Bellville

Bellville (Twaalf Myl / Hardekraaltjie)
Lugfoto van Bellville met Valsbaai in die agtergrond.
Bellville
Koördinate: 33°54′0″S 18°38′0″O
Land	Suid-Afrika
Provinsie	Wes-Kaap
Metropolitaanse Munisipaliteit	Stad Kaapstad
Stigting	1861
Vernoem na	Charles Davidson Bell
Bevolking (2001)
- Voorstad	89 732
Tydsone	SAST (UTC+2)
Poskode	7530
Skakelkode(s)	+27 (0)21

Bellville is 'n voormalige stad in die Wes-Kaap (Suid-Afrika), maar is nou 'n residensiële voorstad van Kaapstad. Dit is sowat 20 kilometer vanaf Kaapstad se middestad geleë. Die Universiteit van Wes-Kaapland, die hoofkantore van die Bybelgenootskap van Suid-Afrika en van Sanlam kan in die voorstad gevind word. Danksy die sentrale ligging, is dit ook naby die Kaapstad Internasionale Lughawe, 'n aantal gholfbane, die Kaapse wynroetes en verskeie winkelsentrums.

Geskiedenis

Bellville was oorspronklik as "Hardekraaltjie" bekend. Hardekraaltjie was die enigste harde grond waarop waens uitgespan kon word op hul togte deur die Kaapse Vlakte se sand. Die Hardekraaltjie-karavaanpark beslaan vandag hierdie terrein.

Toe die spoorlyn van Kaapstad na Wellington Hardekraaltjie bereik het, is daar 'n halte gemaak, wat "Durban Road" genoem is (Durbanville was vroeër bekend was as "D'Urban"). Durbanville was toe al 'n gevestigde gemeenskap, terwyl dié latere Bellville toe net begin ontwikkel het. Afrikaanssprekendes het Durban Road geken as Twaalf Myl, genoem na die leiklip-mylpaal met sy Romeinse XII wat by die hoek van Voortrekker- en Durbanweg staan. Dit was presies twaalf myl of 19,3 km van die Kaap. In 1861 is dit na die landmeter Charles Bell vernoem. Bellville het in 1940 'n onafhanklike munisipaliteit geword en het in 1979 stadstatus verkry.

Sien ook

• Bellville (kiesafdeling)
• Lys van dorpe in Suid-Afrika

Eksterne Skakels

• Universiteit van Wes-Kaapland
• Bellville-sakegids