Christiaan Frederik Beyers

in Wikipedia, die vrye ensiklopedie
Spring na: navigasie, soek
Christiaan Beyers
’n Beeld van die betrokke persoonlikheid.
Gebore 23 September 1869
Kaapkolonie
Oorlede 7 Desember 1914
Vaalrivier, Unie van Suid-Afrika
Beroep prokureur, kryger en 'n leier in die Maritz-rebellie van 1914

Generaal Christiaan Beyers was prokureur, kryger en 'n leier in die Maritz-rebellie van 1914.

Hy is in 1869 naby Stellenbosch gebore en verhuis in 1889 na die Transvaal, waar hy prokureur en 'n burger van die ZAR word. Hy sluit hom by die Boeremagte aan tydens die Tweede Vryheidsoorlog en vorder tot by die rang van generaal.

Ná die Vrede van Vereeniging hervat hy sy beroep as prokureur in Pretoria. Hy word later speaker van die Transvaalse parlement tydens Verantwoordelike Regering. In 1912 word hy aangestel as kommandant-generaal (bevelvoerder) van die Uniale Weermag. Die volgende jaar besoek hy Europa en ontmoet daar vir keiser Wilhelm II van Duitsland.

Kort ná sy terugkeer kruis hy swaarde met generaal Louis Botha, wat hy gereken het té veel waarde geheg het aan oorsese verpligtinge. Beyers knoop daarom onderhandelinge aan met generaal Koos de la Rey en andere wat teen die regeringsbeleid gekant was. Sy ontevredenheid met die regering word op die spits gedryf toe hy in September 1914, ná die uitbreek van die Eerste Wêreldoorlog, bedank as bevelvoerder van die weermag. Generaal Jan Smuts het hom van hoogverraad beskuldig.

Beyers raak by die Rebellie betrokke en verdrink dieselfde jaar nog in die Vaalrivier terwyl regeringstroepe hom agtervolg het.

Bron[wysig]

  • Rosenthal, Eric, "Encyclopaedia of Southern Africa", Juta and Company Limited, Kaapstad, 1978.