Mari El
| Republiek van Mari El (Республика Марий Эл) |
|
|---|---|
.svg) Ligging van Mari El in Rusland |
|
| Land: |  Russiese Federasie |
| Russiese naam: | Республика Марий Эл |
| Plaaslike naam: | Республика Марий Эл |
| Status: | Outonome republiek |
| Distrik: | Wolga |
| Hoofstad: | Josjkar-Ola |
| Rang: oppervlakte: | 72 |
| Oppervlakte: | 23372,3 |
| Wateroppervlakte: | 928 km² (4%) |
| Rang: bevolking: | 66 |
| Bevolking: | 72 7979 (2002) |
| Tale: | Russies, Mari |
| Distrik: | Noordwes-Rusland |
| Godsdiens: | Russies-Ortodoks, oudgelowig ortodoks, soennisme, marla |
| President: | Leonid Markelof |
| Amptelike webtuiste: | gov.mari.ru |
| Volkslied: | Volkslied van Mari El |
| Tydsone: | 3 |
.png) Wapen |
 Vlag |
Mari El (Russies: Республика Марий Эл; Respoeblika Mari El) is ’n outonome republiek in die Russiese Federasie.
Inhoud |
[wysig] Geskiedenis
Die outonome oblast Mari ontstaan op 4 November 1920 en word op 5 Desember 1936 herorganiseer in die Mari-OSSR. Die outonome republiek Mari El in sy huidige vorm ontstaan op 22 Desember 1990.
[wysig] Geografie
Mari El is in die oostelike deel van die Oos-Europese Vlakte, langs die Wolga, geleë. Die moerasagtige Mari-laagvlakte lê in die weste van die republiek. 57% van die republiek is bedek met bosse. Die hoogste punt is 278 meter.
Daar is 476 rivere en meer as 200 mere in Mari El. Die meeste is maar klein en gewoonlik bevrore van die helfte van November tot die helfte van April. Groot, bevaarbare riviere is die Wetloega in die uiterste weste en die Wolga langs die suidgrens.
Die republiek grens in die noorde aan die oblast Nizjni Nowgorod, in die ooste aan die oblast Kirof, in die suide aan Tartarië en in die weste aan Tsjoewasjië.
[wysig] Klimaat
Mari El het ’n gematigde landklimaat. Die winters is gematig koud met sneeu. Die somers is warm en dikwels vogtig (reën).
- Gemiddelde temperatuur Januarie: −13 °C
- Gemiddelde temperatuur Julie: +19 °C
- Gemiddelde jaarlikse neerslag: 450-500 mm
[wysig] Bevolking
Die belangrikste bevolkingsgroepe is Mari's en Russe. Die Mari's praat ’n Finoegriese taal. Die standaardtaal is die oostelike variant, die Weide-Mari (марий йылме). Die westelike Berg-Mari (мары йлмы) het minder sprekers en word as ’n variant beskou.
Die Mari's het voor die Russiese Rewolusie van 1917 geen toegewese gebied gehad nie. Nou woon net 48,3% van die volk in Mari El. Die meeste woon in ander dele van Rusland; 4,1% woon buite Rusland. Russe vorm 47,5% van die bevolking, gevolg deur die Mari's (42,9%) en Tartare (6%).
[wysig] Politiek
Die hoof van die regering is die president. In 2004 was Leonid Igorewitsj Markelof die president. Hy is verkies in Januarie 2001.
[wysig] Ekonomie
Die republiek het feitlik geen grondstowwe wat van nywerheidsbelang is nie. Ander natuurlike bronne is: turf, bronwater en kalksteen.
Die mees ontwikkelde nywerhede is masjienbou, metaal- en houtbewerking en voedsel. Die meeste ondernemings is in die hoofstad, Josjkar-Ola.
[wysig] Verwysings
- Mari El. (2008). Encyclopædia Britannica. Deluxe Edition. Chicago: Encyclopædia Britannica.
