Kleurpunt-langhaarkat

in Wikipedia, die vrye ensiklopedie
Kleurpunt-langhaarkat
Alternatiewe naam  Himalajakat (Amerika)
Land  Brittanje
Ontstaan  Kruisras
Soort lyf  Stewig
Pels  Lank
Patroon  Kleurpunt
Wetenskaplike naam
Felis catus (huiskat)
Nota: Die kat word nie deur alle verenigings as ’n aparte ras beskou nie.
Portaal  Portaalicoon   Katte

Die kleurpunt-langhaarkat (Engels: Colourpoint Longhair), of Himalajakat (Himalayan) soos hy in die VSA genoem word, is ’n langharige katras waarvan die voorkoms ooreenstem met dié van die Persiese kat. Die enigste verskille is sy blou oë en kleurpunte, ’n gevolg van die kruisteling van die Persiese kat met die Siamese kat.

Geskiedenis[wysig | wysig bron]

’n Bloupunt-langhaarkat.
’n Rooipunt-langhaarkat.

Hoewel soortgelyke rasse reeds honderde jare lank bestaan, is eers in die 1950's begin met die teling van kleurpunt-langhaarkatte, soos hulle in Europa en Suid-Afrika bekend is.[1] Die Amerikaanse naam kom van ander diere met kleurpunte, veral die Himalajakonyn.[2]

Hoewel The International Cat Association (TICA) hulle as ’n aparte ras beskou, word hulle saam met die Persiese kat en die eksotiese korthaarkat ('n Persiese kat met kort hare) gegroepeer onder ’n "Persiese teelgroepstandaard".[3] Die Amerikaanse Cat Fanciers' Association en die Southern African Cat Council (SACC) beskou hulle as ’n kleurvariasie van die Persiese kat.

Beskrywing[wysig | wysig bron]

Nes die Persiese kat is die kleurpunt-langhaar geneig om ’n ronde lyf met kort bene te hê, wat dit vir hulle moeilik maak om so hoog soos ander katte te spring. Ook nes by die Persiese kat is daar twee soorte, die "tradisionele" of "popgesig"-soort met meer uitstaande snoete en die "ultra"-gesigte met die platter snoete. Die bloupuntkat op die foto links bo is ’n popgesig, terwyl die rooipuntkat links onder ’n ultra-gesig het. Van die kleure wat onderskei word, is bloupunt, sjokoladepunt, room-/rooi-/vlampunt en robbruinpunt.

Die katte is sagmoedig, intelligent en in die algemeen baie sosiaal. Vanweë hul Siamese bloed is hulle gewoonlik aktiewer as Persiese katte.

Weens hul Persiese bloed kan hulle die geen dra wat polisistiese niersiekte veroorsaak, maar ’n genetiese toets kan gedoen word om te bepaal watter katte die geen dra en hulle kan dat gesteriliseer of gekastreer word.

Sien ook[wysig | wysig bron]

Lys van katrasse

Verwysings[wysig | wysig bron]

  1. Die ontwikkeling van die kleurpunt-langhaar http://www.cfa.org/Client/persianhimalayan.aspx Geargiveer 6 Augustus 2012 op Wayback Machine
  2. "Himalayan Cat" (in Engels). Pet Finder. Geargiveer vanaf die oorspronklike op 15 Mei 2020.
  3. TICA Persian Breed Group Standard[dooie skakel]

Eksterne skakels[wysig | wysig bron]