Sarong
'n Sarong (ook saroeng, verouderd)[1] is 'n groot stuk tekstiel wat dikwels om die middellyf gedraai word as kledingstuk. Dit word gedra in Suid-Asië, Suidoos-Asië, die Arabiese Skiereiland, Oos-Afrika,[2] en op baie Stille Oseaan-eilande.
Die stof het dikwels ruitpatrone, of kan helderkleurig wees vanweë batik- of ikatkleursel. Baie moderne sarongs het gedrukte ontwerpe, wat dikwels diere of plante uitbeeld. Verskillende soorte sarongs word wêreldwyd gedra, soos die lungi van Suid-Indië en izaar van die Arabiese Skiereiland.
Etimologie[wysig | wysig bron]
Die term "sarong" in Afrikaans kom via Nederlands uit die Javaans-Maleise saroeng. Dit is 'n verkorte vorm van kain sarung, wat onderskeidelik "doek, kleed" en "omhulsel" beteken.[3] Dit is in Engels die eerste keer in 1834 gebruik om te verwys na die rompagtige kledingstuk van die Maleiers.
Sarongs het baie verskillende name in Asië, insluitende Javaans: ꦱꦫꦸꦁ, sarung; Tamil: சாரம், saram; Arabies: صارون; en Singalees: සරම.
In Wes-Afrika kom die woord srong of sorong in Akan voor, waar dit "die hoogste punt" beteken, met verwysing na die feit dat die kledingstuk heel bo stewig vasgemaak word.[4]
Oorsig[wysig | wysig bron]
Sarong of sarung dui op die onderste kledingstuk wat in Suidoos-Asië deur mans en vroue gedra word. Dit bestaan uit 'n stuk materiaal van sowat 0,91 m breed en 2,3 m lank. In die middel van die lap, oor die smalste strook, word 'n paneel van sowat 30 cm breed van kontrasterende kleure of patrone ingeweef of ingeverf; dit is bekend as die kepala, of "kop", van die sarong. Dié lap word by sy smalste kante gestik om 'n buis te vorm.
'n Mens klim in die buis, bring die boonste kant na bo die naeltjie (die soom moet met die enkels oplyn), plaas die kepala in die middel van die rug en vou die oortollige materiaal van albei kante na die middel voor, waar hulle oorvleuel. Die sarong word dan vasgemaak deur die boonste soom oor homself te rol.
Maleise mans dra sarongs in 'n swart ruitpatroon, terwyl vroue se sarongs in die batikmetode gekleur is. In die Javaanse kultuur is batiksarongs egter algemeen en nie beperk tot 'n sekere gender nie; soms word hulle ook op formele geleenthede soos troues gedra.
Sarongs is algemene informele drag tuis in Broenei, Indonesië, Filippyne, Kambodja, Maleisië, Singapoer, Sri Lanka en 'n groot deel van die Indiese subkontinent.[5]
Verwysings[wysig | wysig bron]
- ↑ "Sarong" in die WAT. Aanlyn by viva-afrikaans.org (intekening nodig). Besoek op 19 Augustus 2023.
- ↑ "argiefkopie". Geargiveer vanaf die oorspronklike op 26 Februarie 2017. Besoek op 13 April 2017.
- ↑ "Sarong" in die Etimologiewoordeboek van Afrikaans. Aanlyn by viva-afrikaans.org (intekening nodig). Besoek op 19 Augustus 2023.
- ↑ Christaller, Johann Gottlieb (22 Junie 1881). "A Dictionary of the Asante and Fante Language Called Tshi (Chwee, Tw̌i): With a Grammatical Introduction and Appendices on the Geography of the Gold Coast and Other Subjects". Evangelical Missionary Society – via Google Books.
- ↑ "Singh, Atom Sunil; "Indigenous Games between Cambodia and Manipur: A Borderless Connectivity"". E-pao.net. Besoek op 18 September 2011.
Skakels[wysig | wysig bron]
Wikimedia Commons het meer media in die kategorie Sarong.
Hierdie artikel is in sy geheel of gedeeltelik uit die Engelse Wikipedia vertaal.
