Nieu-Seeland Rugby

in Wikipedia, die vrye ensiklopedie
Nieu-Seeland Rugby
Kenteken van Nieu-Seeland Rugby
Kenteken van Nieu-Seeland Rugby
Engelse naam New Zealand Rugby
Afkorting NZR
Land Vlag van Nieu-Seeland Nieu-Seeland
Sportsoorte Rugby, Sewesrugby
Gestig op 16 April 1892
Gestig in Wellington, Nieu-Seeland
Lid van Wêreldrugby
Aangesluit in 1949
Vastelandse beheerliggaam Oseanië Rugby
President Bill Osborne
Hoof- uitvoerende beampte Mark Robinson
Setel Wellington, Nieu-Seeland
Amptelike taal Engels
Amptelike webwerf nzrugby.co.nz

Nieu-Seeland Rugby (Engels: New Zealand Rugby, afgekort “NZR”) is die bestuursliggaam wat rugby in Nieu-Seeland beheer. NZR is by Wêreldrugby geaffilieer en organiseer verskeie nasionale spanne, insluitend Nieu-Seeland se nasionale seniormansrugbyspan (die All Blacks), vroue en jeug. Dit is op 16 April 1892 as die Nieu-Seelandse Rugbyvoetbalunie (New Zealand Rugby Football Union, NZRFU), 12 jaar ná die eerste provinsiale rugbyunies in Nieu-Seeland, gestig.[1] In 1949 is dit geaffilieer by die Internasionale Rugbyraad, nou bekend as Wêreldrugby, die wêreldwye beheerliggaam van rugby.[2] Dit het in 2006 die woord “Voetbal” uit sy naam geskrap. Die handelsnaam New Zealand Rugby is in 2013 goedgekeur.[3] Dit is wettiglik ’n geregistreerde vereniging met die naam New Zealand Rugby Union Incorporated.[4][5] Hulle bestuur saam met die Argentynse Rugbyunie, Rugby Australia en die Suid-Afrikaanse Rugbyunie as ’n gesamentlike onderneming SANZAAR, die beheerliggaam van beide Superrugby en Die Rugbykampioenskap, die vernaamste rugbytoernooie in die Suidelike Halfrond. Die NZR hou ook toesig oor Sewesrugby in Nieu-Seeland en aangesien dit ’n Olimpiese sportsoort is, werk hulle met die Nieu-Seelandse Nasionale Olimpiese Komitee saam. Nieu-Seeland Rugby het reeds belangrike toernooie soos die Rugbywêreldbeker 1987 (saam met Australië) en die Rugbywêreldbeker 2011 aangebied.

’n Kaart van die Nieu-Seelandse plaaslike beheerliggame en sy spanne

Die organisasie se hoofdoelstellings, soos daargestel in die NZR se grondwet,[6] is om rugby in die hele Nieu-Seeland te bevorder en te ontwikkel; die reëling en deelname aan wedstryde en toere in Nieu-Seeland en oorsee; die verteenwoordiging van Nieu-Seeland by Wêreldrugby; Nieu-Seelandse verteenwoordigende spanne saam te stel en te bestuur; en die aanmoediging van deelname aan die sport. NZR se hoofkantoor is geleë in Wellington, met ’n kantoor in Auckland.

Naas die amptelike nasionale span roep NZR ook ander keurspanne byeen. Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Die talentvolste spelers op skoolvlak word vir die skoolspan NZ Schools gekeur.[7] Die volgende vlak op pad na die nasionale span All Blacks is die o/20-nasionale span wat aan die Wêreldrugby o/20-kampioenskap deelneem.[8] Naas hierdie span vir ’n bepaalde ouderdomsgroep hou NZR ook toesig oor spanne wat volgens spesiale kriteria saamgestel word. Die Junior All Blacks is, ten spyte van hul naam, geen nasionale span vir jongmense nie, maar die tweede span vir opkomende (toekomstige) All Blacks. Tydens toere van ander spanne deur Nieu-Seeland speel die besoekers gewoonlik ook teen die Nieu-Seeland Māori. ’n Speler moet oor ’n Māori-afkoms beskik om vir hierdie span in aanmerking te kan kom.[9] Die span Heartland XV bestaan uit amateurspelers.[10] Die All Blacks Sevens is die Nieu-Seelandse sewesrugbyspan en hulle neem aan internasionale toernooie soos Wêreldrugby se Sewesreeks, Sewesrugbywêreldbeker, Olimpiese Somerspele en Statebondspele deel.[11]

Op ’n nasionale vlak is klubs net in ’n plaaslike opsig belangrik. Die 26 plaaslike beheerliggame (17 op die Noordeiland en nege op die Suideiland), wat elkeen met ’n keurspan aan die professionele liga, die Mitre 10-beker, of die semi-professionele Heartland-kampioenskap deelneem, is belangriker. Bo die nasionale kampioenskap word jaarliks saam met spanne uit Australië, Suid-Afrika en Argentinië die internasionale Superrugbytoernooi uitgespeel. Aangesien die seisoene min oorvleuel word talle spelers in al drie ligas ingespan.

Volgens NZR se beginsels moet ’n speler vir ’n plaaslike span in die ITM-beker of Superrugby speel om in aanmerking vir die All Blacks te kan kom. Indien ’n speler in die buiteland speel, mag hy nie vir die All Blacks uitdraf nie. As gevolg van hierdie regulasie, wat ander vername rugbynasies nie het nie, bly die beste spelers vir enkele jare in Nieu-Seeland en hulle kondig dan hul uittrede uit die nasionale span aan, om aansluitend in die finansieel sterkste rugbyligas ter wêreld (die Engelse Premierskap of die Franse Top 14) te gaan speel.

Sien ook[wysig | wysig bron]

Verwysings[wysig | wysig bron]

  1. ↑ (en) "Our History". Nieu-Seeland Rugby. Besoek op 7 April 2021.
  2. ↑ (en) "Member Unions". Wêreldrugby. Besoek op 7 April 2021.
  3. ↑ (en) McKendry, Patrick (26 Maart 2013). "NZ rugby targets Auckland's Asian population". The New Zealand Herald. APNZ. Besoek op 7 April 2021.
  4. ↑ (en) "NEW ZEALAND RUGBY UNION INCORPORATED (215355) (NZBN: 9429042872061) [Incorporated Society] Registered". Besoek op 7 April 2021.[dooie skakel]
  5. ↑ (en) "New Zealand Rugby Union Incorporated: Constitution" (PDF). Besoek op 7 April 2021.[dooie skakel]
  6. ↑ (en) NZRU Constitution
  7. ↑ (en) "New Zealand Schools". All Blacks. Besoek op 7 April 2021.
  8. ↑ (en) "New Zealand Under 20". All Blacks. Besoek op 7 April 2021.
  9. ↑ (en) "Māori All Blacks". All Blacks. Besoek op 7 April 2021.
  10. ↑ (en) "Heartland XV". All Blacks. Besoek op 7 April 2021.
  11. ↑ (en) "All Blacks Sevens". All Blacks. Besoek op 7 April 2021.

Eksterne skakels[wysig | wysig bron]

Ontsluit van "https://af.wikipedia.org/w/index.php?title=Nieu-Seeland_Rugby&oldid=2471090"