Walliese Rugbyunie

in Wikipedia, die vrye ensiklopedie
Walliese Rugbyunie
Kenteken van die Walliese Rugbyunie
Kenteken van die Walliese Rugbyunie
Engelse naam Welsh Rugby Union
Afkorting WRU
Walliese naam Undeb Rygbi Cymru
Land Vlag van Wallis Wallis
Sportsoorte Rugby, Sewesrugby
Gestig op 12 Maart 1881
Gestig in Neath, Wallis
Lid van Wêreldrugby
Aangesluit in 1886 (Stigtingslid)
Vastelandse beheerliggaam Rugby Europa
Patroon William, Prins van Wallis
Voorsitter Ieuan Evans
President Gerald Davies
Setel Millennium-stadion, Cardiff, Wallis
Amptelike tale Engels en Wallies
Amptelike webwerf wru.wales

Die Walliese Rugbyunie (Engels: Welsh Rugby Union, afgekort “WRU”; Wallies: Undeb Rygbi Cymru) is die bestuursliggaam wat rugby in Wallis beheer. Die unie is by Wêreldrugby geaffilieer en organiseer verskeie nasionale spanne, insluitend Wallis se nasionale seniormansrugbyspan, vroue en jeug. Saam met die Engelse Rugbyvoetbalunie, die Franse Rugbyfederasie, die Ierse Rugbyvoetbalunie, die Italiaanse Rugbyfederasie en die Skotse Rugbyunie organiseer hulle die jaarlikse Sesnasies-toernooi, die vernaamste rugbytoernooi in die Noordelike Halfrond. Die WRU hou ook toesig oor Sewesrugby in Wallis en aangesien dit ’n Olimpiese sportsoort is, werk hulle met die Britse Nasionale Olimpiese Komitee saam. Die Walliese Rugbyunie het reeds as medegasheer van belangrike toernooie opgetree soos die rugbywêreldbekers in 1991 en 1999 (albei saam met die ander destydse Vyfnasies), asook die Rugbywêreldbeker 2007 (saam met Frankryk en Skotland) en die Rugbywêreldbeker 2015 (saam met Engeland).

Walliese rugbystreke
Die Walliese Rugbyunie is in 1881 in die Castle Hotel in Neath gestig

Die WRU is in 1881 gestig.[1] In 1886 het die WRU saam met die Ierse Rugbyvoetbalunie (IRFU) en die Skotse Rugbyunie (SRU) die Internasionale Rugbyraad (IRR), die huidige Wêreldrugby, gestig.[2] Die WRU hou toesig oor die vier professionelle rugbyspanne Cardiff Blues, Scarlets, Dragons en Ospreys wat aan die professionelle Liga Verenigde Rugbykampioenskap deelneem, saam met spanne uit Ierland, Italië, Skotland en Suid-Afrika. Bo die nasionale kampioenskap word jaarliks saam met klubs uit Engeland, Frankryk, Ierland, Italië, Skotland en Suid-Afrika die Europese Rugbykampioenskapbeker en die Europese Rugbyuitdagingsbeker uitgespeel. Benede die Verenigde Rugbykampioenskap word die Walliese Premierafdeling uitgespeel, waaraan twaalf Walliese spanne deelneem.

Naas die amptelike nasionale span roep die WRU ook ander keurspanne byeen. Die Wales A is die tweede nasionale span van Wallis, hulle het egter sedert 2000 in geen wedstryd meer te staan gekom nie. Nes ander rugbylande beskik Wallis oor ’n o/20-nasionale span wat aan die o/20-Sesnasies-toernooi en die Wêreldrugby o/20-kampioenskap deelneem.[3][4] Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Wallis beskik oor ’n nasionale span vir studente, die Schoolboys, wat as ’n voorbereiding op die Walliese nasionale rugbyspan dien.

Dit word as ’n groot prestasie beskou om saam met die Britse en Ierse Leeus na die Suidelike Halfrond te toer, waar hulle sowat al om die vier jaar teen die Nieu-Seelandse All Blacks, die Suid-Afrikaanse Springbokke of die Australiese Wallabies speel.[5]

Verwysings[wysig | wysig bron]

  1. (en) "WRU: History of the Welsh Rugby Union: A Brief History". Walliese Rugbyunie. 2009. Geargiveer vanaf die oorspronklike op 14 Augustus 2011. Besoek op 16 Julie 2009.
  2. (en) "Wales". Wêreldrugby. Besoek op 30 Oktober 2023.
  3. (en) "Wales U20". Sesnasies. Geargiveer vanaf die oorspronklike op 30 Oktober 2023. Besoek op 30 Oktober 2023.
  4. (en) "World Rugby U20 Championship". Wêreldrugby. Besoek op 30 Oktober 2023.
  5. (en) "British & Irish Lions". Britse en Ierse Leeus. Besoek op 30 Oktober 2023.

Eksterne skakels[wysig | wysig bron]