Franse Rugbyfederasie

in Wikipedia, die vrye ensiklopedie
Jump to navigation Jump to search
Franse Rugbyfederasie
Kenteken van die Franse Rugbyfederasie
Kenteken van die Franse Rugbyfederasie
Franse naam Fédération française de rugby
Afkorting FFR
Land Vlag van Frankryk Frankryk
Sportsoorte Rugby, Sewesrugby
Gestig op 13 Mei 1919
Gestig in Parys, Frankryk
Lid van Wêreldrugby
Aangesluit in 1978
Vastelandse beheerliggaam Rugby Europa
President Bernard Laporte
Setel Marcoussis, Frankryk
Amptelike taal Frans
Amptelike webwerf ffr.fr

Die Franse Rugbyfederasie (Frans: Fédération française de rugby, afgekort “FFR”) is die bestuursliggaam wat rugby in Frankryk beheer. Die FFR is by Wêreldrugby geaffilieer en organiseer verskeie nasionale spanne, insluitend Frankryk se nasionale seniormansrugbyspan (Le Bleus), vroue en jeug, asook Ligue nationale de rugby wat Frankryk se professionele ligas administreer. Saam met die Engelse Rugbyvoetbalunie, die Ierse Rugbyvoetbalunie, die Italiaanse Rugbyfederasie, die Skotse Rugbyunie en die Walliese Rugbyunie organiseer hulle die jaarlikse Sesnasies-toernooi, die vernaamste rugbytoernooi in die Noordelike Halfrond. Die FFR hou ook toesig oor Sewesrugby in Frankryk en aangesien dit ’n Olimpiese sportsoort is, werk hulle met die Franse Nasionale Olimpiese Komitee saam. Die Franse Rugbyfederasie het reeds as medegasheer van belangrike toernooie soos die rugbywêreldbekers in 1991 en 1999 (albei saam met die ander destydse Vyfnasies), asook die Rugbywêreldbeker 2007 (saam met Skotland en Wallis) opgetree. Die komende Rugbywêreldbeker 2023 sal ook in Frankryk gehou word.

Ligging van al die spanne, wat reeds aan die Franse Top 14 deelgeneem het (rooi punte); binne die rooi lyn is Oksitanië, die tradisionele sentrum van Franse rugby
Oefenkamp by die FFR se setel in Marcoussis

Die FFR is op 13 Mei 1919 gestig en het die sportkommissie van die polisportiewe beheerliggaam, die Unie van Franse atletiese sportverenigings (Union des sociétés françaises de sports athlétiques, USFSA), vervang.[1] Die FFR het op sy beurt in 1934 FIRA (Fédération internationale de rugby amateur), vandag Rugby Europa, as ’n mededinger vir die Internasionale Rugbyraad (IRR, vandag Wêreldrugby) gestig; hulle het eers in 1978 ’n lid van laasgenoemde geword.[2] As gevolg van die baie groter gewildheid van rugby in Suid-Frankryk was dié sport veral in Oksitanië oor dekades heen deur ’n kleinskaalse strukturering gekenmerk. In die noorde van die land het elke plaaslike beheerliggaam toesig gehou oor ’n groter geografiese gebied. As deel van ’n fundamentele strukturele hervorming van die FFR in 2018 het die destydse 26 plaaslike beheerliggame 13 nuwes gevorm, wat nou amper met die geografiese uitbreiding van dié van die Franse geweste ooreenstem.[3]

Drie plaaslike beheerliggame is oorgrens: Aan die Ligue régionale Auvergne-Rhône-Alpes de rugby behoort ook ’n Switserse span,[4] terwyl Andorra en Monaco onderskeidelik onder toesig van die Ligue régionale Occitanie de rugby en die Ligue régionale Provence Alpes Côte d’Azur de rugby is. Die Ligue nationale de rugby reël die professionele spelbedryf in Frankryk; hulle hou toesig oor die twee boonste Franse ligas, die Top 14 met 14 spanne en die Pro D2 met 16 spanne.[5] Bo die nasionale kampioenskap word jaarliks saam met klubs uit Engeland, Ierland, Italië, Skotland en Wallis die Europese Rugbykampioenskapbeker en die Europese Rugby-uitdaagbeker uitgespeel.

Naas die amptelike nasionale span roep die FFR ook ander keurspanne byeen. Nes ander rugbynasies beskik Frankryk oor ’n o/20-nasionale span wat aan die o/20-Sesnasies-toernooi en die Wêreldrugby o/20-kampioenskap deelneem.[6][7] Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting.[8] Sedert die 2017/18-seisoen is die Franse Barbarians die tweede nasionale span van Frankryk.[9]

Verwysings[wysig | wysig bron]

  1. (fr) "La Fédération". Franse Rugbyfederasie. Besoek op 7 April 2021.
  2. (en) "Member Unions". Wêreldrugby. Besoek op 7 April 2021.
  3. (fr) "Réforme Territoriale : Ligues Régionales". Franse Rugbyfederasie. 17 Oktober 2017. Besoek op 7 April 2021.
  4. (fr) "Découvrez l'incroyable Servette de Genève, prochain adversaire de Cusset". Franse Rugbyfederasie. 11 April 2019. Besoek op 7 April 2021.
  5. (fr) "Qui sommes-nous?". Ligue nationale de rugby. 2020. Besoek op 7 April 2021.
  6. (en) "France U20". Sesnasies. Besoek op 7 April 2021.
  7. (en) "World Rugby U20 Championship". Wêreldrugby. Besoek op 7 April 2021.
  8. (fr) "Le rugby à l'école". Franse Rugbyfederasie. Besoek op 7 April 2021.
  9. (fr) "Barbarians Français : Une équipe d'exception". Franse Rugbyfederasie. Besoek op 7 April 2021.

Eksterne skakels[wysig | wysig bron]


Nasionale Rugbyunies van Wêreldrugby Rugby union pictogram.svg

ArgentiniëAustraliëDuitslandEngelandFrankrykIerlandItaliëJapanKeniaNieu-SeelandSkotlandSuid-AfrikaWallis