Distrik Ses

in Wikipedia, die vrye ensiklopedie
Spring na: navigasie, soek
'n Gedenkplaat vir Distrik Ses

Distrik Ses was 'n kleurryke woon- en handelsbuurt van Kaapstad wat min of meer begrens is deur die spoorweg in die noorde, De Waalrylaan in die suide, Canterburystraat in die weste en Scottstraat in die ooste.

Die buurt het sy naam in 1867 gekry toe die Wysigingswet op die Munisipale Raad bepaal het dat die munisipaliteit vir die doeleindes van die verkiesings in ses distrikte verdeel moet word. Distrik Ses was die suidelike gedeelte en het gestrek van Tafelberg tot aan die hange van Duiwelspiek en van die Woodstock-kant van die middestad tot by Trafalgarpark. In 1909 is die ses distrikte vervang deur agt wyke en die grootste gedeelte van Distrik Ses is ingesluit by die Kasteel-wyk. Vir Volksraadsverkiesings was Distrik Ses deel van die kiesafdeling Kaapstad-Kasteel, wat Morris Alexander, 'n groot kampvegter vir die regte van minderbevoorregtes, agt keer tussen 1910 en 1943 gewen het. Die naam Distrik Ses het egter gebly en is vereenselwig met krotbuurte en sy bose reputasie vir misdaad.

Dit was egter nie altyd die geval nie. Teen die 1840's was Buitenkantstraat nie meer die grens van die stad nie en toe het gegoede wit gesinne hulle gaan vestig in wat later Distrik Ses sou word. Tussendeur het 'n aantal Maleise en Kleurlinginwoners gebly, meesal ambags- en kleinsakelui. Mettertyd het die buurt begin verval. Tydens die 1890's het die stygende grondpryse en die toename in Kaapstad se bevolking aanleiding gegee tot oorbevolking en haglike sanitasie. Die toestande is vererger deur dat meer en meer swart werkers, wat meesal in diens was in die hawe, in die buurt kom woon het. Hulle het in treurige omstandighede gewoon met huiseienaars wat agtergekom het hulle kon geld maak deur woonplek in vervalle geboue ten duurste uit te verhuur.

(in aanbou)

Bronne[wysig]