Elon Musk

in Wikipedia, die vrye ensiklopedie
Elon Musk
Musk in 2016
Gebore
Elon Reeve Musk

28 Junie 1971 (1971-06-28) (52 jaar oud)
NasionaliteitVlag van Suid-Afrika Suid-Afrika
Vlag van Kanada Kanada
Vlag van Verenigde State van Amerika Verenigde State
BeroepEntrepreneur, uitvinder, belegger, tegnoloog
Bekend virSpaceX, PayPal, Tesla Motors, Hyperloop, Zip2, SolarCity
TitelHoof- uitvoerende beampte en tegniese direkteur van SpaceX
Produkargitek en uitvoerende hoof van Tesla Motors
Voorsitter van SolarCity
EggenootJustine Musk (2000–2008)
Talulah Riley (2010–2016)
Kinders6 seuns
Ouer(s)Errol Musk en Maye Musk
Webwerfwww.elonmusk.com
Handtekening

Elon Musk (gebore 28 Junie 1971 in Pretoria, Suid-Afrika) is 'n VSA-gebaseerde internet- en ruimtelanseringsentrepreneur.[1] Hy het Suid-Afrikaanse, Kanadese en Amerikaanse burgerskap.

Vroeë lewe

Musk is gebore op 28 Junie 1971 in Pretoria, Transvaal, Suid-Afrika,[2] die seun van Maye Musk (née Haldeman), 'n mannekyn en dieetkundige vanaf Saskatchewan, Kanada, en Errol Musk, 'n Suid-Afrikaanse elektromeganiese ingenieur, vlieënier en matroos. Hy het 'n jonger broer, Kimbal (gebore 1972), en 'n jonger suster, Tosca (gebore 1974).[3]

Aktiwiteite as entrepreneur

In 1995 het Musk sy doktorale studies in die fisika van energie aan Stanford Universiteit gestaak om die medestigter van die maatskappy Zip2 te word. Die maatskappy het publikasiesagteware aanlyn vir nuusorganisasies voorsien. In 1999 het Compaq se AltaVista-afdeling Zip2 vir VS$ 341 miljoen in kontant en effekte gekoop. Elon en sy broer Kimbal het ongeveer 12 persent aandele in Zip2 besit op daardie tydstip.

In Maart 1999 word Musk die medestigter van X.com, 'n aanlyn-bankbetaaldiens. X.com staak sy bankdiens, maar die maatskappy se PayPal aanlyn-betaaldiens wat in Maart 2000 bekom is as deel van sy aankoop van Confinity, was uiters suksesvol. In Februarie 2001, het X.com sy naam verander na PayPal. In Oktober 2002 is PayPal deur eBay bekom vir VS$ 1,5 triljoen in effekte. Voor die maatskappy verkoop is, het Musk 11,7% van PayPal besit.

In Junie 2002 stig Musk sy derde maatskappy, Space Exploration Technologies (SpaceX), waarvan hy tans die hoof- uitvoerende beampte en hoof- tegnologiebeampte is. SpaceX ontwikkel en vervaardig ruimtelanseringvuurpyle, met die klem op lae koste en hoë betroubaarheid. Die maatskappy se eerste twee lanseertuie is die Falcon 1 en Falcon 9 vuurpyle.

Musk se persoonlike rykdom word in Augustus 2018 op ongeveer VS$ 20,2 miljard deur Forbes geskat.[4]

Nie-ruimtegebaseerde aktiwiteite

Musk is die voorsitter van die Musk Stigting, wat fokus op filantropiese aktiwiteite in die velde van wetenskap-onderwys, pediatriese gesondheid en skoon energie.

Ruimtegebaseerde aktiwiteite

In 2001 het Musk planne ontwikkel vir 'n "Mars Oase" projek, waarvolgens 'n miniatuur eksperimentele groenhuis op Mars geland sou word, waarin gesaaides gekweek kon word. Hy het die projek op ys geplaas nadat hy uitgevind het dat die koste van lansering so hoog sal wees dat geen geld beskikbaar sou wees om so 'n projek te ontwikkel nie. Hy het besluit om eerder te werk om die koste van lanserings te verlaag en het vir dié doel SpaceX gestig.

Musk is 'n lid van die raad van direkteure van die Planetary Society en die raad van trustees van die X-Prize Foundation.

Belangstellings

Musk besit 'n McLaren F1 sportmotor en 'n Tsjeggies-vervaardigde Aero L-39 opleidingsvliegtuig.

Onderwys en opleiding

  • Wharton School of Business aan die Universiteit van Pennsilvanië, B.S. Ekonomie
  • Universiteit van Pennsilvanië, B.A. Fisika
  • Presteer in wiskunde en wetenskap aan die Pretoria Boys High School.

Verwysings

  1. Curtis, Sophie (10 November 2014). "Elon Musk 'to launch fleet of internet satellites'". The Daily Telegraph (in Engels). London. Geargiveer vanaf die oorspronklike op 15 Julie 2019. Besoek op 23 Junie 2015. Elon Musk, inventor and business magnate
  2. "Elon Musk (South African entrepreneur)" (in Engels). Britannica Online Encyclopedia. Geargiveer vanaf die oorspronklike op 30 April 2015. Besoek op 23 Desember 2012.
  3. Friend, Tad (2009). "Plugged In". The New Yorker. 85 (23–30): 53. Besoek op 23 Desember 2012.
  4. "Elon Musk". Forbes (in Engels). Geargiveer vanaf die oorspronklike op 15 April 2020. Besoek op 25 Augustus 2018.

Eksterne skakels