Kaïro

Kaïro القاهرة ⲕⲁϣⲣⲱⲙⲓ
Kaart	Wapen
	Vlag
Land	Egipte
Goewerment	Kaïro
Koördinate	30°3′N 31°14′O
Stigting	969
Oppervlakte:
- Totaal	606 vk km
Hoogte bo seevlak	68 m
Bevolking:
- Totaal (2018)	9 700 000
- Bevolkingsdigtheid	16 000/vk km
- Metropolitaanse gebied	20 439 541
Tydsone	UTC +2 (OET)
Burgemeester	Atef Abd El Hamid
Amptelike webwerf	cairo.gov.eg

Kaïro (Arabies: القاهرة, al-Qāhirah, [ælˈqɑːheɾa], , letterlik: "die Sterke"; Kopties: ⲕⲁϣⲣⲱⲙⲓ, Kashromi) is die hoofstad van Egipte en die grootste stad in die Arabiese wêreld. Die Egiptenaars gebruik dikwels ook die Hoog-Arabiese landnaam مصر, vir hulle hoofstad (Egiptiese Arabies: Masr).

Nasa-Satellietbeeld van Kaïro

Kaïro is die grootste stad in die Arabiese wêreld (Foto: 2004)

Met sy 9,7 miljoen inwoners in die stad en sowat 20,5 miljoen in die metropolitaanse gebied is Kaïro die grootste agglomerasie op die vasteland van Afrika. Dit is die vervoersentrum van Egipte en beskik oor 'n groot aantal moskees, universiteite, teaters, museums en argitektoniese besienswaardighede. Die ou stadskern van Kaïro is 'n uitstekende voorbeeld van die Islamse boustyl en sedert die jaar 1979 'n wêrelderfenisgebied van die Unesco. Kaïro staan dan ook bekend as "die stad van duisende minarette". Die Groot Piramide en Dodeakker van Giza is net buite Kaïro in die voorstad Giza, oorkant die Nylrivier, geleë. 'n Ander belangrike voorstad is Shubra El-Kheima.

Geskiedenis

Die huidige Kaïro is in die jaar 969 deur die Fatimidiese kalief Al-Moe'ies net suid van die Nyldelta gestig. Die stad sluit destyds die ou stad Foestat (Ou-Kaïro) in en word oorspronklik met afsonderlike woongebiede vir Arabiere, Berbers, Jode, Grieke, Koerde en Swartes aangelê, wat almal selfregerend is en oor hul eie instellings beskik.

Met die uitbreiding van die Fatimiederyk, wat uiteindelik naas Egipte ook groot dele van die Levant insluit, speel Kaïro 'n al hoe belangriker rol. Met die oprigting van die Al-Azhar-moskee ontwikkel die stad tot die godsdienstige en kulturele sentrum van die Islamitiese wêreld. Danksy die strategiese ligging aan die Nylrivier by die kruispunt van belangrike handelsroetes en naby die Middellandse en Rooisee groei die stad ook tot 'n eersterangse vervoer- en handelsentrum.

Bron

• (en) Aryeh Grabois: Medieval Civilization: An Illustrated Encyclopaedia. Jerusalem 1980: The Jerusalem Publishing House Ltd. / New York 1980: Mayflower Books

Eksterne skakels

• Wikimedia Commons het meer media in die kategorie Kaïro.
• (en) Toerisme-inligting oor Kaïro op Wikivoyage
• (ar) (en) Amptelike webwerf
• (en) (fr) Amptelike Unesco-bladsy