Harare

vanuit Wikipedia, die vrye ensiklopedie.

Harare

Harare (voormalig, tot 1982 Salisbury) is die hoofstad van Zimbabwe. Die stad is Zimbabwe se grootste en die land se administratiewe, kommersiële en kommunikasiemiddelpunt. Dit is 'n handelsentrum vir tabak, mielies, katoen en sitrusvrugte. Vervaardigingsbedrywe sluit tekstiele, staal en chemiese stowwe in. Goud word in die omgewing ontgin. Die bevolking is in 2008 op 1 661 675 geraam.

Harare is geleë te 17°51'50" Suid, 31°1'47" Oos (-17.863889, 31.029722). [1]

Die stad is in 1890 gestig as 'n fort deur die Pioneer Column, 'n huurleër wat deur Cecil Rhodes op die been gebring is. Die stad het oorspronklik as Salisbury bekend gestaan, vernoem na die 3e markies van Salisbury, Robert Arthur Talbot Gascoyne-Cecil, toe Britse eerste minister. Dit het 'n stad geword in 1935. Salisbury was die hoofstad van die Federasie van Rhodesië en Njassaland vanaf 1953 tot 1963.

Met die tweede herdenking van Zimbabwiese onafhanklikheid op 18 April 1982 is die stad se naam na Harare verander, vernoem na die Sjona hoofman Neharawa.

Onlangs is Harare negatief geaffekteer deur die politieke en ekonomiese krisis wat Zimbabwe na die presidensiële verkiesing van 2002 beleef.

Harare is die tuiste van die Universiteit van Zimbabwe.