Gaan na inhoud

VSA Rugby

in Wikipedia, die vrye ensiklopedie
USA Rugby
Kenteken van VSA Rugby
Kenteken van VSA Rugby
Engelse naam USA Rugby
Amptelike naam naam United States of America Rugby Football Union
Land Vlag van Verenigde State van Amerika Verenigde State
Sportsoorte Rugby, Sewesrugby
Stigting 1975
Lid van Wêreldrugby
Aangesluit in 1987
Vastelandse beheerliggaam Rugby Amerikas Noord
Voorsitter Tom Cusack
Hoof- uitvoerende beampte Ross Young
Setel Glendale, Colorado, Verenigde State
Amptelike taal Engels
Amptelike webwerf usa.rugby

VSA Rugby (Engels: USA Rugby; amptelike naam: United States of America Rugby Football Union; letterlik: “Verenigde State van Amerika Rugbyvoetbalunie”, afgekort: “USAR”) is die bestuursliggaam wat rugby en sewesrugby in die Verenigde State beheer. Die beheerliggaam is in 1975 gestig en in Glendale, Colorado, gesetel. Sedert 1987 verteenwoordig dit die Verenigde State by Wêreldrugby en sedert 2001 ook by Rugby Amerikas Noord (“RAN”).

Geskiedenis

[wysig | wysig bron]
Die Verenigde State se nasionale rugbyspan tydens die Rugbywêreldbeker 1991

VSA Rugby is op 7 Junie 1975 in Chicago onder die naam Verenigde State van Amerika Rugbyvoetbalunie (United States of America Rugby Football Union, USARFU) gestig[1] en het in 1987, net voor die eerste rugbywêreldbekertoernooi, ’n volle lid van die Internasionale Rugbyvoetbalraad (IRVR; nou Wêreldrugby) geword.[2] Daarbenewens was VSA Rugby in 2001 ’n stigtingslid van die Noord-Amerikaanse en Wes-Indiese Rugbyvereniging (North America and West Indies Rugby Association, NAWIRA; nou Rugby Amerikas Noord), nadat Kanada en die Verenigde State by die Wes-Indiese Rugbyvereniging (West Indies Rugby Association) aangesluit het.[3]

Taak

[wysig | wysig bron]

VSA Rugby organiseer verskeie nasionale spanne, insluitend die Verenigde State se nasionale seniormansrugbyspan, vroue (albei die Arende) en jeug. VSA Rugby hou ook toesig oor sewesrugby in Verenigde State en aangesien dit ’n Olimpiese sportsoort is, werk hulle met die Amerikaanse Nasionale Olimpiese Komitee saam. Dit beheer ook die Division 1-A Rugby, ’n nasionale kompetisie vir o/20-mansspanne. Daarbenewens bestaan die Collegiate Rugby Championship vir juniorsewesspanne. Naas die amptelike nasionale span roep VSA Rugby ook ander keurspanne byeen. USA Selects is die tweede nasionale span van die Verenigde State en hulle het tot in 2016 aan die Amerikaanse Rugbykampioenskap deelgeneem, voordat hulle na Wêreldrugby se Stille Oseaan-uitdaagtoernooi oorgeskakel het. Die USA Sevens is die Amerikaanse sewesrugbyspan en hulle neem aan internasionale toernooie soos Wêreldrugby se Sewesreeks, Sewesrugbywêreldbeker en Olimpiese Somerspele deel. Daarbenewens bestuur die beheerliggaam kinder- en jeugrugby in die Verenigde State. Kinders en jongmense word reeds op skool aan rugby bekend gestel en na gelang van hul belangstelling en talent begin hulle met hul afrigting. Net soos ander rugbylande beskik die Verenigde State oor ’n o/20-nasionale span wat aan die Wêreldrugby o/20-kampioenskap deelneem.[4] Rugby word ook toenemend gewild by kolleges en universiteite en aangebied as ’n alternatief vir Amerikaanse voetbal.[5]

Die beheerliggaam reël ook die plaaslike kompetisies. Die professionele Major League Rugby, waaraan elf klubspanne in 2024 deelgeneem het, is die belangrikste rugby-liga in die Verenigde State. Dit is in 2017 gestig met die doel om Amerikaanse rugby verder te ontwikkel. Sedertdien speel die meeste spelers van die Amerikaanse nasionale span in dié liga. Oorsese spelers is veral afkomstig van Engeland, Suid-Afrika en Australië. Bo die nasionale kampioenskap word jaarliks saam met twee spanne uit Argentinië en een elk uit Brasilië, Chili, Paraguay en Uruguay die internasionale Superrugby Amerikas-toernooi beslis.[6] Die belangrikste vrouerugby-liga is die professionele Women’s Premier League Rugby, waaraan sewe spanne deelneem.[7] Benede die professionele vlak sedert 2025 is die halfprofessionele Women’s Elite Rugby, wat tussen ses spanne beslis word.

VSA Rugby organiseer ook gereeld internasionale toernooie. Onder andere word die VSA Sewes jaarliks op die Dignity Health Sportpark in Los Angeles beslis. VSA Rugby sal beide die Rugbywêreldbeker 2031 en Vrouerugbywêreldbeker 2033 aanbied.[8]

Kenteken

[wysig | wysig bron]

VSA Rugby se kenteken toon ’n Amerikaanse arend (Haliaeetus leucocephalus) in die nasionale kleure van wit, blou en rooi met ’n rugbybal, met die belettering USA Rugby daaronder. Die nasionale spanne se bynaam is die Eagles („Arende“), wat aan die Verenigde State se nasionale voël, die Amerikaanse arend, ontleen is. Die spanne se gelukbringer is derhalwe ’n Amerikaanse arend met die naam Rookie the Eagle.

Sien ook

[wysig | wysig bron]
Rugbyportaal

Verwysings

[wysig | wysig bron]
  1. ↑ (en) "Can American rugby move beyond the college campus?". The Guardian. 25 September 2011. Besoek op 20 Junie 2025.
  2. ↑ (en) "USA". Wêreldrugby. Besoek op 20 Junie 2025.
  3. ↑ (en) "About RAN". Rugby Amerikas Noord. 2001. Besoek op 20 Junie 2025.
  4. ↑ (en) "World Rugby U20 Championship". Wêreldrugby. Besoek op 20 Junie 2025.
  5. ↑ (en) "NFL, meet your latest rival: Rugby is coming to America". qz.com. 10 November 2015. Besoek op 20 Junie 2025.
  6. ↑ (en) "Super Rugby Americas to launch without Pride or Jaguares". Americas Rugby News. 22 Desember 2022. Besoek op 20 Junie 2025.
  7. ↑ (en) Wendy Young (1 September 2009). "Preview of Teams in the USA Rugby Women's Premier League (WPL)". Women's Rugby News. Besoek op 20 Junie 2025.
  8. ↑ (en) "Rugby World Cup host locations confirmed through to 2033". Wêreldrugby. 12 Mei 2022. Besoek op 20 Junie 2025.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=VSA_Rugby&oldid=2814548"