Charles Lindbergh

in Wikipedia, die vrye ensiklopedie
Jump to navigation Jump to search
Charles Lindbergh
’n Beeld van die betrokke persoonlikheid.
Charles Lindbergh voor sy vliegtuig Spirit of St. Louis na sy beroemde trans-Atlantiese vlug, Mei 1927

Geboortenaam Charles Augustus Lindbergh
Gebore (1902-02-04)4 Februarie 1902
Detroit, Michigan
Oorlede 26 Augustus 1974 (op 72)
Kipahulu, Maui, Hawaii
Nasionaliteit Vlag van Verenigde State van Amerika Verenigde State
Ouers Charles August Lindbergh
Evangeline Lodge Land Lindbergh
Alma mater Little Falls High School (1918)
Beroep Vlieënier, skrywer, uitvinder, ontdekkingsreisiger, sosiale aktivis
Bekend vir Eerste solo, non-stop vlug oor die Atlantiese Oseaan
Eerbewyse Erepenning (1927)
Vooraanstaande vlieënde Kruis (1927)
Huweliksmaat Anne Morrow Lindbergh (huwelik in 1929)
Kind(ers)

Met Anne Morrow Lindbergh:

  • Charles Augustus Lindbergh Jr.
  • Jon Lindbergh
  • Land Morrow Lindbergh
  • Anne Spencer Lindbergh (Perrin)
  • Scott Lindbergh
  • Reeve Lindbergh (Brown)

Met Brigitte Hesshaimer:

  • Dyrk Hesshaimer
  • Astrid Hesshaimer Bouteuil
  • David Hesshaimer

Met Marietta Hesshaimer:

  • Vago Hesshaimer
  • Christoph Hesshaimer

Met Valeska (van onbekend):

  • 'n seun (naam onbekend)
  • 'n dogter (naam onbekend)
Charles Lindbergh signature.svg

Charles Augustus Lindbergh (4 Februarie 190226 Augustus 1974) was 'n Amerikaanse vlieënier wat die eerste solo, ononderbroke vlug oor die Atlantiese Oseaan uitgevoer het. Hy is gebore in Detroit, Michigan. Sy vader was Charles A. Lindbergh. Lindbergh het opgegroei in Little Falls, Minnesota en gestudeer aan die Universiteit van Wisconsin van 1920 tot 1922. Daarna word hy 'n leerling vlieënier aan die Nebraska Vliegtuig Korporasie. In 1924 sluit hy aan as 'n leerling by die United States Air Service Reserve by Brooks Field, Texas en later word hy 'n vlieënier in die destydse Army Air Mail Service.

Nadat hy bewus geword het van die kompetisie met 'n prysgeld van $25 000 vir die eerste persoon wat alleen oor die Atlantiese Oseaan vlieg, leen hy geld om 'n spesiale eendekker vliegtuig te laat bou. Hierdie vliegtuig was ontwerp deur Donald Hall en gebou deur Ryan Airlines in San Diego, Kalifornië en die Spirit of St. Louis genoem. Op 10 Mei 1927 vlieg hy die vliegtuig na St. Louis en twee dae later na New York. Sy totale vliegtyd van 21:45 was 'n nuwe transkontinentale rekord.

Op 20 Mei 1927 styg hy op van Roosevelt Field, New Jersey en 33:30:29.8 uur later land hy by Le Bourget-lughawe in Parys. Hiermee word hy oornag wêreldberoemd en sy daad een van die grootste sensasies van sy tyd.

Hy word 'n welwillenheids ambassadeur en besoek Mexico, Sentraal-Amerika, Wes-Indië en die Ooste. In 1929 trou hy met Anne Spencer Morrow, die dogter van Dwight W. Morrow, ambassadeur in Mexico. Hy toer deur die Verenigde State onder die beskerming van die Guggenheim Foundation for Aeronautics en word later 'n konsultant vir Transcontinentaland Western Air Transport en Pan American Airways. In 1933 besoek en sy vrou vyf kontinente as deel van ondersoek van transkontinentale vlugroetes.

In 1932 word Lindbergh se seun ontvoer en vermoor. Hy en sy vrou emigreer na Engeland as gevolg van al die publisiteit en hulle bly daar van 1935 tot 1938. Later verhuis hulle na die eiland Iliec naby Port Blanc in Frankryk. Sy buurman was Dr. Alexis Carrel, waarmee hy vroeër gekorresondeer het.

Terwyl hy in Europa was, het hy Duitsland drie keer besoek; in 1936 op versoek van die Duitse Veldmaarskalk Hermann Göring. Terug in Amerika waarsku hy die owerhede teen die groeiende Duitse lugmag se slaankrag. Tydens sy besoek in 1938 oorhandig die Duitse Regering 'n medalje aan hom. Na negatiewe kommentaar op van Lindbergh se uitsprake van 'n ooreenkoms met Duitsland bedank hy uit die Army Air Corps Reserve.

Toe Amerika egter toetree tot die Tweede Wêreldoorlog word hy 'n siviele konsultant vir die regering en maak waardevolle bydraes in die Stille Oseaan waarvoor hy later spesiale toekennings kry van die Amerikaanse Regering. Hy het later ook navorsing gedoen vir die Amerikaanse Lugmag. Hy het die volgende boeke gepubliseer:

  • We (1927)
  • Of Flight and Life (1948)
  • The Spirit of St. Louis (1953)

Laasgenoemde was 'n outobiografie waarvoor hy 'n Pulitzerprys gekry het. Die Congressional Medal of Honor, die Distinguised Service Cross en die 1953 Daniel Guggenheim International Aviation Award is ook aan hom toegeken.

Bron[wysig | wysig bron]

  • Collier's Encyclopedia, Crowell-Collier Educational Corporation, Volume 14, Bladsy 665.

Eksterne skakels[wysig | wysig bron]