dié van die aanskouer wat voor die gebou staan en na die hoofingang kyk. Die nasionale vlag moet eerste gehys word en laaste gestryk word.[20]

’n Uitsondering op dié reël vind plaas tydens medaljeoorhandigingseremonies by veelsportfunksies soos die Olimpiese- en Asiese Spele. Hongkong en China neem afsonderlik deel en, sou ’n deelnemer van Hongkong die goue medalje wen en ’n deelnemer van China die silwer en/of brons in dieselfde item wen, word die streeksvlag ná die nasionale vlag gehys en hoër as die nasionale vlag soos die atlete op die podium verskyn tydens die seremonie.

Halfmas[wysig | wysig bron]

Die Hongkong-vlag op halfmas
Op halfmas in rou oor slagoffers van die 2008 Sichuan-aardbewing

Die vlag van Hongkong moet op halfmas vertoon word as ’n teken van rou wanneer enige van die volgende persone tot sterwe kom:[21]

  • President van die Volksrepubliek China
  • Voorsitter van die Staande Komitee van die Nasionale Volkskongres
  • Premier van die Staatsraad
  • Voorsitter van die Sentrale Militêre Kommissie
  • Voorsitter van die Nasionale Komitee van die Politieke Konsultatiewe Konferensie van die Chinese Volk
  • Persone wat uitstaande bydraes gelewer het tot die Volksrepubliek China soos die Sentrale Volksregering die Uitvoerende Hoof adviseer.
  • Persone wat uitstaande bydraes gelewer het tot wêreldvrede of die saak van menslike vooruitgang soos die Sentrale Volksvergadering die Uitvoerende Hoof adviseer.
  • Persone wat deur die Uitvoerende Hoof bepaal word as om ’n uitstaande bydrae te gemaak het tot die Hongkong Spesiale Administratiewe Streek of vir wie hulle dit geskik ag om die vlag op halfmas te vertoon.

Die vlag mag ook op halfmas vertoon word wanneer die Sentrale Volksregering die Uitvoerende Hoof adviseer om dit te doen, of wanneer die Uitvoerende Hoof dit geskik ag om te doen, wanneer betreurenswaardige gebeure lei tot ernstige lewensverlies of wanneer natuurlike gevare tot groot lewensverlies lei.[21] Wanneer ’n vlag op halfmas gehys word moet dit eers tot aan die spits van die paal gehys word en dan gestryk word tot op ’n punt waar die afstand tussen die bokant van die vlag en die spits van die paal een derde van die lengte van die paal is. Wanneer ’n vlag wat op halfmas vertoon word, gestryk word, moet dit eers tot aan die spits gehys word waarna die gestryk kan word.[20]

Verbod op gebruik en skending[wysig | wysig bron]

Die Ordonnansie oor die Streeksvlag en Streeksembleem bepaal die manier waarop die gebruik van Hongkong se vlag verbode is en dat die skending van die vlag verbode is; dit bepaal ook dat dit ’n strafbare oortreding is vir ’n persoon om die vlag op ’n verbode wyse te gebruik of om dit te skend. Volgens die ordonnansie mag ’n vlag nie in advertensies of handelsmerke gebruik word nie,[22] en dat “openbare en opsetlike verbranding, verminking, krabbel op, ontreiniging or vertrapping” van die vlag as skending gesien word.[23] Insgelyks brei die ordonnansie dieselfde verbod uit na die Volksrepubliek China se vlag.[24][25] Die ordonnansies maak ook voorsiening dat die Uitvoerende Hoof stipulasies rakende die gebruik van die vlag kan uitvaardig. In stipulasies wat in 1997 uitgevaardig is het die Uitvoerende Hoof gespesifiseer dat die gebruik van die vlag in “enige handel, beroep of professie, of die logo, seël of wapen van enige nieregeringsorganisasie” ook verbode is tensy vooraf goedkeuring verkry is.[19]

Die eerste skuldigbevinding aan vlagskending het in 1999 plaasgevind. Die betogers Ng Kung Siu en Lee Kin Yun het die woord “Shame” op die Volksrepubliek China én die Hongkongse vlag geskryf en is skuldig bevind aan oortreding van die Ordonnansies oor die Nasionale Vlag en Nasionale Embleem en die Streeksvlag en Streeksembleem. Die Appèlhof het die skuldigbevinding egter herroep en bepaal dat die ordonnansies onnodige beperkinge op die vryheid van uitdrukking geplaas het en dat dit ’n skending van die Basiese Reg en die Internasionale Verbond op Burgerlike en Politieke Regte was. Na verdere appèl het die hoogste hof van appèl egter die aanvanklike skuldigbevinding bekragtig en gesê dat hierdie beperking op die vryheid van uitdrukking geregverdigbaar was in dat dit die beskerming van die vlae ’n rol in nasionale eenheid en territoriale integriteit speel en ook dat dit wel ’n beperking was op die manier waarop ’n boodskap uitgedruk mag word, maar nie op die boodskap self nie.[26]

Leun Kwok-hung, ’n voormalige lid van die Wetgewende Raad en politieke aktivis in Hongkong is in Februarie 2001, voor hy lid van die Wetgewende Raad geword het, gepenaliseer omdat hy die vlag ontreinig het. Hy is op drie aanklagte van vlagskending skuldig bevind – vir twee voorvalle op 1 Julie 2000 gedurende die derde herdenking van Hongkong se oorgawe aan China en vir een voorval op 9 Julie van dieselfde jaar gedurende ’n protes teen verkiesings om die Verkiesingskomitee, die kieskollege wat die Uitvoerende Fooh van Hongkong kies, te verkies. Leung het ’n skuldbrief vir goeie gedrag ontvang vir 12 maande en is met HK$ 3 000 beboet.[27]

Zhu Rongchang, ’n boer van China, is vir drie weke in die tronk gestop nadat hy ’n Chinese vlag in Hongkong verbrand het. Zhu is aangekla van “openbare en opsetlike” verbranding van die Chinese vlag in die Goue Bauhinia-plein in die Hongkongse middestad. Die 74 jaar oue man is die derde persoon wat aangekla is van skending van die Chinese vlag, maar die eerste wat onder die wet tronk toe gestuur is.[28]

Vroeg in 2013 het betogers die strate ingevaar met ou koloniale vlae met ’n eis van meer demokrasie en die bedanking van die Uitvoerende Hoof Leung Chun Yinc. Die gebruik van die vlag het kommer by die Chinese owerheid laat wek en Leung het versoek dat die vlag nie gebruik word nie.[29][30] Ten spyte van Leung se versoek is die ou vlag nie deel van die beperkinge nie buiten dat dit nie aan vlagpale gehys mag word of in die gebied verkoop en vervaardig mag word nie.

Swart Bauhinia-vlag[wysig | wysig bron]

Tydens die 2019/2020-betogings in Hongkong gebruik die demokratiese beweging ’n swart weergawe van die vlag van Hongkong (Black Bauhinia Flag) as ’n teken van protes.[31] Op die vlag word dikwels die sterre (wat die Kommunistiese Party van China verteenwoordig) uitgelaat en soms ook ’n kwynende Bauhinia-bloem op die vlag vertoon.[32]

Sien ook[wysig | wysig bron]

Verwysings[wysig | wysig bron]

  1. (en) "Hongkong". Flags of the World. Besoek op 13 Augustus 2020.
  2. 2,0 2,1 2,2 (en) "Besluit van die Nasionale Volkskongres oor die Basiese Wet van die Hongkong Spesiale Administratiewe Streek van die Volksrepubliek China". Regering van Hongkong. 4 April 1990. Geargiveer vanaf die oorspronklike op 2 Desember 2013. Besoek op 1 November 2009.
  3. 3,0 3,1 (en) Laws and Regulations of the People's Republic of China. China Legal Publishing House. 2001. p. iv. ISBN 7-80083-759-9.
  4. (en) "Basic Law Full Text". Hongkong Spesiale Administratiewe Streek. Geargiveer vanaf die oorspronklike op 6 Desember 2008. Besoek op 20 Maart 2009.
  5. (en) "Regional Flag and Regional Emblem Ordinance" (PDF). Bilingual Laws Information System. 1 Julie 1997. Besoek op 25 Julie 2009.
  6. 6,0 6,1 (en) Jeffrey Aaronson. "Schedule of Events". Time. Geargiveer vanaf die oorspronklike op 5 Oktober 2009. Besoek op 1 November 2009.
  7. 7,0 7,1 7,2 (zh) 忆香港区旗区徽的诞生(上) [Beskouing op die skep van Hongkong se vlag en embleem – Deel 1]. Wenhui-xinmin United Press Group. 24 Mei 2007. Besoek op 20 Maart 2009. [dooie skakel] en (zh) 忆香港区旗区徽的诞生(下) [Beskouing op die skep van Hongkong se vlag en embleem – Deel 2]. Wenhui-xinmin United Press Group. 25 Mei 2007. Besoek op 20 Maart 2009. [dooie skakel]
  8. 8,0 8,1 8,2 (Skedule 1 van die Streeksvlag- en Streeksembleemordinansie) "Streeksvlag- en Streeksembleemordinansie" (PDF). Tweetalige Reginligtingstelsel. 1 Julie 1997. Besoek op 25 Julie 2009.
  9. (en) Elihu Lauterpacht, C. J. Greenwood, A. G. Oppenheimer (2002). International Law Reports. Vol. 122. Cambridge Universiteitspers. p. 582. ISBN 978-0-521-80775-3.{{cite book}}: AS1-onderhoud: gebruik authors-parameter (link)
  10. (Klousule 5 van die Ordonnansie oor die Streeksvlag en Streeksembleem) (en) "Ordonnansie oor die Streeksvlag en Streeksembleem". Hongkong e-wetgewing. 1 Julie 1997. Besoek op 24 Augustus 2020.
  11. (en) Mierzejewski, Dominik; Kowalski, Bartosz (2019). China's Selective Identities: State, Ideology and Culture. Global Political Transitions. Singapore: Springer Singapore. doi:10.1007/978-981-13-0164-3. ISBN 9789811301636.
  12. 12,0 12,1 12,2 12,3 12,4 (en) "Koloniale Hongkong". Flags of the World. 18 Augustus 2007. Besoek op 20 Maart 2009.
  13. (en) "Notule van vergadering: LegCo 15 April 1912" (PDF). Hongkong LegCo-argief. Die Hongkongse Wetgewende Vergadering. Besoek op 10 Mei 2019.
  14. (en) "Notule van vergadering: 28 Desember 1911" (PDF). Hongkong LegCo-argief. Hongkong Wetgewende Vergadering. Besoek op 10 Mei 2019.
  15. (en) Carroll, John M. (2007). A Concise History of Hong Kong. Rowman & Littlefield Publishers. p. 124. ISBN 978-0-7425-7469-4.
  16. (en) A.T. (4 Julie 2012). "Spraakvryheid in Hongkong: magsvertoon". Analects. Hong Kong. Besoek op 24 Julie 2012.
  17. 17,0 17,1 (zh) 香港区旗区徽诞生记. China Art News. 1 Januarie 2007. Geargiveer vanaf die oorspronklike op 30 Desember 2013. Besoek op 29 Desember 2013.
  18. (en) Andrea Hamilton. "Kom sien die oorhandiging: Ontmoet die belangrikste manne en vroue wat agter die skerms werk". Asiaweek. Geargiveer vanaf die oorspronklike op 7 November 2007. Besoek op 20 Maart 2009.
  19. 19,0 19,1 19,2 (en) "Stipulasies vir die vertoon en gebruik van die nasionale vlag en -embleem en die streeksvlag en -embleem" (PDF). Protokolafdeling Regeringsekretariaat van die Hongkong SAR. Geargiveer vanaf die oorspronklike (PDF) op 11 April 2009. Besoek op 1 November 2009.
  20. 20,0 20,1 20,2 (en) "Vertoon van die vlae en embleme". Protokolafdeling Regeringsekretariaat van die Hongkong SAR. 6 September 2005. Geargiveer vanaf die oorspronklike op 25 Februarie 2009. Besoek op 21 Maart 2009.
  21. 21,0 21,1 21,2 (Klousule 4 van die Ordonnansie oor die Streeksvlag en Streeksembleem) (en) "Ordonnansie oor die Streeksvlag en Streeksembleem" (PDF). Tweetalige Reginligtingstelsel. 1 Julie 1997. Besoek op 25 Julie 2009.
  22. (Klousule 6 van die Ordonnansie oor die Streeksvlag en Streeksembleem) (en) "Ordonnansie oor die Streeksvlag en Streeksembleem" (PDF). Tweetalige Reginligtingstelsel. 1 Julie 1997. Besoek op 25 Julie 2009.
  23. (Klousule 7 van die Ordonnansie oor die Streeksvlag en Streeksembleem) (en) "Ordonnansie oor die Streeksvlag en Streeksembleem" (PDF). Tweetalige Reginligtingstelsel. 1 Julie 1997. Besoek op 25 Julie 2009.
  24. (en) "CAP 2401, Klousule 6 – Verbod op sekere gebruike van nasionale vlag en nasionale embleem". Tweetalige Reginligtingstelsel. 1 Julie 1997. Besoek op 25 Julie 2009.
  25. (en) "CAP 2401, Klousule 7 – Beskerming van die nasionale vlag en nasionale embleem". Tweetalige Reginligtingstelsel. 1 Julie 1997. Besoek op 25 Julie 2009.
  26. (en) "FINALE APPÈL NO. 4 VAN 1999 (KRIMINEEL)". Hoogste Hof van Appèl. 15 Desember 1999. Besoek op 25 Julie 2009.
  27. (en) "Jaarverslag 2001". Hongkong Joernalistevereniging. 9 Augustus 2001. Geargiveer vanaf die oorspronklike op 11 Oktober 2014. Besoek op 25 Julie 2009.
  28. (en) "Hongkong sluit Chinese boer op vir vlagverbranding". Arab Times. 20 September 2011. Besoek op 23 September 2011.
  29. (en) Alex Lo (5 November 2012). "Vlagswaaiers mag laf wees". South China Morning Post. Besoek op 21 Oktober 2016.
  30. (en) Joshua But; Tony Cheung (2 November 2012). "Hongkong uitvoerende hoof maan dat mense nie koloniale vlag gebruik". South China Morning Post. Besoek op 21 Oktober 2016.
  31. (en) "Enraged Protesters Storm the Legislature on the Anniversary of Hong Kong's Return to Chinese Sovereignty". Time. 1 Julie 2019. Geargiveer vanaf die oorspronklike op 9 Julie 2019. Besoek op 7 September 2020.
  32. (en) Oscar Holland (7 Julie 2019). "Designed as a symbol of unity, Hong Kong's flag becomes the focus of protest". CNN. Besoek op 7 September 2020.

Eksterne skakels[wysig | wysig bron]

Hierdie artikel is in sy geheel of gedeeltelik vanuit die Engelse Wikipedia vertaal.