Belfast
|
Belfast |
|
|---|---|
| Kaart | Wapen |
 |
|
 |
|
| Vlag | |
 |
|
| Land |  Verenigde Koninkryk |
| Distrik | City of Belfast |
| County | County Antrim County Down |
| Land (VK) | Noord-Ierland |
| Koördinate | |
| Stigting | 1603 |
| Stadstatus | 1888 |
| Oppervlakte: | |
| - Totaal | 115 km² |
| Hoogte bo seevlak | 67 m |
| Bevolking: | |
| - Totaal (City of Belfast) | 267 500 |
| - Bevolkingsdigtheid | 2 326/vk km |
| - Urban Area | 483 418 |
| - Metropolitaanse gebied | 641 638 |
| Tydsone | UTC +0 Somertyd: UTC +1 |
| Klimaat | |
| - Tipe | Gematigde klimaat |
| - Gemiddelde jaarlikse temperatuur | 9,1 °C |
| - Gem. temp. Januarie/Julie | 3,8 / 14,7 °C |
| - Gemiddelde jaarlikse neerslae | 846 mm |
| Lord Mayor | Niall Ó Donnghaile (Sinn Féin) |
| Amptelike Webwerf | Belfast |
- Hierdie artikel handel oor Belfast in Noord-Ierland. Vir die dorp in Mpumalanga, sien Belfast, Mpumalanga.
Belfast (Iers: Béal Feirste) is die hoofstad en grootste stad van Noord-Ierland, een van die vier deelstate van die Verenigde Koninkryk, met 'n oppervlak van 115 vierkante kilometer en 'n bevolking van 267 500. Die metropolitaanse gebied van Belfast (Belfast Metropolitan Urban Area) het 'n bevolking van 641 638.
Belfast lê naby die Laganrivier en teen die uiterste suidweste van die Belfast Lough, 'n lang natuurlike inham, wat van Belfast een van die belangrikste seehawens en die tweede grootste stad van Ierland gemaak het. Twee uitgestrekte bergreekse lê ten suide en noorde van die stad, die Castlereagh-heuwels en die Antrim-heuwels.
Die naam Belfast is afgelei van die Iers-Gaeliese Béal Feirste ("monding van die Farset"). Die stad lê oorspronklik teen die Farsetrivier, tog is die Lagan nou die belangrikste rivier van Belfast. Die Farsetrivier vloei tans onder die High Street en het byna in vergetelheid geraak.
[wysig] Geskiedenis
Die eerste nedersettings in die gebied van Belfast het in die bronstydperk ontstaan, en die oorblyfsels van versterkings uit die ystertydperk kan nog steeds besigtig word. In 1177 is 'n Normandiese kasteel in Belfast opgerig.
Die huidige stad is in 1603 gestig, en die Britse Kroon het die immigrasie van Skotse Presbiterianers bevorder. Sodoende het Belfast gaandeweg tot die Ierse sentrum van die Protestantisme ontwikkel. Franse Hugenote-vlugtelinge het 'n belangrike rol by die stigting van die plaaslike linnenywerheid gespeel. Die 500 Franse gesinne, wat hulle in die omgewing van die stad Lisburn gevestig het, het moderne spin-, weef- en bleektegnieke ingevoer, en danksy hulle bydrae het die Laganvallei tot 'n beduidende nywerheidsentrum in Ierland ontwikkel.
Belfast het tydens die 17de eeu vinnig gegroei en was in die 18de, 19de en 20ste eeu 'n belangrike handel- en nywerheidsentrum. Die inwonertal het teen die jaar 1800 tot 24 000 gestyg en in 1850 reeds 100 000 beloop. Belfast se ekonomie het naas die linnenywerheid ook op die katoenhandel, die tabaknywerheid, die vervaardiging van toue en die skeepsbou gebaseer. Die eerste spoorwegverbinding tussen Lisburn en Belfast is in 1839 geopen. In 1888 het Belfast stadstatus gekry, en teen die einde van die eeu het sy bevolking tot 350 000 gestyg.
Die hawe is reeds in die 18de eeu vergroot. Die skeepsbounywerheid Harland en Wolff het hier oor die grootste droogdok ter wêreld beskik, en in 1912 het die reusepassasierskip RMS Titanic, wat deur Harland en Wolff gebou is, van hier vir sy eerste vaart vertrek. Tydens die Tweede Wêreldoorlog is die hawe en stadsentrum in April en Mei 1941 deur Duitse bomaanvalle verwoes.
Met die stigting van Noord-Ierland as 'n deelstaat van die Verenigde Koninkryk in die jaar 1921 het Belfast sy administratiewe setel geword. Die stad was in sy geskiedenis dikwels die toneel van onluste in die konflik tussen die Protestants-Britse en Iers-nasionalisties gesinde Rooms-Katolieke bevolking. Die mees onlangse burgeroorlogstoestand, die sogenaamde Troubles, het in die tydperk tussen 1969 en die laat negentigerjare geheers.
Die politieke situasie en ekonomiese ontwikkeling het sedert die sestigerjare van die 20ste eeu tot die agteruitgang van Belfast se nywerhede gelei. In die laaste jare is daar pogings onderneem om die plaaslike ekonomie deur grootskaalse beleggings te stimuleer.
[wysig] Klimaat
Belfast het soos die grootste deel van Ierland 'n matige klimaat met hoë reënval. Die gemiddelde maksimale temperature is 19 °C in Julie en 8 °C in Januarie, met jaarliks sowat 200 reëndae en 'n gemiddelde reënval van 850 millimeter. Sneeuval en nat sneeu kom af en toe in die winter voor.
