N2 (Suid-Afrika)

in Wikipedia, die vrye ensiklopedie
(Aangestuur vanaf N2)

Nasionale roete N2 shield

Nasionale roete N2
Roete-inligting
Onderhou deur SANRAL en Stad Kaapstad
Lengte2 255 km (1 401 mi)
Belangrike aansluitings
WespuntBuitengrachtstraat in Kaapstad
  N1 in Kaapstad
N9 / N12 naby George
N10 naby Coega
N6 in Oos-Londen
N3 in Durban
Oospunt N11 / N17 in Ermelo
Ligging
StedeKaapstad
George
Port Elizabeth
Makhanda
King William’s Town
Oos-Londen
Mthatha
Durban
Richardsbaai
DorpeSomerset-Wes
Caledon
Swellendam
Riversdal
Mosselbaai
Knysna
Plettenbergbaai
Jeffreysbaai
Humansdorp
Butterworth
Kokstad
Port Shepstone
KwaDukuza
Piet Retief
Ermelo
Snelwegstelsel
Genommerde roetes in Suid-Afrika
N1N3
Die N2 word in rooi aangedui
Die N2 wat in Kaapstad begin/eindig.
Die N2 tussen George en Mosselbaai.
Die N2 kruis Swartvlei naby Sedgefield.
Die N2 oor die Bloukransbrug.
Die N2 en die M65 naby Durban.

Die N2 is een van Suid-Afrika se 17 nasionale paaie. Dit is die hoofsnelweg aan die suidkus van Suid-Afrika. Dit begin/eindig by Ermelo in Mpumalanga, en beweeg dan teen die kus van KwaZulu-Natal af, verby Durban, deur die Tuinroete, en die Oos-Kaap tot waar dit eindig in Kaapstad in die Wes-Kaap.[1]

Roete[wysig | wysig bron]

Groot dorpe en stede langs die roete van die N2 sluit Kaapstad, Somerset-Wes, Caledon, Swellendam, Mosselbaai, George, Knysna, Humansdorp, Port Elizabeth, Grahamstad, King William's Town, Bhisho, Oos-Londen, Mthatha, Kokstad, Port Shepstone, Durban, KwaDukuza, Empangeni, Piet Retief en Ermelo in.

Wes-Kaap[wysig | wysig bron]

Die N2 begin/eindig in sentraal Kaapstad by die noordekant van Buitengracht langs die ingang van die Victoria & Alfred Waterfront. Die eerste seksie van die N2 loop saam met die begin van die N1; dit is ’n vier-baan verhewe snelweg wat tussen die stadskern en die Kaapstad-hawe loop. Op die oostekant van die stadskern verdeel die pad in twee en die N2 draai in ’n suidelike rigting as Eastern Boulevard, oorkruis dan die spoorwerf en spoorlyne naby die Kaapstadse stasie.

Die N2 daal tot grondvlak in Woodstock voordat dit die "hospitaaldraai"-wisselaar (so genoem a.g.v. die ligging naby die Groote Schuur-hospitaal) binnegaan. In hierdie wisselaar smelt die N2 saam met die M3 om ’n enorme 10-baan snelweg te vorm voordat die twee weer verdeel. Omdat die hospitaaldraai teen ’n helling lê is dit berug vir verkeersknope en ongelukke.

Na die hospitaaldraai draai die N2 oos om as ’n sesbaansnelweg oor die Kaapse Vlakte te gaan na Somerset-Wes; hierdie gedeelte staan bekend as Setlaarsweg. Langs hierdie roete kruis dit die M5, M7 en R300-deurpaaie; dit gaan ook verby die punt van die aanloopbaan van die Kaapstad Internasionale Lughawe. In Somerset-Wes word dit verminder tot ’n onverdeelde snelweg en kruis verskeie ander paaie d.m.v. verkeersligte wat gereeld verkeersknope veroorsaak.

Oos van Somerset-Wes gaan die N2 oor die Sir Lowryspas om die Overberggebied te betree. Dit gaan naby Grabouw op die Hottentots-Hollandplato verby en daal dan af met die Houw Hoekpas na Botrivier. Na Botrivier loop dit deur landerye en deur dorpe soos Caledon, Riviersonderend, Stormsvlei, oor die Breederivier, deur Swellendam, Riversdal en Albertinia. Hierna gaan die pad oor die Gouritsrivier (via die Gouritsrivierbrug) om dan weer na die kus by Mosselbaai te swenk, wat die begin van die Tuinroete inlui.

Oos van Mosselbaai word die N2 weer ’n verdeelde snelweg en bly so tot die kruising met die N12 net buite George. Vandaar gaan dit oor die Kaaimansgat na Wildernis, verby Sedgefield tot by Knysna en Plettenbergbaai. Na Plettenbergbaai is ’n deel van die N2 ’n tolpad; dit staan bekend as die Tsitsikammatolroete. Tolgeld word gehef hoofsaaklik as gevolg van die Bobbejaansrivierbrug, Grootrivierbrug en die Bloukransrivierbrug wat gebou moes word. ’n Alternatiewe roete gaan deur Nature's Valley. Die Bloukransrivier vorm die grens met die Oos-Kaap.

Oos-Kaap[wysig | wysig bron]

In die Oos-Kaap gaan die N2 oor die Groot Stormsrivierbrug en naby aan Humansdorp en Jeffreysbaai verby voordat dit oor die Van Stadensrivierbrug gaan. Die pad is nou ’n vierbaan-verdeelde snelweg deur Port Elizabeth en kruis die Swartkopsrivier, gaan verby die Coega afrit, kruis die Sondagsrivier en gaan deur Colchester. Die vierbaanpad word twee bane en die N2 gaan verder in ’n noordoostelike rigting vanaf Port Elizabeth, en beweeg weg van die kus in die rigting van Grahamstad; die N10 splits oppad weg van die N2 in die rigting van Middelburg in die binneland. Na Grahamstad gaan die N2 deur die voormalige Ciskei; by King William's Town draai dit terug na die kus en bereik Oos-Londen. Die N2 gaan verby Oos-Londen met ’n verbypad en ontmoet die N6, wat noordwaarts van Oos-Londen na Bloemfontein gaan.

Na Oos-Londen keer die N2 weer terug na die binneland om die moeilike terrein van die Wildekus te vermy. Dit gaan deur die voormalige Transkei. Die eerste dorp is Butterworth en dan Transkei se voormalige hoofstad Mthatha. Daarna gaan die pad deur Mount Frere en Mount Ayliff. Naby Kokstad gaan die N2 KwaZulu-Natal binne.

KwaZulu-Natal[wysig | wysig bron]

Van Kokstad draai die N2 weer terug na die kus en bereik die see by Port Shepstone. Vanaf Port Shepstone is dit ’n snelweg verby die oord-dorpe van die Natalse Suidkus insluitende Umzumbe, Hibberdene, Ifafa Strand, Scottburgh, Umkomaas en Amanzimtoti voordat dit met ’n verbypad om Durban gaan. By die EB Cloete-wissellaar in Westville kruis die N2 en N3 nasionale pad vanaf Johannesburg.

Na Durban gaan die N2 verder aan as ’n snelweg langs die Natalse Noordkus. Dit gaan verby Umhlanga Rocks en na sowat 40 km is die afdraai na die Koning Shaka Internasionale Lughawe. Dan gaan die pad verby Ballito en Tongaat, met die snelweg wat by KwaDukuza eindig. Dit gaan by die hawe van Richardsbaai verby, draai noord en beweeg weg van die kus in die hartjie van Zoeloeland. Dit gaan naby aan St Lucia, St. Luciameer en die iSimangaliso-vleilandpark en Hluhluwe-Imfolozipark verby. Die N2 gaan dan verby die Pongolapoortdam. Dit swaai nader aan eSwatini (voorheen Swaziland) naby die Golelagrenspos verby, draai dan wes en gaan deur Pongola voordat dit Mpumalanga betree.

Mpumalanga[wysig | wysig bron]

In Mpumalanga bly die N2 na aan die eSwatini-grens deur Piet Retief[2] waarna dit noordwes gaan om in Ermelo te eindig. Ermelo is deur die N17 verbind met Johannesburg en Mbabane en met die N11 na Potgietersrus en Ladysmith.

Versteurings aan die roete[wysig | wysig bron]

Swaar reën het ’n modderstorting tot gevolg gehad op die Kaaimanspas tussen George en Wildernis. Dit het tot gevolg gehad dat die pad tydelik gesluit was van 26 tot 29 Augustus 2006. As gevolg van die modderstorting het ’n gedeelte van die pad ingesak en het groot krake in die padoppervlak begin verskyn. Na ’n inspeksie van ’n ingenieurspan is ’n enkele baan geopen vir voertuie met ’n brutogewig van onder 5000 kg.

’n Alternatiewe roete op die Saasveldpad is in gebruik geneem maar die pad was slegs geskik vir een baan se verkeer en ligte voertuie. Swaarvoertuie moes ’n alternatiewe roete via die R62 en die Langkloof neem wat die afstand tussen George en Wildernis van 11 km tot meer as 600 km verleng het.[3] Grootskaalse herstelwerk is gedoen en die N2 is heropen.

Verkeer op die N2 is ook verskeie kere deur massaprotesoptogte versteur. Op 11 September 2007 het inwoners van die Joe Slovo informele nedersetting die N2 in Kaapstad naby Langa versper. Die polisie het dit opgebreek deur rubberkoeëls op inwoners te vuur en het 30 mense gewond.[4][5] Op 4 Desember 2008 het ’n paar duisend inwoners van eMachambini tussen KwaDukuza en Richardsbaai in KwaZulu-Natal die N2 versper in protes teen die voorgestelde AmaZulu-wêreldtemapark. Die polisie het ingegryp met 23 inwoners wat beseer is en 10 wat gearresteer is.[6]

Sien ook[wysig | wysig bron]

Verwysings[wysig | wysig bron]

  1. (en) Falkner, John (Mei 2012). Suid-Afrikaanse genommerde roetebeskrywing en bestemmingsontleding (Report). Nasionale Departement van Vervoer. Archived from the original on 6 Junie 2014. https://web.archive.org/web/20140606100245/http://www.transport.gov.za/LinkClick.aspx?fileticket=5qOHvOI4KuY%3d. Besoek op 1 September 2014. 
  2. Op Pad in Suid-Afrika B.P.J. Erasmus. 1995. ISBN 1-86842-026-4
  3. "news24.com berig". Geargiveer vanaf die oorspronklike op 6 Desember 2008. Besoek op 7 Junie 2009.
  4. "Cape Town: Police wade in on Joe Slovo shackdwellers blockade" (in Engels). labournet. Geargiveer vanaf die oorspronklike op 28 Maart 2019.
  5. "N2 Gateway and the Joe Slovo informal settlement: the new Crossroads?" (in Engels). Abahlali. Geargiveer vanaf die oorspronklike op 9 Oktober 2019.
  6. "Cops break up protest over KZN development" (in Engels). Mail & Guardian. Geargiveer vanaf die oorspronklike op 9 Oktober 2019.

Eksterne skakels[wysig | wysig bron]