Ierse Rugbyvoetbalunie
| Ierse Rugbyvoetbalunie | |
|---|---|
 Kenteken van die Ierse Rugbyvoetbalunie
| |
| Engelse naam | Irish Rugby Football Union |
| Afkorting | IRFU |
| Iers-Gaeliese naam | Cumann Rugbaí na hÉireann |
| Lande |  Ierland en .svg){kind=small} Noord-Ierland
|
| Sportsoorte | Rugby, Sewesrugby |
| Stigting | 1879 |
| Gestig in | Dublin, Ierland |
| Lid van | Wêreldrugby |
| Aangesluit in | 1886 (Stigtingslid) |
| Vastelandse beheerliggaam | Rugby Europa |
| President | John Robinson |
| Setel | Lansdowne Road, Dublin, Ierland |
| Amptelike tale | Engels en Iers-Gaelies |
| Amptelike webwerf | irishrugby.ie |
Die Ierse Rugbyvoetbalunie (Engels: Irish Rugby Football Union, afgekort “IRFU”; Iers-Gaelies: Cumann Rugbaí na hÉireann) is die bestuursliggaam wat rugby in Ierland (beide die Republiek Ierland en Noord-Ierland) beheer. Die unie is by Wêreldrugby geaffilieer en organiseer verskeie nasionale spanne, insluitend Ierland se nasionale seniormansrugbyspan, vroue en jeug. Saam met die Engelse Rugbyvoetbalunie, die Franse Rugbyfederasie, die Italiaanse Rugbyfederasie, die Skotse Rugbyunie en die Walliese Rugbyunie organiseer hulle die jaarlikse Sesnasies-toernooi, die vernaamste rugbytoernooi in die Noordelike Halfrond. Die IRFU hou ook toesig oor Sewesrugby in Ierland en aangesien dit ’n Olimpiese sportsoort is, werk hulle met die Britse en Ierse Nasionale Olimpiese Komitees saam. Die Ierse Rugbyvoetbalunie het reeds as medegasheer van belangrike toernooie soos die rugbywêreldbekers in 1991 en 1999 (albei saam met die ander destydse Vyfnasies) opgetree.
Die IRFU het in 1879 uit die samesmelting van twee beheerliggame ontstaan.[1] In 1886 het die IRFU saam met die Skotse Rugbyunie (SRU) en die Walliese Rugbyunie (WRU) die Internasionale Rugbyraad (IRR), die huidige Wêreldrugby, gestig.[2] Die IRFU bestaan uit die vier provinsiale beheerliggame Connacht Rugby, Leinster Rugby, Munster Rugby en Ulster Rugby, wat elkeen met sy eie span deelneem aan die internasionale liga Pro14, saam met spanne uit Italië, Skotland, Suid-Afrika en Wallis. Benede word die All-Ireland League tussen 50 spanne uit die hele Ierland gespeel. Bo die Pro14 word jaarliks saam met klubs uit Engeland, Frankryk, Ierland, Italië en Wallis om die Europese Rugbykampioenskapbeker en die Europese Rugbyuitdaagbeker gespeel.
Naas die amptelike nasionale span roep die IRFU ook ander keurspanne byeen. Ireland Wolfhounds is die tweede nasionale span van Ierland, gevolg deur Emerging Ireland (“Opkomende Ierland”). Nes ander rugbynasies beskik Ierland oor ’n o/20-nasionale span wat aan die o/20-Sesnasies-toernooi en die Wêreldrugby o/20-kampioenskap deelneem.[3][4] Kinders en jongmense word reeds op skool aan rugby bekend gestel en na gelang van hul belangstelling en talent, ontvang hulle dan afrigting. Ierland beskik oor ’n nasionale span vir skoliere, die Schoolboys, wat as ’n voorbereiding op die Ierse nasionale rugbyspan dien.
Aangesien die Ierse nasionale rugbyspan beide die Republiek Ierland en Noord-Ierland verteenwoordig, gebruik hulle – nes die soortgelyke Ierse nasionale hokkiespan en die Ierse nasionale krieketspan – nie ’n nasionale vlag nie. Derhalwe gebruik die Ierse Rugbyvoetbalunie nóg een van die lande se volksliedere, nóg een val hul vlae as ’n verteenwoordigende simbool; pleks daarvan gebruik die Ierse nasionale rugbyspan sy eie vlag – dié van die Ierse Rugbyvoetbalunie – en himne.
Dit word as ’n groot prestasie beskou om saam met die Britse en Ierse Leeus na die Suidelike Halfrond te toer, waar hulle sowat al om die vier jaar teen die Nieu-Seelandse All Blacks, die Suid-Afrikaanse Springbokke of die Australiese Wallabies speel.[5]
Sien ook[wysig | wysig bron]
Verwysings[wysig | wysig bron]
- ↑ (en) Tony Collins (2018). The Oval World: A global history of rugby. Londen: Bloomsbury. p. 122. ISBN 978-1-4088-4372-7.
- ↑ (en) "Member Unions". Wêreldrugby. Besoek op 7 April 2021.
- ↑ (en) "Ireland U20". Sesnasies. Besoek op 7 April 2021.
- ↑ (en) "World Rugby U20 Championship". Wêreldrugby. Besoek op 7 April 2021.
- ↑ (en) "British & Irish Lions". Britse en Ierse Leeus. Besoek op 7 April 2021.
Eksterne skakels[wysig | wysig bron]
Nasionale Rugbyunies van Wêreldrugby | ||
|---|---|---|
Argentinië • Australië • Duitsland • Engeland • Frankryk • Ierland • Italië • Japan • Kanada • Kenia • Nieu-Seeland • Skotland • Suid-Afrika • Verenigde State • Wallis |  | |
