Windhoek

Windhoek Windhuk
Kaart	Wapen
	Vlag
Land	Namibië
Streek	Khomas
Koördinate	22°56′S 17°09′O
Stigting	18 Oktober 1890
Oppervlakte:
- Totaal	645 km²
Hoogte bo seevlak	1 650 m
Bevolking:
- Totaal (2011)	322 500
- Bevolkingsdigtheid	356,6/km²
Tydsone	WAT / UTC +1
- Somertyd	WAST / UTC +2
Burgemeester	Elaine Trepper (SWAPO)
Amptelike Webwerf	Windhoek

Windhoek (ook Duits: Windhuk) is die sentraal-geleë hoofstad van Namibië en lê in die Khomashoogland. Die stad is ongeveer 1 700 m bo seespieël en volgens die 2001-sensus was daar 233 529 inwoners. 'n Invloei van mense van oral in Namibië laat navorsers raam dat daar teen 2011 sowat 322 500 mense in Windhoek gewoon het.

Weens die stad se relatiewe grootte is Windhoek in alle opsigte die sosiale, ekonomiese en kulturele sentrum van die land. Feitlik elke nasionale onderneming se hoofkantoor is hier. Die Universiteit van Namibië is hier asook die land se enigste teater en alle groot media en finansiële liggame. Die Stad Windhoek se begroting is naastenby gelyk aan al die ander Namibiese plaaslike owerhede saam.

Geskiedenis

Windhoek tydens die Duitse kolonialtyd.

Die Christuskerk en Ruiterstandbeeld in Windhoek dateer uit die Duitse koloniale tydperk

Windhoek is oorspronklik in 1870 as 'n Rynse sendingstasie gestig; die naam Windhoek is afgelei van die Nama-woord vir "Plek van rook". Die huidige stad is in Oktober 1890 deur kaptein Curt von François gestig. Die Duitse koloniale owerheid het baie geld aan die ontwikkeling van die stad bestee en vandag nog huisves dit pragtige geboue uit die Duitse koloniale tydperk soos die Christuskerk en die Tintenpalast (letterlik "Inkpaleis").

Die stad groei in die tydperk ná 1907 baie vinnig en lok talle mense uit die binne- en buiteland, waaronder 'n groot aantal immigrante uit Duitsland en Suid-Afrika.

In die Eerste Wêreldoorlog is Windhoek op 13 Mei 1915 deur Unie-magte beset, toe Duitse troepe die stad ontruim het. Die Duitse atmosfeer, vermeng met talle ander kulturele elemente, het egter voortgeleef en dit is vandag die tuiste van die enigste Duitse dagblad in Afrika, die Allgemeine Zeitung en 'n groot, Duitse privaat skool, die Deutsche Höhere Privatschule (DHPS).

Tussen 1920 en 1990 was die stad die administratiewe sentrum van Suidwes-Afrika in die Unie van Suid-Afrika en is sedert die Onafhanklikheid van Namibië op 21 Maart 1990 die hoofstad.

Vandag is Windhoek die opvoedkundige, administratiewe, handels-, nywerheids- en kommunikasiesentrum van die land. In 1965 verkry Windhoek stadstatus. Die hoofstraat, Kaiserstrasse, is na onafhanklikheid herdoop na Independence Avenue, so ook talle ander strate na vryheidsvegters en Afrika-leiers. Die huidige geskatte bevolking beloop 316 000 (volgens World Gazetteer).

Geografie

Satellietbeeld van Windhoek

Die stad is die hoof kommersiële en finansiële sentrum van Namibië. Dit is geleë op 'n hellende vlakte op die noordelike kant van die Khomashoogland op 'n hoogte van 1 728 meter.

Om die stadsgebied uit te brei is 'n uitdaging op finansiële vlak en weens die geografiese ligging van die stad. In die suidelike, oostelike en westelike rigting word Windhoek omring deur rotsagtige bergagtige areas wat grondontwikkeling baie duur maak. Die suidelike kant is nie geskik vir industriële ontwikkeling nie omdat daar ondergrondse waterdraers teenwoordig is. Dit laat die uitgestrekte Brakwaterarea noord van die stad as die enigste haalbare plek vir die uitbreiding van Windhoek.

Voorstede

Windhoek is in verskeie voorstede verdeel:

Ligging van die 30 voorstede van Windhoek

• Academia
• Auasblick
• Avis
• Cimbebasia
• Doradopark
• Eros
• Erospark
• Greenwell Matongo
• Goreangab
• Hakahana
• Havanna
• Hochlandpark
• Katutura
• Khomasdal
• Kleine Kuppe
• Klein Windhoek
• Lafrenz-nywerheidsgebied
• Ludwigsdorf
• Luxury Heuwel
• Noordelik Industrieel
• Olympia
• Otjomuise
• Pionierspark
• Prosperita
• Rocky Crest
• Suidelik Industrieel
• Suiderhof
• Wanaheda
• Windhoek-sentraal (Windhoek Sentrale Sakekern)
• Windhoek-Noord
• Windhoek-Wes

Klimaat

Klimaatdiagram van Windhoek

Windhoek is geleë in 'n halfwoestynagtige klimaatsgebied. Dae is meestal warm met baie warm dae gedurende die somermaande met aande wat oor die algemeen koel is. Die gemiddelde jaarlikse temperatuur is 19.47 °C, wat hoog is vir 'n plek wat op so 'n hoë hoogte lê op die rand van die trope. Dit is hoofsaaklik weens die voorkoms van 'n warm noordelike lugvloei en die berge ten suide wat die stad teen koue suiderwinde beskut.

Die wintermaande van Junie, Julie en Augustus kry gewoonlik min na geen reën nie. Minimum temperature wissel tussen 5 °C en 18 °C. Aande is gewoonlik koel maar die temperatuur val selde tot onder 0°C en dit sneeu amper nooit. Dae is gewoonlik warm en wissel tussen maksimum temperature van 20 °C en 31 °C in Januarie.

Die gemiddelde jaarlikse reënval is ongeveer 360mm, wat te laag is om gewasse aan te ou of om tuine in stand te hou sonder om baie water te gebruik. Die natuurlike plantegroei is struike en steppe. Droogtes kom gereeld voor.

Demografie

In 1971 was daar ongeveer 26 000 blankes in Windhoek teenoor 24 000 swartes. Ongeveer een derde van daardie blankes (9 000) was van Duitse oorsprong.

Tans staan Windhoek se bevolking op meer as 300 000 (67% swart, 16% blank, 17% kleurlinge, Basters en Asiate) en groei met ongeveer 4% jaarliks met die informele nedersettings wat teen ongeveer 10% per jaar groei.

Ekonomie

Lugfoto van sentrale Windhoek, die ekonomiese sentrum van Namibië

Windhoek is verreweg die belangrikste ekonomiese sentrum van Namibië, en die meeste ondernemings het hulle Namibiese hoofkwartier in die stad. Ondanks die klein aandeel van die Duitstalige bevolking is 'n groot aantal maatskappye in besit van die nasate van Duitse immigrante. Weens die noue ekonomiese bande met Suid-Afrika speel ondernemings uit die RSA 'n baie groot rol in die land. Die hoofkantoor van Air Namibia is in die TransNamib-gebou in Windhoek. Verskeie winkelsentrums is in die post-onafhanklikheidsera gebou waaronder Maerua en Wernhillpark.

Besienswaardighede

Parlementêre Tuin

Christuskerk

Tintenpalast in Windhoek

• Christuskerk - 'n Lutherse kerk. Die konstruksie van die kerk het onder pastoor Wilhelm Anz in April 1896 begin. Aan die einde van die Herero-oorloë tussen die Duitsers en die Herero's, Khoikhoi's en Ovambo's, is dit ingewy as die Kerk van Vrede in 1910. Die kerk, wat in die Gotiese herlewingstyl met Art Nouveau-elemente gebou is, staan in die historiese middelpunt van Windhoek. Die 24 m hoë toring is soos die res van die kerk van sandsteen gemaak. Die uitsondering is die ingangsportaal en die altaar, wat van marmer gemaak is. Die kleurvolle loodglasvensters in die kerk was 'n geskenk van Kaiser Wilhelm II. Die kerk is langs die Parlementêre Tuin en die Tintenpalast.
• St. Mariakatedraal
• Dieretuinpark - 'n openbare park aan Onafhanklikheidslaan die sentrum van Windhoek. Die huidige park is versorg en het 'n dam, speelarea vir kinders en 'n opelugteater.
• Tintenpalast - Duits vir Inkpaleis, is die setel van albei kamers van dei Namibiese wetgewer, die Nasionale Raad en die Nasionale Vergadering. Dit is net noord van Robert Mugabe-laan en is ontwerp deur die argitek Gottlieb Redecker en gebou deur die maatskappy Sander & Kock tussen 1912 en 1913 uit materiale wat in ei streek ontgin is as 'n administratiewe gebou vir die Duitse regering wat in daardie stadium in beheer van Duits-Suidwes-Afrika was. Die gebou is omring deur die Parlementêre Tuin.
• Alte Feste - Duits vir Ou Fort. Dit is in 1890 gebou en huisves tans die Nasionale Museum.
• Hooggeregshof van Namibië
• Die drie kastele van Windhoek wat deur die argitek Wilhelm Sander gebou is: Heinitzburg, Sanderburg en Schwerinsburg
• Nasionale Biblioteek van Namibië
• Windhoek Treinstasie
• Holy Cross Kloosterskool
• Daan Viljoen Wildtuin naby Windhoek
• Windhoek Openbare Biblioteek - gebou in 1925 langs die Alte Feste

Vervoer

Spoor

Windhoek is per spoor verbind met:

• Okahandja (noord)
• Rehoboth (suid)
• Gobabis (oos)

Snelweë

In 1928 was Kaiserstraße, nou Onafhanklkikheidslaan die eerste geplaveide straat in Windhoek. Tien jaar later is die volgende een, Gobabisweg (nou Sam Nujoma-rylaan), ook geplavei. Vandag is ongeveer 5 000 km van ongeveer 40 000 km se paaie in Namibië geseël.

Windhoek se drie hoof toegangsroetes van Rehoboth, Gobabis en Okahandja geteer en is ontwerp om die grootste moontlike vloede wat in 50 jaar verwag word, te kan weerstaan. Geseëlde paaie kan verkeer dra wat teen snelhede van 120 km/h beweeg en behoort vir 20 jaar te hou.

Huurmotors is geredelik beskikbaar en word maklik uitgeken in die stad met tekens wat bestaan uit een letter en soveel as drie syfers (byvoorbeeld T681, T68, T1).

Lugvervoer

Windhoek word bedien deur twee lughawens. Die naaste is Eros 7 km ten suide van die stad vir kleiner vliegtuie, en Windhoek Hosea Kutako Internasionale Lughawe 42 km ten ooste van die stad. 'n Aantal buitelandse lugrederye vlieg na en van Windhoek. Huurvlugte en helikopters is ook beskikbaar.

Windhoek Internasionale Lughawe (WDH)

Lêer:Namibie Windhoek Aeroport 01.JPG

Die Windhoek Internasionale Lughawe (WDH)

Windhoek Hosea Kutako Internasionale Lughawe, 42 km oos van Windhoek kan tot 400 000 passasiers per jaar hanteer. Dit het een aanloopbaan sonder kapasiteitsbeperkings. Ander internasionale luhawens is in Walvisbaai en Lüderitz. Daarvandaan is daarliks vlugte na Frankfurt. Johannesburg, die spil waarom Suider-Afrika se lugverkeer draai, is twee uur per vliegtuig daarvandaan, vanwaar daar na meer as 50 stede gevlieg kan word. Die Suid-Afrikaanse Lugredery, LTU en Air Namibia het almal daaglikse vlugte na WDH met TAAG Angola Airlines wat twee-weekliks na Luanda vlieg.

Eros Lughawe

Eros Lughawe is die besigste lughawe in Namibië in terme van vliegtuie wat opstyg en land. Hierdie lughawe het ongeveer 12 000 individuele vlugte per jaar waarvan die meeste ligte vliegtuie is. Beperkings soos die lengte van die aanloopbaan, geraas en lugruimopeenhoping het Eros daarvan weerhou om in 'n groter lughawe te ontwikkel. Die meeste van Namibië se huuroperateurs is by Eros gebaseer.

Susterstede

Binneland

• Aranos, sedert 13 Maart 2003
• Eenhana, sedert 17 April 2002
• Gibeon, sedert 11 Maart 2003
• Helao Nafidi, sedert Augustus 2009
• Lüderitz, sedert 14 Maart 2003
• Maltahöhe, sedert 12 April 2003
• Mariental, sedert 11 Maart 2003
• Okakarara, sedert Augustus 2009
• Ongwediva, sedert 17 April 2002
• Ondangwa, sedert 17 April 2002
• Outapi, sedert 17 April 2002
• Oshakati, sedert 18 April 2002
• Rehoboth, sedert 14 Maart 2003
• Stampriet, sedert 13 Maart 2003
• Walvisbaai, sedert 8 Oktober 2002

Buiteland

• Berlyn, Duitsland, sedert 18 April 2002
• Brazzaville, Republiek van die Kongo, sedert 27 Julie 2011
• Bremen, Duitsland, sedert 18 April 2000
• Douala, Senegal, sedert 31 Augustus 2000
• Drakenstein, sedert 9 Mei 2012
• Gaborone, Botswana, sedert 23 Augustus 2001
• Harare, Zimbabwe, sedert 8 November 2000
• Havana, Kuba, sedert 23 Oktober 2001
• Lephalale, Suid-Afrika, sedert 22 Mei 2002
• Richmond, Verenigde State, sedert 20 Maart 1998
• Sjanghai, Volksrepubliek van Sjina, sedert 1 Junie 1996
• Trossingen, Duitsland, sedert 3 Oktober 2000
• Vantaa, Finland, sedert 13 Augustus 2002

Sien ook

• NG gemeente Windhoek
• NG gemeente Windhoek-Oos
• Windhoek (kiesafdeling)

Eksterne skakels

• Amptelike webwerf van Windhoek
• Tuisblad van die Deutsch-Namibischen Gesellschaft e.V.
• Allgemeine Zeitung Namibia (oudste dagblad in Namibië wat in Windhoek uitgegee word)
• 2 WebCams in Windhoek
• Avisdamm-Website - Vriende van die Avisdam